8. ŋen Rǝmwa rəbəri Yusif na leđa leɽa gəllëɽəŋu.
Ndə nǝṯǝlaŋ nǝŋgaṯo nowaiña, Yagub gafo gaɽo eđa goɽra, gǝnǝŋuŋ naŋǝđwaṯe iđia gəllëɽəŋu igi gǝbuwamaya, Yuisf, ṯa aŋǝɽe aŋǝnwana lorǝba ildi lǝnowana đwala.
Lorǝba ǝllëɽǝŋu lǝməneđe ŋen ŋanṯa eṯen egen gabuwamaiya kaiñ gǝmǝñajǝma lorǝba na gerǝṯo wili ṯa giđi aŋǝɽeṯe eđa gəɽənda eŋulu.ŋen Yuisf geṯo lorəbs nano əllëɽəŋu, ldəmandi ldəmiliđi ləmanaice leđa ildi ləbərldiđa laŋge.
ŋen lorəba lə-yuisf ləməlu loɽəbaṯo egeɽa, lənəŋulu ldəgere erena gə-yusif ldənci iŋəfən ŋərldo. Naṯia ləŋaicu eṯen erena ṯa aŋəsëiđi eŋen ṯa đwala đeđəñwa đaɽəño yusif. Yagub gafo gaiciano kaiñ.
Ləbai ildi ləbəliđa ldəmamaṯe yusif alo yə-masr. Masr gafo goɽra,na irənuŋ gafo gonṯoṯo kaiñ gəfo đəbarlda nano đə-Nil. Ləbai ildi ləbəliđa ldiliđi yusif garno ibai egələŋ igi gwaiña laŋge enələŋ.Yusif naŋiṯi eləŋ gələɽəŋu ŋəmëɽra ŋope. Na Rəmwa ndrəbuŋṯi yusif.
Wasen geləŋ gəlëɽəŋu nəŋinḏëici ṯa Yusif ṯa aldəgəndri, orn Yusif naŋəneđe gabəđi ŋen ŋeicia ŋəgia Rəmwa ŋen ŋarno ṯia. Wasen geləŋ naŋeiciṯiano naŋənaice Yusif ŋen ŋəpiano ṯa aŋəndəni na aŋəneicini egarra. ŋen gəfo egarra, Yusif nəŋunḏəjaini đonaṯađa đə-Rəmwa, na Rəmwa ndrəŋəbuŋṯi.
ŋen nəṯəlia nəŋgaṯo niɽijan,Yusif gafo garəmađaṯo ṯia egarra, na gafo gero ŋaen ŋənəŋ ŋeicia. na uləŋgi gənəŋ, Fero igi leđa ləmasr ləmaurundəđia ṯa eləŋ, naŋəndre wili gəɽijan igi gajəbənṯəma kaiñ. eđa gero gənəŋ gəɽwađaṯia gaməŋaicia ŋen ŋəwil.
Rəmwa ndrənaice Yusif ŋabəɽa ṯa aŋogoɽəbaice ŋen ŋəwil, na ṯia Fero nəməmənṯa Yusif egarra na Yusif naŋəmuguɽəbiṯi ŋen ŋəwil naŋaṯa , Rəmwa rabəla arəđwaṯa đowaḏa ̇đoɽra, na inəṯəlia đenəɽijan ŋərowaṯaŋa ŋiđ aŋəfeṯe.
Fero nəŋəŋənṯi ŋen ŋə-Yusif nəmëɽi ṯa aŋəɽeṯe eđa geɽaico orəba gəɽijan eleđa pređ lwaiña ŋəmano alo yə-masr!
Yusif nəŋəlwaɽəṯi leđa ṯa alɽrəmoṯe ŋwana ŋwaiña inṯəliaŋ đenənəɽijan nəđowaḏa đəŋəra. Nṯia Yusif naŋəṯwaice leđa ŋwana intəliaŋ đenənəɽijan iliga ləŋoraṯaŋ ṯa alerṯe laŋge lwaiña ləlsa.
ŋərowaṯaŋ ŋafo ŋëndu alo gerṯa alo yə-masr pipi, orn alo yə-kanan com isi yagub gəfu leđala leɽa gəlëɽəŋu.
Nṯia yagub naŋəđwaṯe liđia ləlëɽəŋuŋ loɽra alo yə-masr ṯa aliliđa ŋəsa. lorəba lə Yusif lero ləmaləŋeṯa, ŋen ləđəru ma nëiñuaŋ ṯa aliliđi ŋəsa. orn Yusif galəŋeṯəlo.
ŋen ginḏaicu lorəba əllëɽəŋu ṯa aŋənwane gaɽe laređa eŋen eŋen,Yusif naŋəlaiṯi ṯa "egaɽo oralo Yusif, ñerṯe ñagəđəñia alo. ñaginḏaicu ŋen ṯa ñiđi ŋen ŋeicia ŋen nəñaṯweñe garno ebai, Orn Rəmwa riđu ŋen eŋalo ŋeicia ṯa aŋəɽeṯe ŋen ŋeŋəra! elar ñafeṯe alo yə-Masr igiđi indəgërnəṯi ñaŋ na leđa leneɽa enalo".
Orn ndə lorəba lə-Yusif loɽəbaṯo eɽa na ldəlwaɽəṯi eṯen, Yagub, ṯa Yusif gëtu gaməṯo məldin, na gënəŋuŋu gafo gaŋəra nano.
ŋen ŋarno Yagub gafo gaɽo eđa goɽra, naŋəɽe alo ye-Masr leđala leɽa gəlëɽəŋu pređ, na lənëŋulu pređ ldəfeṯe tu. ŋen Yagub gəməlu gəbaiya nəŋəbuŋṯi ləđia əllëɽəŋu lɽrwaŋ pređ.
Ɖərrëiđia iđi đəɽo đəkəkasa ŋen iđi rəmwa renaico Abraiyim naŋəɽi Isag nano, na ñere iñi ñəɽo ređ na ñəɽijan na leđa nano leneɽa enen. đələŋe iđi đəñere iñi ñəɽo ređ na ñəɽijan naŋəɽeṯe amëcu gəleđa Lisrail.
Đumëđinia egađam:gə-Đotođalo 37-50