47. ŋen Bolis na Sila ləfo alo yə-Filibus

Ndə polis gəbɽo alo eŋələŋ ŋə-Roma,ganəŋu naŋanəjini irəŋ gə-leđa lə-Roma,"polis."Eloman lənəŋ,Polis na đappa đəlaɽiŋu Silas naləbɽe slo Yi-Filibi ṯa aləbɽe alarəŋeiđi ŋen ŋəmajein iŋi ŋəŋəra ŋi-Yesu.Lanəŋulunaləbɽe alo đəparnda nano alo isi leđa ləuwəraraiđia ṯa alṯaṯurṯi Rəmwa.Lanəŋulu nalobəđaeđe wujiga gəbarniya Liḏiya igi gəfo gəṯwajia leđa laŋge.Ganəŋu gafo gabwa ŋenəŋa ŋə-Rəmwa na ṯaŋukwuđəñiṯu alo.

Rəmwa narəgiđi arra gə-Liḏiya ṯa aŋəne ŋen ŋi-Yesu,na ganəŋu ləneini Mamuḏiya eɽaga gəlaɽiŋu.Ganəŋu naŋeɽəđe Polis na Sila ṯa alɽaŋe lda egeɽa gəlaɽiŋu,naṯia lanəŋulu ləɽaŋe lda.

Polis na Sila lafo lorəbəđaeđia jiajia leđala ṯa alṯaṯurṯi Rəmwa.Eñoma pređ lanəŋulu lafo labərndeṯa alo,yəŋere ŋəɽo ibai giɽindiya.Garno ŋen pređ iŋi ŋənusila neica, ganəŋu naŋagəɽi ŋen ŋobe ŋalgurus ywaiña garəno ŋəfo ŋəlwaɽənuṯu eləŋ.

ŋere iŋi ŋəɽo ibai ŋafo ŋarəjiaca ole ŋen ləbərnda,"Majande ildi lafo laɽo ləbai lɽ-Rəmwa iri roɽra elo.Lanəŋulu lantəɽwaɽəṯia eŋen ŋəđbərniya!"ŋere iŋi ŋabəđia ṯia jiajia naṯia Polis naŋerəṯe gəŋəra nano.

Naṯia eloman lənəŋ ndə ŋere iŋi ŋəfo ŋəɽo ibai gənusila neica naŋədođe ŋərəjiajia ole,Polis naŋəređe alo na naŋeiṯi nusila ṯa ini nəfo eŋere,"Irəŋga gi-Yesu,məñia eŋere iŋi."Natalta usila geica naŋəməñe eŋere.

Maje igi gəfo giđu ŋere ŋəɽo ibai naŋeiciṯi ano kaiñ! Lanəŋulu naləŋeini nano ṯa ndə nusila neica nero,ŋere iŋi ŋəɽo ibai ŋaber ŋiđi aŋəlwaɽəṯi leđa ŋen iŋi ŋiđi aŋəfeṯe.Naṯia iliga ildi leđa laber liđ alənaeđe algrus esen ŋen ŋanṯa ŋanəŋu ŋiđi aŋəlwaɽəṯi ŋen iŋi ŋiđi aŋəfeṯe.

Naṯia leđa idi ləŋere iŋi ŋandənu ŋenəŋa ŋeica naləndi Polis na Sila alo eŋələŋ ŋə-Roma,ildi lbəlo na naləɽi alo sijin.

Lanəŋulu ləɽi Polis na Sila sijin isi yuɽajinu nano ŋobe na lanəŋulu naləgagəsini rəmaniŋe.Naṯia məldi uləŋgi ano gakəl,Lanəŋulu lafo labaləŋa ŋaləŋa ŋəđənanajia Rəmwa nani.

Na taltal,ləbate nalədasëni lwaiña ŋəma! ŋəpe pređ ŋiur yasijin nayəgageiđini,nadruiđa pređ ini ləfo ləgaseiniliya naluguɽi.

Leđa ildi ləfo lənwana sijin nalətođe,ndə ŋen ləseicu ŋen ṯa iur yagagiđəu,ŋen naŋəmajibinṯi! ganəŋu naŋëɽi ŋen eŋəṯəɽa ṯa aŋgaje leđa lagabro,naṯia ganəŋu naŋəɽi ŋen ṯa aŋəɽiñini bɽan.(Ganəŋu galəŋeṯo ŋələŋe ŋə-Roma ndə gəŋgiṯu leđa landənu sijin ldobəđe.) Orn Polis naŋəmanwane naŋəraje ole naŋaṯa, ṯru! "ŋerəṯe agəgera aŋəno. ñëgəni ëli pređ."

Maje igi gənwana sijin naŋəbɽe Polis na Saol nano gəkəđiya aŋəno naŋəleɽəđe ṯa."Igəbđia ṯau ṯa ñiabərni?" Polis naŋəmuɽibiṯi eŋen ṯa,"Ëndu ŋen ŋi-Yesu,igi gəɽo eləŋ,ŋa na eɽe gəlaɽeŋa ñiagiđi ñiabərni."Naṯia maje igi gəfo gənwana sijin naŋəmamaṯe Polis na Sila egeɽa gəlaɽiŋu na naŋəlwasaje irëɽi.Polis naŋəlarəŋeiji ŋen ŋəmajen i-Yesu egeɽa egen.

Maje igi gəfo gənwana sijin na eɽe gəlaɽiŋu naləndi ŋen ŋi-Yesu na lanəŋulu lənaneini Mamuḏiya.Ganəŋu naŋənaje Polis na Sila acəba lanəŋulu ləse na ləŋəreṯe nano eɽo.

Eloman lomən nələŋ nalo yirənuŋ gakəl naləŋeini nano ṯa Polis na Sila ildi ləfo landənu ṯa aləŋgaṯe alo yə-Filibi.Lanəŋulu naləfəldëji Liḏiya na rappa rəmaṯan iri rəlaɽiŋu naṯia lanəŋulu naləŋgaṯe alo irənuŋ gakəl.Naṯia ŋen ŋəmaje i'ŋi-Yesu ṯaŋəlalađənu ano,naṯia leđa ṯalətuđi aliyayikəl.

Polis na leđa nələŋe nəmaṯan nəkanna nalerəndeṯe irənuŋ gwaiñia,ṯalɽwaɽiṯu leđa na ṯalərəŋeicu ŋen ŋəmajin ŋi-Yesu.Lanəŋulu naləwërđi nabređa nwaiña ṯa aləbɽe leđa nano na alarǝŋeji ŋen ildi ləndu ŋen ŋi-Yesu ekaliyayəkəl.Nabređa ini nəmaṯan naɽo ađam getəɽe.

Đumëđənia egađam:Gəŋəmaɽria 16:11-40