16. ŋen ŋəđabriya
Ndə Jasua gaiyo,leđa l-Israyil lderəṯe ləđəñiyađəṯa Rəmwa eŋen orn larəṯe ləpaŋëjia leđa ŋen ləmaṯan ildi ləleđa lǝ-kanaan walla ṯa aləđəñiyđəṯi Rəmwa eŋen iŋi ranəŋu rənacəlo ṯa aldateṯe.Leđa l-Israyil ṯalukuđəñiṯu imwa alo isi yəleđa lə-kanaan rəməñiaṯo Yauwe,Rəmwa irri rəɽo đeṯəm.Orn leđa l-Israyil lderəṯe ləperṯa eləŋe,naṯia lanǝŋulu ṯaliđu ŋen iŋi lanəŋulu laɽənu eŋəṯəɽa ṯa ŋafəlo nano ŋope.
ŋenŋanṯa leđa l-Israyil lafo lero ləđəñəđəṯa Rəmwa eŋen,ranəŋu naŋəliđi lëpia ṯa leđa ləɽo amëcu egen aldəđame.Leđa ildi lǝɽo amëcu gəleđa l-Israyil ləlalɽəbəce laŋge,ldəgirṯi laŋge,na ləɽəñe leđa lwaiña iŋulu. Ndə liga ləbɽo lwalano đəge ŋen leđa l-Israyil lero lənaṯa Rəmwa,na ləṯərnađainu leđala ildi ləɽo amëu egen,lanəŋulu loɽəbaṯe aŋəno nano leɽəđe Rəmwa ṯa arələmiñi eŋəbai eŋen.
Orn Rəmwa ndrəlnaje eđa gənəŋ igi gəɽo đəpria ṯa aŋələmiñi eŋəbai ŋəleđa ləɽo amëcu egen naṯa aŋələmiṯiya đawṯaralo eləpade elɽen.Orn lanəŋulu lajəpayini eŋen təŋ ŋə-Rəmwa eren ṯalwukuđeiñiṯu rəmwa alo rəpal.Naṯia Rəmwa narəŋgiṯi leđa ləmetiya, ildi ləfo leđa nano ṯwaiñ ləmëcu egen ṯa aldəđame.
Naṯia leđa ləmatiya ldələmaṯe laŋge ildi ləlalɽəlo nṯəlia đenəgəɽəjan.Orn leđa l-Israyil lafo lađəñialo kaiñ; na lanəŋulu ̇ṯalaldəpəjinu eŋəpa ŋen ŋanṯa leđa lə-metiya alerəṯe lələfiđiya. Naṯia,ldarṯe Rəmwa nano ṯa arəlabri.
Naṯia eloman lənəŋ,maje gafo gənəŋ gəɽo Israyil igi ganəjinu ṯa Jiḏaon ganəŋu ṯaŋəmuruwacu ŋwana eŋaməɽa ŋen ŋanṯa leđa ləmetiya alerəṯe ləlalaldəpjia.Orn Almalaiyəga yi-Yauwe naiyeṯa Jiḏaon nano,nayəməiṯi ṯa,"Rəmwa ñiagafo ldəga,ŋaŋgi agoɽra eđopëḏa. Mbu ŋenŋanṯa ŋabri Israyil eđəŋ đəleđa lə-Matiya."
Appa gə-Jiḏaon gafo giđu ëđuna yiṯaṯuɽəđaiyənu ŋenŋanṯa đukwuđəñinṯia ŋen alo ŋəpiano.Rəmwa narəlwaɽəṯi Jiḏaon ṯa aŋgere ađuna yakəl.Orn Jiḏaon gafo gađəñia leđa,ganəŋu naŋəṯwurəṯi liga luləŋgiano.Ganəŋu naŋeɽəñje aḏuna na naŋəpuɽi yərasi.Ganəŋu naŋwađe ađuna yəmajən yə-Rəmwa orba nano igi gəfo gəŋen ŋəpiano naŋiṯi Rəmwa điɽəđənia igađuna yakəl.
