28. ŋen ŋəđəmwa igi gerṯo laŋge lwaiña

Eloman lənəŋ, eđa gəɽo eləŋ geṯo Yesu nano nəŋëɽəiđe," eđa geŋəra gebərrəŋëiđia ŋen, igabəđia ṯau ṯa ñerṯe đəmaṯia đəbəɽəbəṯe?" Yesu naŋəmaiṯi," ŋen ŋanṯau ageiñurrəndiđia eđa geŋərra? Eđa gani gonto igi gibacinia ṯa gaŋərra, na fəŋu Rəmwa. Orn ndə agonaṯa ṯa ŋerṯe đəmaṯia đəbəɽəbəte, rəmoṯo alganun isi Yerəmwa."

" Fəŋ yaŋga isi igiđi erəmoṯe?" gənəŋu neŋəɽəđe. Yesu naŋəmuɽəbiṯi eŋen naŋaṯa," ŋerṯe agəɽiñiđia.ŋerṯe ageɽəŋa leđala leɽrto. ŋerṯe agəbëđia ŋəɽoma. ŋerṯe ageɽa wen. Buwiṯu eṯaloga na ləŋgalo,na buwiṯu eđaga igi geɽo euwër eləɽəŋa ŋen ŋarno etam gələɽeŋa."

Orn eđa geta ŋəmiṯi ṯa," igarəmoṯo ŋen iŋi pređ ŋen igeɽo umia. ŋen ŋanṯau iŋi ŋebwiñinia ṯa eməṯe bəɽəbəṯe?" Yesu naŋəmasici na naŋuiybwiṯi.

Yesu naŋaṯa," ndə agonaṯa ṯa ŋaɽeṯe agëɽəiñiđiđo, mbu na ŋaṯwi laŋge pređ ildi agerṯəlo na ŋənanəci leđa grus ildi leɽo ŋəbaiŋəno, na agiđi ŋerṯe laŋge elo lwaiña, na ŋela ŋañitete."

ŋen eđa geɽo eləŋ gəno ŋen iŋi Yesu gələwəɽəṯəma, naŋeiciṯano kaiñ, ŋen ŋanṯa genuŋu gwaiña laŋge na gero gonaṯa ṯa galənanəcia leđa laŋge gerṯəlo. Orn naŋəređe alo na gabla.

Orn Yesu nəŋəlwaɽəṯi leđa ildi leɽo ređ ṯa," ŋen ŋabəɽwaŋəno ṯa leđa ildi lerṯo laŋge lwaiña alënṯi eŋələŋ ŋelo! A, ŋen ŋobwaŋəno ṯa ndə đëuri đəbenṯia iđəɽi đalibri ŋamiñaṯo ŋen eđa igi gerṯo laŋge lwaiña aŋənəṯi eŋələŋ ŋərəmwa."

Ndə leđa ildi leɽo ređ lano ŋen iŋi, lurəwano kaiñ laṯa, ndə ŋen ŋafəṯia əsëgi gaɽəwađaṯa gëbərnia?"

Yesu naŋəseici leđa ildi leɽo ređ na naŋat̄a," ŋenəŋa ŋəleđa ŋen ŋabəɽaŋəno, orn ŋenŋa ŋərəmwa, laŋge pređ laɽwađəṯia."

Butrus naŋeṯi Yesu ṯa," ñagaŋgiṯu laŋge pređ na nəñaŋəɽateṯe.Wandeigi giđi aŋəɽeṯe đəbəɽa eđaiñ?"

Yesu nəŋəlweɽəbiṯi eŋen," leđa pređ ildi laṯađo neɽa, lorba,papanda, laŋgen,ñere, walla laŋge lələɽəŋu ŋen ŋanṯa iñi, giđi aŋənini ñoma ndređa ređ na lomən đanəŋ na giđi aŋənəjini đəmaṯia đəbəɽəbəṯe. Orn leđa lwaiña lendərṯu liđi alɽeṯe ləneiñwa."

Đumëđənia ig-ađam: Maṯṯa 19:16-30; Margus 10:17-31; Luka 18:18-30