13. Đǝrrëiđia eŋen đǝrǝmwa lǝđala lisrail
ŋen rǝmwa rǝmǝñu leđa lisrail alo edǝmbor đore, rǝnëŋu rǝmiñëlo eđǝñwaŋ na ldǝrǝmaṯe naiyen yebarnia sina. Fǝŋu aiyen isi Musa gǝsaicu uɽi geđe goɽa. Na leđa lwađe ŋudu aiyen nḏurṯu.
Rǝmwa ndrǝlwaɽǝṯi Musaŋ na leđa lisrail ṯa, "ndǝ ñǝgǝđëñǝđaṯiñi eŋen na nəñarǝmoṯe đǝrrëiđia eŋen đǝlëɽǝñi, ñǝgiđi ñerṯe alo erəjađaṯo eŋǝlǝŋ ŋǝkana, na irnuŋ gǝṯëɽe."
Ndǝ ñoman ñəŋaṯo ñəɽijin, ŋen leđa lafo laṯoɽaṯa nǝtam enen igusila, na rẹmwa ndrerwa naiyen eđǝpe isi yǝ-sina ŋaɽrwaŋa garno rǝmwa rǝsa na rǝbǝđǝniano, đǝbwa, na ole garno mberimberia đǝbǝra. Orn Musa gafo gəŋginu ŋuŋ pǝɽan ṯa aŋəpoṯe naiyen.
Nṯia rǝmwa ndrǝlǝnaice đǝrrëiđia eŋen na ndraṯa, "egǝɽo Rǝmwa, Rǝmwa eralo, irri rabǝrende eŋǝbai alo yə-masr. Ñerṯe ñagǝbuwaŋǝṯia imwa yerto."
" Ñerṯe ñǝgǝbiđia ŋǝbrowađa na ñerṯe ñǝlkwukwuđǝñiṯalo, ŋen ŋanṯa ñi, Rǝmwa, egaɽo Rǝmwa rǝɽo ega. Ñerṯe ñagǝbëđia erǝŋ gǝlëɽǝñ gǝđamǝno. apor sindwaŋ ŋen ŋanṯa ñarǝmoṯe loman lǝtëɽe ɽrǝmwa. Eŋen ŋomǝn, iđur ŋǝmaɽra eŋalo eñoman iñi ñeɽo đenñǝɽijan
"fiṯu etalǝga na lǝŋgalǝga. ŋerṯe agǝɽǝñiđia. ŋerṯe agǝɽǝŋa wujiga gǝrto. ŋerṯe agalalǝbica laŋge. ŋerṯe agǝɽaŋa wujiga gǝɽo ëwur, egeɽa gǝlëɽǝŋu, walla laŋge ildi lǝnëɽǝŋu."
Nṯia Rǝmwa ndrǝwarǝđe alkanun isi eɽo ređ nǝlwandr lǝnǝlla na nǝŋǝlǝnaice musaŋ. Rǝmwa com ndrǝlǝnaice alkanun yǝmaṯan na ŋen iŋi liđi alǝtateṯe. Ndǝ leđa leđǝñađaṯo eŋen, Rǝmwa ndrǝgaiye ŋen ṯa riđi aŋǝlabuŋṯi na aŋǝləɽrǝmoṯe. Ndǝ lero lǝđǝñađaṯalo eŋen, Rǝmwa riđi arǝlagǝme.
Rǝmwa cum nǝŋənaice leđa lisrail ŋen ŋađuna isi ndrǝnǝŋu ronaṯa ṯa aliđi. gənëŋu gabernia lǝtu lǝđǝrariđia, na lerṯo eŋəna eɽəjan, lebǝiđe ano erenǝga. fǝŋu eđa goɽra igi gǝkana gaŋgǝyino ṯa aŋǝɽe erena nano, ŋen ŋanṯa Rǝmwa raɽaŋa tu.
Eđa gǝnǝŋ igi gero gǝđǝñađǝṯa Rǝmwa eŋen ŋalǝkanun aŋǝmaṯa đwala ađuna nəñwaŋ na lǝtu ləđǝriđia ṯa aɽeṯe đeɽəđənia Đǝrǝmwa. Eđa goɽa gəkana naŋǝɽeñe laŋge na naŋǝludaice ađuna eđǝpe. ŋəfǝni ŋǝđwalla iŋi ŋǝđeɽǝđǝnia naŋǝdare ŋeicia ŋǝleđa na nǝŋiđi eđa getəɽe Rəmwa nəñwa. Rǝmwa ndrǝwǝṯe orǝba Musaŋ, Aron, na đələŋia Đəron
Ieđa pređ laŋǝnǝṯe ŋen ṯa alǝđəñađaṯe Rǝmwa eŋen iŋi renəcəlo, ṯa alukwuđəñiṯi Rǝmwa alo ronto, na ṯa aɽeṯe leđa ləlëɽǝŋu lefo alǝsoŋ. Orn iliga lobǝlano ləđəgia ŋena ṯa aləđəñađəṯi Rəmwa eŋen, leđu ŋen ŋeicia đurri.
Eñoman ñwaiña, Musa gafo laɽwatiđia Rəmwara naiyen eđǝpe isina. Nṯia leđa ləcuarəti iđəṯaṯuritia đǝlëɽəŋu. Nṯia lapǝṯia Aron ŋwandra iŋi ŋeicia ela ṯa aŋǝlǝṯoɽǝđeṯe waŋge igi lukwuđəñəṯia alo!
Na Aron nǝŋiđi waŋge garno ŋëndri. Na leđa nalǝtođe ṯalukwuđǝñǝṯo ləmborəđa alo na ṯaliṯu đeɽëđənia! Rǝmwa rafo racǝṯəlano kaiñ ŋen ŋanṯa ŋeicia eŋen na ndrǝɽe ŋen ṯa aŋǝlëmǝndađe. Orn Musa nǝŋeɽəđe Rəmwa iŋulu, na Rǝmwa ndrǝŋǝnṯe đeɽǝđia na nǝŋerṯe ralǝmǝndađa gënǝŋu gafo gacǝno kaiñ na nakəlëđe nǝlla ano isi yəwarǝđinu ŋen iŋi ŋeɽo ređ
ŋen Musa goɽǝṯo naiyen na nǝŋǝnwane ləmbrwađa,
Nǝṯia Musa nǝŋǝbuɽi lǝmborwađa leɽo đəđua na nəŋəɽe ŋawano na nəŋiđi ṯa leđa pređ aləṯi. Rǝmwa ndrəđwata ŋeɽəñ iŋi ŋǝđirtaica na nǝŋǝɽəñ leđa lwaiña kaiñ.
Musa naŋiđi ŋwandra nəlla ŋerto ŋalǝkanun isi yeɽo ređ ṯa alɽrǝṯe elaŋge ildi lefo legǝro. Nǝṯia nǝŋabwǝṯe naiyen tǝŋ na nəŋəṯaṯurṯi Rəmwa ṯa aŋgađici leđa ŋen ŋeicia. Rəmwa ndrǝnaṯe Musa . Musa nǝŋoɽəṯa naiyen ŋenŋa iŋi ŋeɽo ređ inəlla yəmaijn. Nəṯia Rəmwa neŋernde leđa lisrail alosəŋ nəŋǝlete eləbate ləđəsa ŋen.
Đumëđənia igađam: gəđəməña 19-34