12. Ađam gəđəməña
Leđa lisrayil lafo laŋəranano ṯa aləmiñe alo yə-masr. Lənëŋulu lero ldəɽia ləbai đəge, na lənëŋulu lafo lapəla elbate ildi Rəmwa relwaɽəṯəlu! Nṯia leđa lə-masr lənace leđa laŋge lisrayil ildi lənëŋulu leɽəđəlo, lwandar lowañ iliano na gurus na laŋge ləmaṯən laŋəra. Leđa lirənuŋ gəmaṯən lënde ŋen ŋərəmwa na ləmaiñe leđala lisrayil ləŋgaṯe alo yə-masr.
Rəmwa ndrəldirəldi ŋenŋa ŋarno đaba đwəla đeđaŋəṯo elo đibaŋəiđia ađəiniñ na uləŋgi nađəɽeṯe sia. Rəmwa rafəlda ñoman pređ na ralɽəmoṯa ŋen ləpərlda. ŋen pređ iŋi ṯa aliđi ŋuŋ ṯa aləmadadeṯe.
Iliga lətəfər, Fero na leđa lelëɽəu ldəriđi ŋəṯəɽa eŋen na ṯalonaṯo ṯa leđa lisrayil aləɽeṯe ləbai elden təŋ. Rəmwa drəməlađiđi ŋenŋa Feroŋ nano ṯa leđa aləsace ṯa rənëŋu raɽo đeṯəm, na raləŋeṯu ŋuŋ rerṯo ŋabəɽa ŋwaña ŋeməñaṯo Fero na imwa yəlëɽəŋu.
Nṯia Fero na turrwa đəlëɽəŋu ṯaldəlaldëñu leđa lisrayil nḏruṯu ŋen ŋanṯa aldəiđi leɽo labai elden təŋ. ŋen leđa lisrayil lisaicu turrwa đəmasr đələməndeṯa nano, lənëŋulu lələŋeṯe ŋen ṯa laɽəđəino eɽo turrwađa na đəmbrwađa iđi đore. lənëŋulu lafo lađëñalo kañ na ṯaləro pəlelo, "ləgaṯađur alo alo imasr eđa? ləgabəlar alaiyer!"
Nṯia musa nəŋəlwaɽəṯi leđa lisrayil ṯa," ñerṯe ñagəđəñalo! rəmwa riđi arəndəbwəñëđiciđi đəñiđi na arndəberi." Nṯia rəmwa ndrəlwëɽəṯi musa ṯa," ləwëɽəṯu leđa ṯa aləborëgođaṯe đəmbrwa nano đore."
Nṯia rəmwa ndrəme ldɽo ləđaba na ndrəŋëɽi iligano eleđa lisrayil na eleđa ləmasr ŋen ŋanṯa leđa ləmasr alerəṯe ləsaica leđa lisrayil.
Rəmwa ndrəlwëɽəṯi musaŋ ṯa aŋabəice rəŋ elo rəlëɽəŋu đəmbrwa eđəpe na aŋəbəiđi ŋawa ano. Nṯia rəmwa ndriđi đəbera ṯa ađəbaiđi ŋawano ŋeđəmbor nḏəŋ đəŋaiciba na đəŋgəbur, ŋen ŋanṯa đađ ađëfeṯe điđiënu iligano eđəmbor.
Na leđa lisrayil ṯalerldo eđəmbor egal yonṯəṯo ŋawa ŋefo alo endrel pređ.
Nṯia rəmwa ndrəŋgəice đaba elo na eđađ ŋen ŋanṯa leđa ləmasr aldəsëice ŋen leđa lisrayil ləməiña. leđa ləmasr laɽi ŋen ṯa alndəlaləñe nḏurṯu.
Nṯia lənëŋulu ṯaɽəteṯo leđa alo lisrayil eđađ iđi đefo eđəmbor, orn rəmwa ndriđi leđa ləmasr ṯa đǝu ađǝlase ano na nǝŋiđi elgaro esen naiyǝnde alo. lǝnëŋulu ldǝraice ole, " obëđor! rǝmwa rabwëñǝđijiđia leđa lisrayil!"
ŋen leđa lisrayil luɽǝđaṯu natǝndi gomǝn gǝđǝmbor, rǝmwa ndraiṯi musaŋ ṯa aŋǝlađi rǝŋano tǝŋ. ŋen gǝŋǝnṯu đəge, nṯia ŋawa nəŋəteđe ṯurrwa đelađa lǝmasr na nəŋwaɽwaṯe egalsoŋësi. Na ṯurrwa pređ đǝmasr nəŋau nəŋəlanəci.
ŋen leđa lisrayil lesaico ṯa leđa ləmasr pređ laiyo, laŋənṯi ŋen ŋərəmwa na landi ŋen ṯa musa gaɽo eđa igi gəɽwata ŋen iŋi ŋiđ aŋela.
Leđa lisrayil cum laŋəreṯe nano ŋen ŋanṯa rəmwa rabərelo eŋəwai! đǝñiđi lənëŋulu lafo məɽəñ ṯa alənanaice rəmwa đamia. leđa lisrayil laləŋe ŋələŋa ŋwaiña ta aliđi đəŋəra nano iđawətëralo na ṯa alənanaice rəmwa đamia ŋen ŋanṯa rənëŋu rabərəlo iṯurrwa đəleđa đə-masr.
Rəmwa ndrəlwaɽəṯi leđa lisrayil ṯa aləŋəreṯe nano iliga ildi ləđaburənia nano inətəliaŋ pređ ṯaləldəŋađinu eŋen iŋi rəmwa riṯəlo eleđa ləmasr na nəŋələmiñi eŋəbai eŋen. lənëŋulu labəđia đəŋəranano eđen eđəɽña ɽruma, ildi lero amərdəđia nano na ldəse ragifra irri rero uđəɽi ano.
đumëđənia ig-ađam : gə-đəməña 12:33-15:21