9. ŋen rəmwa rundəđu Musaŋ
Ndə Yusəf gaiyo, leđa pređ leɽa gəlëɽəŋu laɽəŋe alo Yə-masr đəge. lenəŋulu na đələŋia đəlëɽəŋu ldəborgəđaṯe nəñwa ṯa alëfeṯe tu nətəliaŋ nwaiña na ṯa alerəṯe ñere ñwaiña. Na lənëŋulu lənəjini ṯa leđa l-Israyil
Ndə nṯəliaŋ nəbɽo ndređia ređ, leđa l-Israyil ṯaləməñiano lwaiña kaiñ. Leđa ləmasr lderṯe leləldëŋəđainia eŋen ŋǝnŋ iŋi Yusəf giṯǝlo eđamađaṯa eđen. Lǝnëŋulu lafo lëđiñia leđa lisrayil ŋen ŋanṯa lafo lwaiña kaiñ. Nṯia Fero igi gəfo gəbërndia leđa alo Yə-Masr iliga nəgiđu leđa l-Israyil ləɽo ləbai eleđa lə-Masr.
Nṯia leđa lə-Masr ləṯərnađaiyəđe leđa lisrayil ṯa alabəđe neɽia nwaiña na irənuŋ goɽra. Điđia ŋəmaɽria eŋen iŋi ŋəbəɽaŋəno naŋiđi đəməṯia eđen đobano, Orn Rəmwa ndrəlabuŋiṯi pređ, na lənëŋulu lerəṯe ñere ñwaiña.
ŋen Fero gəsëcu ŋen ṯa leđa l-Israyil lafo lerəṯo ñere ñwaiña, nṯia ganəŋu naŋənaiyəđe ŋen eleđa əllëɽəŋu ṯa aləɽəñe ñere pređ ñəleđa l-Israyil iñi ñəɽo lɽrowaŋ ṯa aldaruṯi eđəbərnda đə-nil.
Wuji gənəŋ eleđa l-Israyil naŋələŋe ŋere ŋəɽorrwaŋ. Wuji na ebaŋgen gəlëɽəŋu lobace ŋere iliga lwalano ŋen ŋarno liđu.
Iliga leđa ildi lerəṯo ŋere lero ləɽwađaṯa eŋen ṯa alobəce, lanəŋulu ləmaɽi ejakəṯaiya yelala nəŋau eŋaiña alo đəparnda nano đə-nil ṯa aŋerəṯe gəɽeiñinia. Orn orəba gəlëɽəŋu igi gəɽo ubwa gafo gasecia ŋen ṯa ŋiđi aŋəfeṯe ṯau iŋu.
ŋere ŋə-Fero ŋasëcu jakəṯaiya na naŋonanəđe. Nṯia nəŋənwano ŋere naŋəmape na naŋiđi gəlëɽəŋu. Naŋəmanace wuji gəɽo Israyil ṯa aŋəmađuɽi ŋen ganəŋu gero gələŋinia nano ṯa ləŋgen galəɽəŋu. ŋen umia goɽra đəge ganəŋu naŋerəṯe gonaṯa ŋan ŋələŋgen təŋ ṯa aŋəđoɽe, ganəŋu naŋəmuɽəbiṯi ŋere ŋə-Fero, iŋi ŋanəjima ṯa Musa.
Iliga ildi Musa goɽra đəge, ganəŋu naŋənwane eđa gəɽo Masr gəpwa Israyil isi yəɽo ibai. Na Musa ginṯacu ŋen ṯa aŋapəri orəba igi gəɽo Israyil.
ŋen Musa gəsëcu ŋen ṯa eđa gero gənəŋ gəmasëica, ganəŋu naŋəɽəñe maje gəɽo Masr na naŋagađaṯe aŋəno yəlëɽəŋu. Orn eđa gafo gənəŋ igi gəsëicu ŋen iŋi giđu.
ŋen Fero gəno ŋen iŋi Musa giđu, ganəŋu gafo ginṯëcu ŋen ṯa aŋəmaɽəñe. Musa naŋobəđe alo yə-Masr naŋəɽe alo eđəñua alo isi ṯruwa đerau iđi đə-Fero.
Musa naŋəɽeṯe eđa gəsiya yaŋala eđəñuaŋ nowaldaŋ alo yə-Masr. Gənëŋu naŋəme wuji galo isia na naŋələŋe ñere ñəɽəjian.
Iliga lənəŋ ŋen Musa gəfo gərəmoṯa yaŋala yəlëɽəŋu, ganəŋu naŋnuwane uɽi gewoɽa sianano. Orn uɽi gero gəpəndia sia. ŋen Musa gəsëcu ŋen iŋi nəŋuwajəbinṯi. ŋen gəpəɽo ṯuwñ ṯa aŋəsëci ŋen iŋi, naŋəne ole geləŋ Rəmwa igi gaṯa, Musa, miñeinu nḏəbina. Alo isi agəđərwu yatəɽe.
Rəmwa ndraṯa,"igasëicu ŋen ŋubwa ŋəleđa əllëɽəñi. Igiđi eŋađwaṯe Fero nano ṯa aŋəmiñi Israyil isi yeɽo ləbai alo yə-Masr. Igiđi elənace alo e-Kannan, alo isi igəlwaɽəṯu Ibrayim, Isag na Yagub."
Musa geɽəđo Rəmwa,"Na ndə leđa lonaṯa ṯa laləŋeṯa əsəgi gəđuwaṯəñe, igiđi elowaɽe ṯau?" Rəmwa ndrəmalwaɽəṯi ṯa, "FƎÑI ƎSËGI ÑI. Luwaɽəṯəlo ṯa,'FƎÑI fəŋu gəđuwaṯeiñe ŋa nano. 'Na com lowaɽəṯəlo fəñi Rəmwa, 'Rəmwa iri rəpapanda Ibrayim, Isag, na Yagob. 'Fəŋu irəŋ gəlëɽəñi bəɽəbəte."
Musa gafo gađəñialo na gaber gonaṯa ṯa gabəla Fero nano na gafo gasëcia ṯa gaber giđ ŋəɽwate ŋope, Orn Rəmwa ndrundəđi orəba gəlëɽəŋu Aron, ṯa aŋəmuamađaṯe. Rəmwa ndrəgërəñiaṯe Musa na Aron ṯa Fero giđi aŋinṯëini.
Đumëđənia ig-ađam :gəđəmaiña 1-4