12. Al khuruj

Al gissa di ti guul chunu?

1. Yatu kaman al marag min al Massir ma’al israiiliin?

   Nas al amano be Allah lakin ma kaano israiiliin kulu marago min Massir ma’al israiiliin (12:1).

2. Kikef Allah khaada al israiiliin?

   Allah rassal amud al sahab tawiil wakit al nahar. Al amud da biga amud al nar wakit al leel kulu. Hu macha gidam al israiiliin le yi wassifuhum bakan al yamchu fooga. Allah kaan fil amayid dol (12:2).

3. Mala Farahun khayar raya le ma yi khalli al israiiliin yamchu?

   Allah khalla Farahun yi khayir raya achan hu yi door yi wassif lel aalam kadar hu agwa min Farahun wa min alihat Massir kullu (12:3).

4. Mala al israiiliin kaano khayifiin wakit al humma jech hana Massir jayi?

   Achan humma ankhado been jech al massiri wa bahar al ahmar. Humma kaano mufakkiriin kadar jech al massiri yeji yaktuluhum (12:4).

5. Chunu chey al Allah sawa le yahfiz al israiiliin min al massiriin?

   Allah hawal amud al sahab wa khatta been al israiiliin wal massiriin achan al massiriin ma yagdaro yi chufu al israiiliin (12:6).

6. Chunu al hassal wakit al Musa raffa idda fil bahar?

   Allah sawa rih al bi kiss alme be isre wa zene le yi sawi derib fil bahar lel israiiliin. Al israiiliin chaggo al bahar be rijiluhum yabis (12:7, 12:8).

7. Chunu al hassal lel massiriin wakit al humma macho wara al israiiliin fil bahar?

   Allah nazal khariye ussut al massiriin wa humma wihilo. Baad da hu gabbal alme foog al massiriin wal bahar akalahum kullu (12:10, 12:11).

8. Chunu al israiiliin fakkaro fi Musa?

   Humma amano be kadar hu kaan nabi hana Allah (12:12).

9. Kikef al israiiliin ga’idiin yi zakkuru ayyi sana kadar Allah nassar fil massiriin?

   Kullu sana, al israiiliin ga’idiin yi tafulu iid al fissa be katilin wa akilin hana hamal wahid maa khubza al bala tawara (12:14).

Al gissa di maanataha lena chunu?

1. Fi fikirku mala nas al min ummam al akhariin fato min Massir maa al israiiliin?

   Achan humma chafo kullu al awbiya al Allah nazalahum fil massiriin. Ankun be sabab da bas humma amano kadar Yahwah hu Allah. Khalas humma kharraro le yi tabu Allah min al yi tabu al asnaam hana Massir.

2. Allah khalas jabar Farahun le yi khalli al israiiliin yamchu min Massir. Mala hu jabar Farahun le yi tabihum min jedid?

   Ankun achan ummam al akhariin ma ya’arfu kadar Allah jabar Farahun le yi khalli al israiiliin yamchu. Allah wadda Farahun le yi tabi al israiiliin le achan hu yagdar yi dammir al massiriin kulluhum. Be tarikha di, al chuub hana kullu ummam yassamo khabar da wa ya’arfu kadar Allah kaan gawi ziada min Farahun wa ilahat hana Massir.

3. Mala Allah wadda al israiiliin ale bahar al ahmar, fi bakan al humma yin’assuru fooga, badal al waddihum be derib akhar?

   Allah dawar yistamal be bahar al ahmar le yi dammir al massiriin wa yi wassif khuwata lel israiiliin. Fi chan da, Allah waddahum fi kachum al bahar badal al yi hawiga.

4. Mala al massiriin ma gidiro yalgo al israiiliin tawali gubal humma ma yagto al bahar da kullu?

   Al israiiliin kaano kutar lahaddi fi chan da humma chalo wakit katiir le yagto al bahar. Lakin, Allah khatta al sahaba warahum le achan al massiriin ma yagdaro yi chufu kadar humma ga’idiin yagto al bahar. Baad al israiiliin gato al bahar, Allah hawal al sahaba da le achan al massiriin yagdaro yi chufuhum wa yi tabuhum.

5. Chunu israiiliin sawo fi wakit al humma fihimo kadar al massiriin dol mato?

   Al israiiliin firiho bilhain wa abado Allah. Humma fihimo kadar hu najjahum min al moot wal ubudiye. Humma kaano farhaniin wa kharraro le yi karumu Allah. Humma ga’idiin da’iman yi ayidu iid al fus’ha ayyi sana misil al Allah ammarahum le yi sawu.

Zibdet al kalam

Al israiiliin marago min Massir le yamchu fil ard al muwa’ida, machin maa nas hana ummam al akhariin al chafo chey al Allah sawa lel massiriin wa amano beya. Lakin Allah lissa ma kamal ma’al massiriin. Hu wadda Farahun le yi khayir fikir wa yi tabi al israiiliin le achan hu yagdar yi dammir Farahun kullu. Hu fakka derib al yanti fursa lel israiiliin le yagto fi ussut bahar al ahmar. Lakin hu katal al massiriin kulluhum wakit humma dawaro yi tabuhum. Be tarikha al di, hu wassaf lel israiiliin wa le kullu ummam al akhariin kadar hu gawi ziada min Farahun wa ilahat hana Massir. Hu battan wassaf lel israiiliin kadar hu ga’id yi khuduhum wa yi hamihum safaruhum lel ard al muwa’ida.