15. Al ard al muwa’ida

Al gissa di ti guul chunu?

1. Mala nas al itneen al rassolohum dol wa’ado le yahfazu Rahab, al zannaya di wa usrataha?

   Rahab amanat be Allah wa sa’adatuhum le yajeru min Jeriko (15:1).

2. Kikef Allah anta fursa lel israiiliin le yi chuggu bahar al urdun?

   Allah jaala kadar alme hanal rijil da yagif achan yi khalli al israiiliin yalgo fursa al yi chuggu be rijileenuhum yabis (15:2).

3. Kikef Allah anta fursa lel israiiliin le dammuru madinat Jeriko?

   Humma hawogo Jeriko, nafakho suffarituhum wa sarakho. Wakit humma sawo al chey da, Allah darag daradir hanal madina le achan humma yagdaro yi hajjumu al nas dol (15:3, 15:4).

4. Chunu al hassal le Rahab wa usrataha fi wakit al israiiliin dammaro Jeriko?

   Yochua daafa le Rahab wa usrataha wa humma bigo israiiliin (15:5).

5. Chunu al gabawaniin sawo achan al israiiliin ma yi dammuruhum?

   Humma gaalo kadar jayiin min balaad al ba’id le achan al israiiliin yi sawo ma’ahum sulaha (15:6).

6. Kikef al amuriin raddo fi wakit al gabawaniin sawo sulaha ma’al israiiliin?

   Humma lammo gudurtuhum le yi hajjumu al gabawaniin (15:7).

7. Chunu kaano al ajayib al itneen al Allah sawahum le yi sa’id al israiiliin achan yi nassuru fil amuriin?

   Allah arsal al barrid kubar le yaktul al gabawaniin wa hu wagaf al chamis fi bakan wahid le achan al israiiliin yalgo zaman tawiil le yi nassuru fooguhum marawahit (15:9, 15:10).

8. Chunu al Allah anta le ayyi gabila baad al kumala hanal harib maa al kananiin?

   Hu anta le ayyi gabila hana Israiil bakana halala min al ard al muwa’ida (15:12).

9. Wakit al Yochua lamma al israiiliin, chunu al humma wa’ado le yi sawu?

   Humma wa’ado kadar yabgo aminiin le Allah wa ti’o le chaariyata (15:13).

Al gissa di maanataha lena chunu?

1. Rahab kaanat mara zannaya. Lakin Allah khibilaha, wa be usrataha kullu, misil wahidiin min al israiiliin achan hi amanat be Allah. Chunu al kalam da yi guul leku fi chey al yi khuss yatu Allah?

   Allah ga’id jahiz le yagbal kullu nas al yi amunu beya. Hatta kam marra humma aznabo kulu. Hu yagbalahum hatta kan nas al akhariin yi fakkuru kadar ma wajiib lehum achan yalgo charaf al da.

2. Allah chagga fi ussut bahar al urdun derib le Yochua wal israiiliin. Chunu al Allah sawa le Musa wa kaan yi chaabi be al da?

   Allah chagga derib al yabis fi ussut bahar al ahmar le achan Musa wa al israiiliin yagdaro yi subbuku min al massiriin. Be tarikha al di, Allah chagga derib fi ussut bahar al urdun le Yochua. Ankun Allah dawar al israiiliin yafahamo kadar hu ga’id yakhadim be wasta hana Yochua be nafs al tarikha al gawiya al hu khadam be wasta hana Musa.

3. Hal intu ga’idiin tarjo kadar al dawadir hana madina wahide yago achan nas wahidiin rakho, hawago wa sarakkho?

   Da ma chey wajiib le nas yi hajjumu madina al muhawagat be dawadir al tuwal foog. Lakin, Yochua wa kullu al israiiliin ti’o le Allah wa sawo chey al hu gaal lehum yi sawu. Khalas, Allah sawa al dawadir dol kulluhum wago le achan humma yi dammuru al madina.

4. Fi fikirku mala al israiiliin ma waddo taftichuhum al fi gabawaniin le Allah?

   Achan al nas ga’idiin yi ta’ussu da’iman le yas’alo faza min Allah illa kan humma irifo kadar humma muhtajiin beya. Ankun Yochua wal israiiliin fakkaro kadar humma yagdaro be tarikha di yi ruddu lel gabawaniin bala izin hana Allah. Achan humma ma sa’alo le Allah, humma sawo khata kabiire. Al gabawaniin tchatchohum wal israiiliin ma gidiro yagto al istifag al sawo ma’ahum.

5. Be tarikha al weenu Allah wassaf gudurta lel khaliga fi wakit al hu sa’ad al israiiliin le yi nassuru fil amuriin?

   Allah raakhab fil zaman le achan al barrid yi dafig min al sama wa yaktul al amuriin. Battan hu anta izin le chamis fil sama achan ma yi harrik le achan al nahar yabga tawiil. Illa Yahwah al khalag kullu chey da bas yagdar yi sawi chey da.

Zibdet al kalam

Allah wadda al israiiliin fil ard al muwa’ida wa sa’adahum le yi nassuru fil aadahum kullu. Hu sawa al chey da be tarikha al ti wassif kikef hu gawi bilhain. Hu wagaf alme hana bahar al urdun. Hu dammar al dawadir hana Jeriko. Hu nazal barrid al kubar le yaktulu al amuriin wa hu wagaf al chamis bakan wahid le yi sa’id Israiil. Fi wakit al hu khibil Rahab wa usrataha, hu battan wassaf kadar hu yagbal kullu nas al yi amunu beya. Wa hu khadam chadid be wasta hana Yochua le achan yanti balaad hana Kanaa le Israiil. Chey da yi wassif kadar hu tamam wa’ad al sawa le Ibrahim.