32. Yesu geiđi maje igi nusila neicia nanṯəmawu na wuji gǝɽǝbwa guma.

Eloman lənəŋ,Yesu na Ṯaləmis yəllëɽəŋu nəlënṯi iđəpundr ṯa aluɽəđëṯi alo nëṯəndia gomən gađəbarnda đirnuŋ igi leđa ləfo Ləgarasayin.

ŋen luɽəđëṯu eđǝbarnda nëṯəndi gomən,eđa gənəŋ igi usila gënṯəmawu geicia naŋeṯa Yesu nano gəlëldiñia.

Maje igi gafo gonṯoṯo eđa gero gənəŋ gaɽëwađaṯomau ṯa aŋəmariđi.Leđa lafo lakasəma rəŋ na rəmanəña nduriđəna na naŋëluguɽiđi ano.

Maje igi gafo gafo alo yəndərlnda.Maje igi gafo gǝrəjaica ole jaica ëđəñëđəñin na uləŋgələŋ.Gënəŋu gafo gero gəbaɽənia ndrenia nano na ṯaŋgəlnu aŋəno guguɽəbainia nano ŋwandraŋa bəɽan.

Ndǝ maje geṯo Yesu nano,naŋəmiɽiṯi ndrianalo ŋu nëñua.Yesu naŋeiṯi usila geicia ṯa,"məñiaŋ emaje igi!"

Maje igi gerṯo usila nano geicia naŋare olǝga pəlelo,"agañonaṯa wande nano,Yesu,Iđia Gǝ-Rəmwa irri Roɽra Elo? egaŋeɽəđia ṯa ŋerṯe agǝñəmwađialo!"Orn Yesu naŋeɽəđe usila geicia ṯa, "agëbərnia əsëgi?" na gënəŋu nəŋəmuɽəbiṯi eŋen ṯa,"igëbərnia Lijun,ŋen ŋanṯa ñagwañia."("Lijun"gafo gaɽo laɽo lasəkari garəno aləf ndređia nwaiña eleđa Ləroma.)

Nusila neicia neɽəđe Yesu,"ŋəbaiyəŋa ṯa ŋerṯe agendəđwaṯa ndëuwr alo irnuŋ igi !"Lṯura lafo ləsa eɽo aiyən nano.Naṯia,nusila neicia leɽəđe Yesu ŋəbaiyəŋa ṯa,"Ɖwaḏənde ilṯura garano ñagonaṯa!"Yesu naŋaṯa,"mbur!"

Nusila neicia nəməñe emaje nəlënṯi ilṯura.Lṯura ndandəñəṯe egal yoleno eđəparnda na ŋau naŋəlape.Lṯrua lafo laɽo aləf eređia gǝɽijan.

leđa ildi lafo lərəmoṯua lṯrua ldəseci ŋen iŋi ŋiđənu,ldobəđaṯe alo irnuŋ ldəlwaɽəṯi leđa pređ ŋen iŋi Yesu giđu.Leđa lirnuŋ gagəl ndela ldǝseci maje igi nusila neicia niđima ŋađəna.Gënəŋu gafo gaɽaŋa alo aten,gancinu ndrenia nano,na ṯaŋiđu ŋen ŋarəno eđa gəpi.

Leđa lafo ldǝđəñia alo kaiñ na leɽəđe Yesu ṯa aŋəɽe.Naṯia Yesu naŋënṯi iđəpundr na naŋəṯuɽəđaini ṯa aŋəɽe.Maje igi gəfo gerṯo nusila nano necia naŋeɽəđe Yesu ṯa aləgəɽe.

Orn Yesu nəŋəmeiṯi ṯa,"Ndo,egaŋonaṯa ṯa ŋaɽe eɽa na ŋəlwaɽəṯi rappa na leđa egeɽa gəllaɽəŋa eŋen pređ iŋi Nd-Rəmwa riṯiaŋa na eŋəbaiye iŋi rënəŋu rǝgeiyacaŋa nano."

Naṯia maje nagabəla naŋǝluwaɽəṯi leđa pređ ŋen iŋi Yesu giṯəma.Leđa pređ ildi ləno đumađənia đəlëɽəŋu naloɽəđaṯe elo na ŋen nəŋəlajəbinṯi kaiñ.

Yesu naŋoɽəbaṯe alo yomən aṯəndi nano gəđəbarnda.Ndə gënəŋu gərmaṯo tu,leđa lwañia ldǝmarraiđe nano na ṯaləmabərndađo ŋu nano. Na uji gafo gənəŋ gəɽəbwa gəmuwađo alo ŋen ŋəfəni ŋəmuruwa nano garəno nṯəlia ndəređia ređ na nəɽəjian.Naŋəbəɽəđe algurus isi nəgerəṯəlo pređ eleđa ildi ləbərnṯainia ŋenŋa ṯa aləmeiđi gəŋəra təŋ.Orn ganəŋu ṯaŋəməñiađaṯo nañua ŋenŋa ŋeicia.

Gënəŋu naŋəne eŋen ṯa Yesu gafo geiđi leđa luma lwaiña na eŋṯɽa,"igantu ŋen đeṯəm ṯa ndə egbra erenia pipi Gi-Yesu,naṯia igiđi ñiabərđi, com!"Naṯia naŋeleđeṯa Yesu ilaɽwa na nəŋəmabəraṯe ntrenia nəlëɽəŋu nano.Na tatal ndə gəbrndo,na ŋǝƒǝni ŋiruwa naŋəđuri!.

Nataltal,Yesu naŋələŋeni nano ṯa ŋabəɽa ŋaməñəmau ŋǝđeiđia.Naṯia naŋəređe alo na naŋeɽəđe,"əsëgi gabəriñe?"Na Ṯaləmis yəlëɽəŋu naloɽəbace ŋen ṯa,leđa lwaiña laɽəđaṯaŋa eɽo na ṯalŋaṯərnaiđo nano,ŋen ŋauwante nabeɽəđia ṯa, əsëgi gebəraŋa?"

Na wuji naŋwođəñiṯe Yesu nañua ntrianalo,gǝgəđia aŋəno kaiñ na gəđiñia alo. Na wuji naŋəluwaɽəṯi Yesu ŋen giṯəma,na ṯa geiđinu.Yesu naŋəmaiṯi ṯa,"đonaṯa đəlaɽəŋa đeiđiaŋa.Mbu iđëuṯaralo."

Ɖumađənia igañjil E_Maṯṯa 8:28-34;9:20-22;Margos 5:1-20;5:24b-34;Luka 8:26-39;8:42b-48