18. Đarənieđe đəŋələŋe
Ndə nəṯɵliaŋ nebəɽo nwaiñ, Ḏauḏ nəŋaiye, eđia gəlëɽəŋu seleman ŋətođe gəbërəndia leđa lisrayil. Rəmwa ndrəlwaɽəṯe saleman na ndrəmeɽǝđe ṯa ŋen ŋawənde iŋi agonaṯa iñi ṯa iŋiṯi đurri. ŋen saleman geɽəđo đələŋaṯa ŋen nəsi, Rəmwa ndrəmaŋəreṯe nano na ndrəmiđi geɽo eđa geləŋeṯo ŋen nəsi alo pređ eləbate. Saleman nəŋəlëŋeṯe ŋen ŋwaiñ na ŋəɽeṯe eđa geləŋeṯo ŋen nəsi eđagəma. Rəmwa ndrəmiđi gerṯo laŋge lwaiña.
Alo Yursalim, Saleman naŋwađe alyakəl isi eṯen gëləɽiŋu Ḏauḏ gəfo gəɽəṯu ŋen na nəŋërəreiđi laŋge ildi ləŋəmaɽria. Na leđa ṯalukuwđəñəṯu Rəmwa alo na ṯaliṯu điɽəđənia ekaləyakel gerṯa iləṯu ildi leđərareiđia. Rəmwa ndrela na ndrəfeṯe ekalyakəl, na ndrəfeṯe tu leđala lënəɽəŋu.
Nəṯia Saleman ṯaŋəbwaño wuji gəfo irnuŋ gərto. nəŋerṯe gađəñađəṯa Rəmwa eŋen na naŋəme liji lwaiña, garno ndređia eredia ređ! Liji lwaiña eŋulu leṯo irnuŋ gerto na leṯo imwaiya esen na taləməñađaṯo nəñwaŋ eđukuwđəñṯia eđen. ŋen Saleman gəɽoṯəti, na com ṯaŋukwuđəñəṯu imwa alo.
Rəmwa rafo racətu Saleman ano na, garno ŋen ŋəfua ŋəsaleman iŋi ŋəbaŋəiđia ṯa Saleman gero gəđëña Rəmwa, rënəŋu ndrəgase ŋen ta arënəđe irnuŋano Gisrayil aŋəɽeṯe ŋələŋ ŋəɽijan iliga Saleman gaiyo.
ŋen Saleman gaiyo đəge, eđia gənəɽəŋu, Rəboam, nëŋəɽeṯe eləŋ. Rəboam gafo gaɽo iɽəṯiano. Leđa pređ lirnuŋ Gisrayil leṯo ləɽo ṯa aləlëŋeṯe ŋen ŋeləŋ. lǝnǝŋulu ndǝmǝlǝwɽiṯi ta saleman gǝliđia ŋǝmǝɽria ŋǝwaiña na ṯǝlǝmanǝnǝjio tulba
Rǝboam ŋǝɽǝṯianoŋa nǝŋǝluɽibiṯi eŋen,"ñǝgǝru ŋen ṯa papa ŋǝlǝɽiñi saleman giđiende ŋǝmǝɽria ŋǝbwa, igiđi indiđi ŋǝmǝɽria ŋǝwaiña ŋǝmǝñǝito orǝba , nṯia igiđi lndǝnǝjie ŋen ŋǝbwa ŋǝmǝmëñǝṯo orǝba ganuŋu ganǝjiende ."
đǝlǝŋia ređ đǝleđa lirǝnuŋ gisrayil nǝleđe ŋen ŋǝ-Rǝboam . Ilia đǝlǝŋa đǝlǝɽǝjian đafo đerṯe đonaṯa iŋu. Đǝlǝŋia iđi đëɽijian đǝɽiṯie leđa lǝŋǝlǝŋe ŋalo yaudyia .
leđa ildi lëđalǝŋia iđi đǝɽo ređ đirǝnuŋ gisrayil iđi đǝniđo ŋen ŋǝ- Rǝboam nǝlǝwaṯe maji gǝbǝrǝnia Jeroboam ŋen ŋanṯa ǝŋǝɽǝṯe elǝŋe egen . lǝnǝŋulu nduṯiđi ŋǝlǝŋe ndeleyia nḏëɽe đǝmǝṯan đǝlǝbaṯia na nǝlǝniji ŋǝlǝŋe ŋisrayil .
Rǝboam nǝŋǝneđi rǝmwa na nǝŋiđi leđa ṯa liđu ŋen ŋacia. Nǝlǝwǝđiṯi ŋǝmborǝđa ŋǝɽijan ṯa leđa aluguđiti alo gamǝñaṯo ŋen ṯa aluguguđiṯi rǝmwa alo eɽa eŋǝlǝŋe ŋalo yauḏiya
Eŋǝlǝŋe ŋalo Yauḏyia na ŋesrayil ləɽeṯe aməcu na jeica jeica .
Orn eŋələŋ ŋəmajin ŋəleđa lisrayil. Nələŋ pređ nafo nabəđia ŋen ŋeicia. Nələŋ ini nafo nwaiña neɽəñino leđala lisrayil ildi lonaṯa ṯa aɽeṯe nələŋ ṯau.
Nələŋ ini pređ na leđa ləmaṯan eŋələŋ ŋisrayil talukwuđəñito ñəmbrođa alo. laŋge ildi ləlukwuđəñitia alo fəŋulu ŋen iŋi ŋətaŋa ŋwaiña ŋoɽwa na đəniđia ŋere ŋəɽo điɽəđənia.
Nələŋ nalo Yauḏyia naɽo đələŋe đə-Ḏauḏ. Iŋulu ləmaṯan lafo lađərwaṯo eŋen eđerlde leđa na eđəkwuđəñiṯia Rəmwa alo. Orn nələŋ nwaiña nalo Yauḏyia nafo nacia na naber naɽəwađiđia ŋen ŋəleđa na lukwuđəñiṯia ŋəmborəđa alo. Nələŋ nəmaṯan nabəđia đeɽəđinia ñereña eñen ismwa isi yəbaino. eleđa layauḏyia cum laneđo ŋen ŋərəmwa na lukwuđəñiṯia ŋəbrwađa alo.
Đumëđənia eg-ađam : 1 G-ənələŋ 1-6; 11-12