2.ŋen ŋeicia ŋënṯu alo

Aḏəm na wasen gëləɽəŋu lafo laŋəra nano kaiñ eđəmṯia eđen igrri gəŋəra ŋaiyo igi Rəmwa riṯəlo. Eđa gero gənəŋ iŋəlu ganəjinu ndrenia nano, orn ŋen iŋi ŋero ŋəliđia leđəñia đəñwo nano, ŋen ŋanṯa ŋen ŋeicia ŋafo ŋero eləbate. Lënəŋulu lafo labərnda igrri jaica na ṯalɽwaɽaiđo Rəmwa-ra.

Orn rəmwa reicia igii rafo raləŋeṯo ŋaməɽa. Ndreɽəđe wuji ṯa," ŋen ŋəfo đeṯam iŋi Rəmwa rəlwaɽəṯiŋa ṯa ŋerəṯe agəsa ləđia luɽi gənəŋ elorba alo igria?"

Wuji naŋoɽəbace ole ṯa, "Rəmwa raiṯənde ṯa ñəsa ləđia lənuɽi pređ ilda uɽi gəđələŋeṯa ŋen ŋəŋəra na ŋeicia. Rəmwa ralwaɽəṯənde ṯa, 'ndə ñagəso iđia gakəl, walla ndə ñagəbəro, ñagiđi ñaiye."'

Orn rəmwa reicia naruɽəbiṯi wuji eŋen ṯa," ŋen ŋero ŋəfia đeṯam! Agaber agiđi ŋaiye. Rəmwa raləŋeṯo ŋen ṯa ndə agəso agiđi ŋarneṯe Rəmwa na agiđi ŋaləŋeṯe ŋen ŋaŋəra na ŋeicia garno ŋen rënəŋu rəbəđia."

wuji naŋəseici ŋen ṯa iđia guɽi gakəl gafo gaŋəra ŋaiyo na gaseina game kaiñ. Na gënəŋu gafo gonaṯa com gələŋeṯa ŋen neisi, nṯia naŋəme iđia guɽi elorəb na naŋəse. Nṯia gënəŋu naŋənace ebaŋgen gəmaṯan, igi lafo ldəga, na gënəŋu naŋəse, com.

Na taltal, siano esen nəigəgiđəni, na lënəŋulu lələŋini nano ṯa lafo məɽəməɽeñ ndrenia nerəlo nano. Na lënəŋulu linṯaji ŋen ṯa aldərni raṯaira rənuɽi niwajinu ndrenia.

Nṯia maje na wuji ləne ole gə-Rəmwa rəbərnda igrri, lënəŋulu ntəm lələbəjinṯi Rəmwa. Nṯia Rəmwa ndruntəđi maje," agafo ŋga?" Aḏam naŋoɽəbace ole naŋaṯa, egano agəbərnda igrri nṯia egafo igađəñialo, ŋen ŋanṯa egafo məɽəməɽeñ ndrenia nero ñi nano. Nṯia niləbəjini."

Orn Rəmwa ndrəleɽəđe ṯa," fəsëgi gəlwaɽəṯənde ṯa ñagafo məɽəməɽeñ ndrenia nerənde nano? Ñagənəñaŋ ñagaso uɽi igi igəlwaɽəṯəntu ṯa ñerəṯe ñagəsa? Orn maje nəŋəmuɽəbiṯi eŋen ṯa, wuji igi agənajeñe, gënəŋu gənəjəñe uɽi." Na Rəmwa ndreɽəđe wuji ṯa," agiđu ŋen ŋanṯëu?" Na wuji naŋuɽəbiṯi eŋen ṯa," Rəmwa reica riđiñi ŋađəna."

Rəmwa ndrəiṯi rəmwa reicia ṯa," agabuŋənu! Agiđi ṯəŋarraɽalo araga gəlaɽəŋa na agiđi ṯəŋaso abəɽtua. ŋa na wuji ñagiđi ñageđëiđe eŋen, ñere ñəlaɽeŋa na ñëləɽəŋu ñiđi añəgeđëiđe eŋen, com. Ɖələŋe đwuji điđi ađəŋarməđe ndano laɽeŋa,na aganəŋa agiđi ŋënduđi lwaṯəɽia əllëɽəŋu."

Nṯia Rəmwa ndrəlwaɽəṯi wuji ṯa," agiđi ṯəŋaləŋo ñere ŋenəŋa ŋəbwa kaiñ. Agiđi ṯəŋabwaño ebaŋgalo, na gënəŋu giđi aŋawerṯe ŋələŋe."

Rəmwa ndreiṯi maje ṯa," aganaṯo wuji gəlëɽəŋa na neŋerəṯe agəñəđëñəđaṯa eŋen. Điñiđi alo yabuŋənu, na agiđi ŋiđi ŋəmëɽria ŋəbəɽaŋəno ṯa ŋase ŋəsa. Na agiđi ŋaiye, na aŋəno yəlëɽəŋa yiđi ayoɽəbaṯe iđuđa." Orn maje naŋənci wasen gəlëɽəŋu ṯa Awa, ŋen ŋanṯa " đənaiđia -đaməṯia," ŋen ŋanṯa giđi aŋəɽeṯe ləŋgen gəleđa təmtəm. Na Rəmwa ndranice Aḏəm na Awa ndrenia nano nënërua nəđwala.

Nṯia Rəmwa ndraṯa, "ŋen ŋanṯa điñiđi leđa ildi larnëndr eđələŋeṯa ŋen ŋeŋəra na ŋeicia, lënəŋulu laber liđi aləŋgəni ṯa aləse iđia guɽi gəđəmaṯia na aləməṯe bəɽəbəte." Nṯia Rəmwa ndrəđwaṯe Aḏəm na Awa igiri ndëuer igi geŋəra kaiñ Gaḏan. Rəmwa ndrəɽi məlaiyəka eləbe yaḏan ṯa ayərəmuṯe irria ṯa eđa gənəŋ aŋerəṯe gəsa iđia guɽi igi gəđəməṯia.

Ɖumëđənia eg-ađam: gəđətođalo 3