31. ŋen Yesu gerldo nəŋau

Orn Yesu nəŋəlwaɽəṯi leđa ildi leɽo ređ ṯa alënṯi iđəpundr na aluɽəđe eđəbarlda aluɽəđaṯe nəṯəndi gomən na naŋəđwaṯe leđa ləmateṯa alo. ŋen Yesu geđwaṯo leđa đəge, gənëŋu nəŋabəṯe aiyen nano ṯa aŋəṯurṯi Rəmwa. Yesu gafo ṯu gonto, na nŋəṯurṯi uləŋgi ŋəɽe.

Nəṯia đəge, leđa ildi leɽo ređ ṯaluɽəḍe đəpundr eđen, orn uləŋgi iligano ɽrəmaṯe đəbarlda iligano. lenëŋulu lafo eŋen ŋapəɽaŋəno ŋen ŋanṯa đəbera đura đəlëkoɽəbaica nḏruṯu.

Orn ŋen Yesu gaṯəṯurṯu Rəmwa na nəŋəwaɽobaṯe leđa nano ildi leɽo ređ. gënəɲu ṯaŋerldo nəŋau eđəpe eđəbarlda gemiñađaṯa đəpundri nano.

Leđa ildi leɽo ređ lafo lađəñialo ŋen ləsaicu Yesu, ŋen ŋanṯa lafo lasəica ṯa gaŋgaice usilagi. Yesu gafo galəŋato ṯa lënəŋulu lađəña, nəṯia nəŋəlundəđi na nəŋaṯa," ñerṯe ñagiđəñalo. Fiñi!"

Nəṯia Buṯrus nəŋaṯi Yesu ṯa," eđa gəlëɽəñi, ndə fəŋa, luɽəṯiñi ṯa eŋeṯa nano eŋau." Yesu nəŋəlwaɽəṯe Botrus ṯa," elaŋ!"

Nəṯia, Botrus nəŋwaɽeṯe iđəpundr na taŋerldo nəŋau gemña Yesuaŋ nano. ŋen gəbrogwađaṯo nəñwaŋ aten, naŋəriđi sei alo Yesuaŋ nano na ṯaŋəsaicu ŋaua na ŋəma ŋəđəbera

Nəṯia Botrus nəŋəđəñitialo na na ṯaŋənṯo eŋau alo. Ganəŋuŋ nəŋwađe eŋwal," eđa gënəɽəñi, abəreñi!" Yesu nəŋwaləniano na nəŋemandia. Gënəŋu nəŋati Botrus ṯa," ŋa ŋaŋgi agerṯo đonaṯa đəta, ŋen ŋanṯu agëgərđo?"

ŋen Botrus na Yesu leməño eđəpundr, đəbera ramram nəđerṯe đura na ŋaua ŋerṯe ŋatəsina. leđa ildi leɽo ređ ŋen ŋaləjəbenṯi. Lanəŋulu lukwađəñiṯi Yesu alo, lemaṯi ta," đeṯəm, agaɽo eđia Gərəmwa."

Đumëđənia ig-ñjil: Maṯṯa 14:22-33; Margus 6:45-52; Yuanna 6:16-21