40. Sayidna Isa salabo fi salib

Al gissa di ti guul chunu?

1. Al assakir jabaro Isa le yi chil chunu?

   Humma jabaro le yi chil salib al yamchi yi mut fooga (40:2).

2. Chunu al Isa sa’ala le abu yi sawi le assakir al salabo dol?

   Hu sa’ala abu le yi samihum, achan humma ma ya’arfu chey al ga’idiin yi sawu (40:2).

3. Chunu ichara al foog fi ras Isa ti guul?

   Al ichara di ti guul « Malik hana Yahuud » (40:2).

4. Chunu al Isa wa’ada le sarag al talab minna le yi fakkir leya?

   Isa wa’ada kadar hu yi kun ma’aya nafs al yom fi janna (40:4).

5. Chunu al chuyukh al diin wa nas al fi ussut jamaa gaalo le Isa yi sawi le achan humma yi amunu beya?

   Humma gaalo le Isa khalli yanzil min al salib wa yi najji nafsa (40:5).

6. Chunu hassal fi sama wakit al Isa ga’id foog fi salib?

   Al sama biga kullu ke azarag le muddat talata saat fi ussut al nahar (40:6).

7. Chunu al Isa gaala, wakit hu sarakh wa machi yi mut?

   Hu gaal kadar kullu chey khalas tamma wa anta ruuha fi ideen abu (40:7).

8. Chunu hassal lel satara al fi haykal wakit al Isa mat?

   Al satara charat bakan tineen, min foog lahaddi tihid (40:7).

9. Chunu askar al rumani da gaala fi Isa wakit hu mat?

   Al askar da gaal kadar Isa kaan barih bel hagiga wa hu kaan Ibn Allah (40:8).

10. Yatu daffan Isa?

    Itneen min kubarat hana yahuud bi sammuhum Yusuf wa Nikadamus dol bas daffano Isa (40:9).

11. Kikef Yusuf sadda al khabur?

    Hu dardag hajar al kabiir giddam al khabur wa sadda fooga al dukhul (40:9).

Al gissa di maanataha lena chunu?

1. Fi fikirku mala Isa gaal kadar al assakir dol ma ya’arfu chey al humma ga’idiin yi sawu?

   Al assakir dol da kaano rumaniin al ma induhum ma’arifa katiira fi diin hana yahuud. Humma ankun fakkaro kadar Isa da yi kun mujurim wahid aadi wa humma jaalo misil da.

2. Al assakir dol libo gumar le yi gassumu lubas hana Isa. Mala al chey da yi sa’idna le ni amunu be kadar Isa da bas al Masih?

   Al fiil da kaan wahid min achia al katiriin al kalam hana kutub, al maktub min miyat al siniin gubal, gaala kadar yi sawu lel Masih. Kalam al anbia dol gaalo da kullu ke tamma fi Isa.

3. Isa gaal le sarag al tab min zunuba da kadar hu yi kun ma’aya fi janna nafs al yom. Chunu al kalam da yi guul lena fi dalil hana dukhul fi janna?

   Al sarag da yom wahid ke ma sawa fiil al adil. Badal da, hu i’taraf kadar kaan wahid muznib wa talab min Isa khalli yi fakkir fooga fi malakuta. Achan ke da, Isa wa’ada kadar hu yi kun fi janna- maanata fi sama nafs al yom. Le nadum yadukhul fi sama, hu lazim yi amin be Isa.

4. Fi fikirku mala Isa ma dalla min al salib wa ma najja nafsa fi wakit al chaab sa’ala fi chey da?

   Nas al gaalo le Isa khalli yi dalli min al salib dol da ma dawaro yi amunu beya. Hu ga’idiin yi chamutu leya sakhit bas. Humma ma khatto baaluhum kadar hu inda sulta le yi dalli min al salib da. Lakin hu jaa fi dunia le yi mut fi chan al maznubiin. Da kaan muradat Allah al Ab. Hu lazim yagod fi salib wa yanti hayata halala le achan yanti fursa le Allah achan yi sami le nas al yi amunu be Isa.

5. Chunu al kamal wakit al Isa sarakh?

   Wakit al Isa sarakh: « khalas kamal! » da hu ga’id yi guul kadar hu kamal be mukafa hanal ikhab lel zunub hana nas kullu fi dunia. Hassa al chey da khalla Allah yi sami le nas al yi tubu min zunubuhum wa al yi khuttu baaluhum fi Isa. Al nas khalas ma muhtajiin le yi mutu fi sabab zunubuhum halaluhum.

6. Mala satara hanal haykal charat min foog lahaddi tihid?

   Al satara hana haykal di tadahar al nas ma bi chufu wala ma badukhulu fi bakan al mukhadas bilhain al Allah ga’id fooga. Fi sama da, Allah charata al satara min foog lahaddi tihid wakit Isa mat. Hu sawa al chey le yi wassif kadar Isa fatah al chari lel insaan achan yi garrib Allah be dahiye hana Isa di.

7. Mala al askar da gaal kadar Isa kaan barih wa Ibn Allah?

   Askar al rumani da katal takhriban miyat al mujurimiin. Hu irif kadar Isa ma sawa chey misil al mujurim. Badal da, hu kaan nadum adil al sa’ala abu le yi sami al assakir dol wa al hajja be kalam tayib lel sarag al i’taraf da. Be tarikha akhara, al ichara hana tawajiib al hassalo wakit al Isa mat dol jabo al askar da le yi guul kadar Isa da ma kaan insaani bas lakin battan hu kaan Ibn Allah.

Zibdet al kalam

Isa ti’ib bilhain lahaddi anta hayata. Assakir dol chamato leya wa taabo. Al chuyukh al diin wa nas al ussut al jamaa chamato leya. Hatta wahid min al sararig al fi salib jamba da kulu chamat leya. Be da kulu, Isa ga’id fi salib wa ti’ib le achan yanti fursa le Allah achan yi sami le nas al maznubiin. Hu kaan jahiz le yi mut achan yi ti’i le abu wa yi timma khidime al hu jaa le yi timma. Wahid min al sararig dol fihim chey da wa macha fi sama maa Isa. Wahid min al assakir kulu chaaf kadar Isa kaan be sahi ke Ibn Allah. Wa chuyukh al diin itneen amano be Isa wa charafo le yi daffunu jissida. Hatta Allah zata liga charaf be moot hana Ibna da.