1. ŋen ŋəđiđia
Fəṯia ŋen ŋananoŋ iŋi ŋəđiđia laŋge pređ ŋəfo ŋəɽo. Rəmwa riđu elo na alo na laŋge pređ ildi ləfau eñoman đenəlonto. ŋen Rǝmwa riđu ləbate alo yafo yapiano, na yaɽo ŋərəm na waŋge gafo gero gənəŋ giđənau. Orn usila gə-Rəmwa gafo gura nǝŋau.
Nəṯia Rəmwa ndraṯa," ŋgiṯu arrerre aŋəfeṯe,"na arrerre naŋəfeṯe. Rəmwa ndrəseici ṯa arrerre gafo gaŋəra na ndrənci ṯa "ëđəñin." Rənəŋu Ndrəndəđe ŋərəmiŋano iŋi ndrënci ṯa "uləŋgi." Rəmwa riđu arrerre eloman laɽnda iđiđia alo.
Eloman ildi ləɽajia orəba gəɽijan iđiđia alo, Rəmwa rəlwaɽo na ndriđi lambala elo ləfo labatiya eđəpe.Rënəŋu ndriđi lambala elo na ndrəlndəđe ano ŋawaŋa iŋi ŋəfo elo na alo.
Eloman ildi ləɽaco orba gəɽijin, Rəmwa ralwaɽo na ndrəndəđe ŋawano aloiya ywonḏoṯo.Rënəŋu ndrənci alo ywonḏoṯo ṯa "ləbate." Na rënəŋu ndrënci ŋawa ṯa "đəmbrwa." Rəmwa ndrəseici ŋen iŋi ndriđu ṯa ŋafo ŋaŋəra.
Orn Rəmwa ndraṯa,"ŋgiṯu ləbate alələŋe nuɽi na ŋañiya ŋəɽwa pređ." Na fəŋen iŋi ŋəfo ŋiđənu. Rəmwa ndrəseici ŋen iŋi rënəŋu riđu ṯa ŋafo ŋaŋəra.
Eñoman iñi ñəɽaco orba marldwan iđiđia alo, Rəmwa ndrəlwaɽe na ndriđi ađəñina, ubwa na ropa. Rəmwa ndrəliđi ṯa alənaiđe arrerre eləbate na ṯa ariđi Loman na uləŋgi, ŋiga na nṯəliaŋ. Rəmwa ndrəseici ŋen iŋi rënəŋu riđu ṯa ŋafo ŋaŋəra.
Eñoman iñi ñəɽo đenəŋ , Rəmwa ndrəlwaɽe na ndriđi laŋge ildi ləlala nəŋau na ndifia pređ. Rəmwa ndrəseici ŋen iŋi ṯa ŋəfo ŋaŋəra, na rënəŋu ndrəlabuŋṯi.
Eñoman iñi ñeɽo đenəlonto iđiđia alo, Rəmwa ndrata̱, "ŋgiṯu laŋge ləŋoɽa pređ ŋəđwala đələbate aŋəfeṯe!" Na ŋen naŋəfeṯe ŋen ŋarəno Rəmwa ralwaɽo. Ɖwala đəmaṯan đafo đeneɽa, na đəmaṯan đəraɽa alo iđuđa, na đeđəñwa. Na Rəmwa ndrəseici ŋen ṯa ŋafo ŋaŋəra.
Orn Rəmwa ndraṯa, "aliđər leđa larnəndr ŋaiyo. ŋen ŋanṯa alerṯe ŋələŋe eləbate na eđwala pređ đalo."
Nəṯia Rəmwa ndrəme đuđa, ndriđi eđa gəɽorra, ndrəməɽi ubwuđano gəđəmëṯia. Eđa igi gəɽorra gafo gabərni Ađam. Rǝmwa ndrəwađe gri igi alo isi Ađam giđi aŋəwəfeṯe, na ndrəmuwëɽi ṯa aŋərəmwoṯe.
Alo yi-grri iligano gaḏan, Rəmwa ndrəwađe nuɽi nəɽejian ini nəfo aləsoŋ-uɽi gəđəmëṯia na uɽi igi gəđəlëŋeṯa ŋen ŋəŋəra na ŋeicia. Rəmwa ndrəṯi Aḏəm ṯa aŋəse nuɽi pređ igrii gakəl ilda uɽi gəđələŋeṯa ŋen ŋəŋəra na ŋeicia. Ndə gënəŋu gəso uɽi iguɽi gakəl,gënəŋu giđi aŋaiye.
Orn Rəmwa ndraṯa, "ŋen ŋero ŋəfia ŋope ṯa maje igi aŋəfeṯe gonto." Orn waŋge gero gənəŋ eđwala ṯa giđi aŋəɽeṯe đamađaṯa đ-Aḏam.
Orn Rəmwa ndrəɽi Aḏam iŋuriđ ŋəfo pəlalo. Orn Rəmwa ndrəme rəme rənəŋ elorəb r-Aḏam na ndrəmeiṯi eđa gəɽəbwa na ndrəmanace.
Ndə Aḏəm gənwano eđa igi gəɽubwa, nəŋaṯa, "ŋen ŋaŋəra đəge! Eđa igi garnəñe! ŋgiṯəma aŋënǝcini wuji gəɽəbwa, ŋen ŋanṯa gënəŋu gafo giđənu egeđa gəɽorra." fəŋen iŋi ṯa eđa gəɽorra giđi aŋəṯađe eṯen na ləŋgen na lënəŋulu liđi aləɽeṯe aŋəno yento wasen-ga gëləɽəŋu.
Rǝmwa ndriđi eđa gəɽorra na gəɽəbwa larno ŋaiyo ŋëləɽəŋu. Rënəŋu ndrəlabuŋṯi na ndrǝlaiṯi ṯa, "alələŋe ñere ñwaiña na ñere ñəlorəba elden na ṯa alonṯəjiace ləbate!" Na Rəmwa ndrəseici ŋen ṯa laŋge pređ ildi ndəriđəlo lafo laŋəra kaiñ, na rënəŋu rəfo raŋərəṯəlo nano pređ. ŋen iŋi pređ ŋafo ŋiđənu eloman ildi ləɽaco orəba đenəlonto iđiđia alo.
Ndə Loman ɽrəmaṯo ildi leɽaco orəba đenəgəɽijan, Rəmwa ndrəɽəñiađaṯe ŋəmaɽria ŋëləɽəŋu. Orn Rəmwa ndrəmiñiniano eŋen pređ iŋi rënəŋu rəfo rəbəđia. Rënəŋu ndrəbuŋṯi loman ildi leɽaco orəba đenəgəɽijan na ndriđi letəɽe, ŋen ŋanṯa e-loman ildai, rënəŋu rafo raməñinu-ano iŋǝmaɽria ŋëləɽəŋu. Fəṯia ŋen iŋi Rəmwa riđau elo na alo na laŋge pređ ildi ləfu.
Ɖǝmëđənia Ig-ađam: gəđəṯođa alo 1-2