45. Filibus maa muwazif habachi

Al gissa di ti guul chunu?

1. Kidib al weenu jahuud al kuffar dol gaalo fi ras Istafanus?

   Humma kaddabo wa gaalo kadar hu ga’id yi hajji kalam fasil did nabi Musa wa did Allah (45:2).

2. Chunu achia al fasiliin al Istafanus gaala kadar al chaab hana Israiil sawohum?

   Min zaman ke, al chaab hana Israiil da’iman mukhalifin Allah, rafidin Ruh al Khudus wa Katalo anbia hana Allah. Lakin Istafanus gaal kadar humma hassa sawo chey al fasil ziada: humma katalo al Masih (45:3).

3. Chunu al chuyukh al diin sawo le Istafanus fi wakit al humma simiyo chey al hu gaala fooguhum?

   Humma waddo Istafanus be guw barra min al hille wa rajamo be hujar le yi mut (45:4).

4. Chunu al Istafanus sa’ala le Allah yi sawi lel chuyukh al diin?

   Istafanus sa’ala le Allah ma yi hasib khatiyahum fi chan humma rajamo (45:5).

5. Chunu al mu’miniin sawo fi wakit al izzab jabarahum le yamurgu min madinat al khudus?

   Humma jaro fil bakanat akhariin chik-chik wa ga’idiin yi bachuru be Isa al Masih fi ayyi bakan humma macho fooga (45:6).

6. Ruh al Khudus gaal le Filibus achan yamchi yi lagi yatu fi derib?

   Ruh al Khudus gaal le Filibus khalli yamchi yi lagi nadum muwazif kabiir min Habacha al rakib fi karro (45:7).

7. Chunu al muwazif ga’id yagiri fooga fi wakit al Filibus garraba?

   Hu ga’id yagiri fi chey al nabi Ichaya kataba fi nadum wahid al barid misil al hamal fi wakit al katalo (45:8).

8. Filibus gaal kadar nabi Ichaya katab fi yatu?

   Filibus gaal kadar nabi Ichaya kabab fi Isa al Masih (45:10).

9. Chunu al habachi da talab min Filibus le yi sawi fi wakit al humma wassalo fi bakan al inda alme?

   Al habachi da talab min Filibus gaal hal hu yagdar yi barrid barrud mamudia (45:11).

10. Chunu al hassal le Filibus baad barrud mamudia hanal habachi da?

    Ruh al Khudus wadda Filibus fi bakan akhar wa hinak da hu istamarra be bicharat Isa le nas (45:12).

Al gissa di maanataha lena chunu?

1. Kikef Istafanus radda fi wakit al karabo wa waddo gidam kabiir hana rujal al diin wa khiadat al akhariin?

   Hatta kan al nas kaddabo fi Istafanus kulu, hu da chahad be kalam al yi khus Isa be kullu chajaa. Hu ma kaan kayif achan yi guul lel khiadat kadar humma aznabo wa isso Allah.

2. Chunu fikir hana Istafanus lel yahuud al katalo?

   Istafanus ma chaaf nas al katalo dol misil mujurimiin. Badal da, hu kaan rahim ma’ahum wa sa’al Allah le ma yi akhibuhum achan humma katalo wa ma yi hasib lehum fi zunubuhum. Hu habba aada hagga hatta wakit al hu ga’id yi mut.

3. Hal al izzab hanal muminiin da wagaf al bichara hana rissalat Isa al Masih?

   Allah istakhdam be izzab hanal mu’miniin da le yi chatit rissalat Isa di barra min madinat al khudus. Gubbal al izzab da, al mu’miniin ga’idiin yi bachuru fi madinat al khudus bas. Lakin baad bidaya hanal izzab da, humma chatato fi ayyi bakan wa bacharo be rissala di fi kullu bakan al humma macho fooga.

4. Chunu al Filibus ga’id yi sawi wakit Ruh al Khudus gaal leya khalli yamchi fi sahara le yi lagi al habachi?

   Filibus kaan ga’id yi bachir fi Samira wa nas katiriin amano be Isa. Lakin, Ruh al Khudus rassal Filibus ba’id min Samira le yi lagi habachi da bas. Chey al habachi yi amin da biga muhin bilhain, lahaddi Allah wagaf Filibus ma khalla yi hajji le nas akhariin al katiriin. Filibus tabakh kalam hana Allah wa macha.

5. Wakit al Filibus garrab lel habachi da, kikef kaan wakit al munasib lel habachi da achan yasma kalam al yi khus Isa?

   Al habachi da ga’id yagiri fi chey al yi khus al Masih fi kitab hana nabi Ichaya, lakin ma ya’arfa kadar Ichaya katab fi Isa. Ruh al Khudus wadda Filibus lel habachi da fi wakit al munasib, wakit al hu kaan jahiz le yasma rissalat Allah. Achan Filibus jaa leya, al habachi da aman tawali wa barrad barrud mamudia.

6. Yatu al gaal wajiib al habachi da yi barrid barrud mamudia?

   Al habachi be nafsa bas irif kadar wajiib hu yi charif Isa wa yi barrid barrud mamudia be usuma. Achan ke da bas hu sa’al Filibus le yi barrida barrud mamudia. Da chey al Filibus sawa wal habachi macha beeta, farhan achan hu irif Isa.

Zibdet al kalam

Fil bidaya, al yahuud akkado min al masihiin le sabab al mu’jiza al humma sawo wa kikef al mu’miniin ga’idiin yi ichu hayatuhum. Lakin baad dak humma kirihom wa ta’ahamo Filibus kadar hu gaal kalam fasil did al nabi Musa wa did Allah, khalas katalo. Baad da, humma azzabo al mu’miniin wa jabarohum le yamurgu min madinat al khudus wa yi chatutu fi bakanat akhariin. Lakin Allah istakhdam bel izzab da achan waddi al mu’miniin le yi bachuru be rissalat Isa le kullu nas, le ayyi bakan fi dunia. Nas katiriin amano be Isa be sabab bicharat Filibus wal akhariin. Lakin Allah madda idda le nas misil al muwazif habachi, al kaan muhtaj le yasma kalam al yi khus Isa. Hatta wakit hanal izzab, Allah kaan ga’id bakhadim be gudura le yi khalli kanista takbur wa ti ziid.