7. ŋen Rəmwa rabuŋṯu Yagub.

ŋen ləmmia loɽra egaŋəno, Yagub gafo gaɽəŋa egeɽa, orn Isu gafo gabərndeṯa eŋapëw. Riab gabuwa Yagub-ga, na Isag gabuwa Isu-ga.

iliga lənəŋ, ŋen Isu goɽëpođo eŋapëw, gafo gacoña kaiñ. Isu nəŋəlwaɽəṯi Yagub ṯa, "najəñi aciəba gəmən igi agiđu." Yagub nəŋəmuɽəbiṯi eŋen ṯa, nəñwaŋ, nəjəñe ŋen iŋi ŋəbəŋiđia ṯa agoɽra." Nṯia Isu naŋənaice Yagub ŋen ŋarno gënəŋu gəlwaɽo. Orn Yagub nəŋəmanice aciəba.

Isag gafo gonaṯa ṯa ǝŋənəcie Isu đəbwaŋətia đəlëɽəŋu . ŋen gəmulu nəŋiđia nṯia , Rəbeka na Yagub ndëmiđi ŋǝməɽa na Yagub nǝŋiđi garno Isag . Isag gafo gaɽo uṯəɽi na gaber gasiđia ŋopia. Nṯia Yagub nəŋǝɽini erena nano gisu, na đərëna netam na ndrəŋ rëləɽəŋu .

Yagub geṯo Isag nano naŋəmëiṯi ṯa ," fiñi Isu . Egeṯo ṯa ŋañəbuŋṯi" . Orn ŋen nəŋiđi Isag egaŋəno ŋarno walla gorəldo na nəŋǝmëjini erena , na nǝŋǝɽi ŋena ta fagənǝŋu Isu nǝŋǝmǝbwuŋiṯi .

Isu nǝŋǝniđi Yabub ŋen ŋǝnṯa Yagub gǝlëwǝjima ŋen ŋǝđǝrǝwaṯu garno umiya goɽra na đǝbǝwëŋiṯia đǝlǝɽëŋu . Na gənŋu nǝŋǝɽi ŋena ṯa aŋǝɽañi oreba ŋena eṯen gaiyo.

Orn iliga Rebeka gəno eđǝgǝɽiya ŋen ŋisu. ŋǝŋu na Isag lǝwǝđaṯe Yagub irǝnuŋ nəwaldaŋ ṯa alǝɽǝŋe ṯu leđala lǝlëɽǝŋu .

Yagub nǝləɽëŋe leđala lǝɽ-rebeka nǝṯǝlaŋ nǝwaiña . Iliga lǝgal ganǝŋu nǝŋëmađe na nǝŋǝlǝŋe lamiya ređ na lǝɽijan na ŋere ŋǝɽo ubwa. Rəmwa ndǝrmiđi gǝwaiña đawǝla kaiñ .

ŋen Yagub gëɽǝñǝđəṯo nṯǝlia eređia gǝɽijan irǝnuŋ galo-yǝkanan , gënəŋu nǝŋoɽəbaṯe irənuŋ gëləɽəŋu đǝlǝŋeđa ,na ləbaila lënəɽəŋu, na đowala pređ đëlǝɽǝŋu.

Yagub gafo gađǝñəlo na gafo gëɽǝu ŋen ṯa Isu gwonaṯa gǝmǝɽaña məldin .Nṯia nǝŋođǝwaiciṯi Isu đǝwala đwaiña garno đǝnǝcia: lǝbai ildi lamamo đǝwala laiṯi Isu ṯa,"ibai gëlǝɽǝŋa yagub, gǝnǝcaŋa đǝwǝla iđi .Gǝnǝŋu gëtu gaṯo ram."

Orn Isu gafo gǝŋgǝđǝcu Yagub ŋen ŋǝlǝɽǝŋu ŋeicia, na lafo lafo laŋǝra nano ṯa alǝsiđi tǝŋ. Nṯia Yagub nǝŋǝɽǝŋe irǝnuŋ gǝ-kanan iđǝwëṯǝralo .Ntia Isag nǝŋaiye ,na Yagub na Isu nǝlǝmauri .Nṯia đǝrrëiđia eŋen iđi ndrəmwa rǝɽǝṯu ibrayim nǝđǝŋgaṯe Isag nano na nəđəməlađiđe Yagub nano.

Đumëđənia igađam gəđətođalo 25:27-33:20