11. Acəba gəđaburniya nano
Rəmwa ndrəgərəñaṯe Fero ṯa ndə gero gəŋgiṯia leđa lisrail ṯa labla, Rənëŋu riđi arəɽəñe ñere pređ ñəɽorro iñi ñəɽo ŋəɽwa ñəleđa Lə-masr na đwalla. ŋen Fero gəno ṯia gənëŋu naŋerəṯe gəbəntia ŋen ṯa aŋənaṯe Rəmwa.
Rǝmwa ndrənaiyəđe ŋen ṯa arëbri ñere pređ iñi ñəɽo ŋəɽwa eleđa ildi ləntu ŋen ŋəlëɽəŋu. Leđa leneɽa pređ ŋen ŋafo ŋalunaiyənia nano ṯa aləme lɽruma lero amərətəđa nano ṯa aləɽəñe.
Rəmwa ndrəlwaɽəṯi leđa Lisrail ṯa alëgəɽi ŋəfəni ŋəñruma isur pređ yəneɽia enen, na ṯa aluɽi eđe na aləse taltal, acəbaga igi giđənu gero uḏəɽiano. Na rənëŋu naŋəlaiṯi com ṯa alṯuɽǝđaini ṯa alṯađe alo yəmasr ndə ləso.
Leđa lisrail ldiđi ŋen pređ garno Rəmwa rəlwaɽəṯəlo ṯa aliđi. Uləŋgiano gakəl, Rəmwa narəməñiađaṯe leđa nano Ləmasr ṯa arəɽəñe ñere pređ ñərrwa iñi ñəɽo ŋəɽwa.
Neɽia pređ nəleđa lisrail nafo nerṯo ŋəfəni nano isur esen, nṯia Rǝmwa ndrəṯađaṯe neɽia enen. Leđa pređ ildai ləfo eneɽa labərni. Lənëŋulu lafo labərnu ŋen ŋanṯa ŋəfəni ŋəɽruma.
Orn leđa ləmasr lderṯe ləbaŋənṯia ŋen ŋə-Rǝmwa walla ṯa lađəñëđëṯa eŋen rəlwaɽəṯəlo. Orn Rǝmwa ndrərəṯe rəṯađaṯa neɽia enen. Rǝmwa ndrəɽəñe ñere pređ ñəɽorro iñi ñəɽo ŋǝɽwa ñəleđa lə-Masr.
Ñere pređ ñəɽorro iñi ñəɽo ŋəɽwa ñəleđa lə_Masr ldaiye, ŋere naŋaiye ananoŋ ŋəɽorro iŋi ŋǝɽo nda emaje igi gantənu egara, ŋen iŋi naŋərmaṯe ŋere nano ŋəɽorro ŋə-Fero. Ɖara na đwana nṯəfeṯe eleđa lwaña lə-Masr ŋen ŋanṯa đəjiano eđen.
Ulŋgi gakəl, Fero naŋundəđi Musa na Aron naŋəlaiṯi ṯa, "mor leđa lisrail na ñamñe alo yə-Masr taltal!" Leđa lə-Masr ṯaləgerəđo eleđa ildi Lisrail ṯa aləmñe taltal.
Ɖumëđənia Igañjil: yə-đəmñia 11:1-12:32