Ilwaldiṯano gomən igi gǝɽeđeṯa orba liji ldəsëci ŋen ṯa eđa gənəŋ iŋulu geɽəñje ađuna yəŋen ŋəpiano na naŋgere, na lanəŋulu ldəjiṯiano kaiñ.Naləbɽe egeɽa gə-Jiḏaon ṯa aləmaɽəñe,orn eṯen gə-Jiḏaon naŋəlaiṯi ṯa,"eđa ñagwonaṯa ŋen ṯa ñiagamađaṯa rəmwa eralo irri rəŋəɽuwen? ndə rəɽo rəmwa,ŋgiṯr ŋen ŋanṯa aropəṯe ŋu bɽa!" orn ŋen gəlwaɽo ṯia,leđa lderṯe ləɽəñia Jiḏaon.
Orn leđa ləmetiya naləbɽe təŋ ṯa alaldəbəjiace leđa l-Israyil.Lanəŋulu lafo lwaiña lero lumaṯaiyənia.Jiḏaon naŋuntəđaji leđa elɽo l-Israyil ṯa aləbəđilda.Jiḏaon naŋeɽəđe Rəmwa ṯa arəmaŋəji ŋaməla ŋəɽəjan iŋi ŋəbaŋaiđia ŋen đeṯəm ṯa Rəmwa ramirndia eŋen ṯa aŋabri leđa l-Israyil.
ŋaməla ŋəɽənda iŋi,Jiḏaon naŋeləce ërrwa alo gəđaŋala iđuđa na naŋeɽəđe Rəmwa ṯa arriruwia ŋuđi ŋilwaldiṯano aŋiɽiṯi nano gerṯa iđuđa.Rəmwa nariđi ṯia.Ilwaldiṯano gomən naŋeɽəđe Rəmwa ṯa,ariđi alo yuđu na ṯa arəŋgiṯi ërrwa gonṯoṯo.Rəmwa nariđi ŋen ṯia com.Giḏaon naŋənti ŋen ŋaŋaməla iŋi ŋijinəma ŋəɽəjan ṯa Rəmwa riđi arəmauwiđi ŋəmaɽriya ŋen ŋanṯa aŋəbri leđa l-Israyil erəŋ rəleđa Ləmetiyan.
Ṯruwa naŋəbɽe alo yəleđa ləmetiya garəno aləf ndređa nəɽijin nalo nəɽəjan(32,000),orn Rəmwa narəmalwaɽiṯi ṯa leđa ildi lwaiña kaiñ.orn Giḏaon naŋəđwaṯe Ṯruwa aləf ndređa naɽəjan nalo ndəjan(22,000) neɽa iđi đəfo đəđəñialo.Rəmwa narəlwaɽəṯi Giḏaon ṯa ganəŋu gerəṯo leđa lwaiña məldin. Naṯia Giḏaon naŋəđwaṯe leđa pređ neɽa orn naŋəṯaiyəni Ṯruwa ndređa eređia giɽəjin(300).
Orn uləŋgi genikei Rəmwa narəlwaɽəṯi Giḏaon ṯa,mbu ŋiruwəṯi alo iŋətu ŋəleđa lametiya ndə agəno ləɽwata,ŋerəṯe agəđiñialo."naṯia uləŋgi genikei,Giḏaon naŋəbɽe alo yiŋudu ṯaŋəno Ṯruwa đəleđa lalo ləmitiyan điɽwaɽəṯia orba igusi igi ganəŋu gəfo gəndro.Orn đappa đəmaje naŋəmaiṯi ṯa,"usil igi gabaŋayiđia ŋen ṯa leđa ləmetiya liđi aləđame Ṯruwa đəleđa ləmetiya!"ndə Giḏaon gəno ŋen ṯia,ganəŋu naŋukuwđəñiṯi Rəmw alo.
Naṯia Giḏaon naŋoɽəbaṯe Ṯruwa nano na naŋəlnanace rəl,ŋəɽi,na arrerre gələmaŋgara.Lanǝŋulu laɽəđaṯe ŋudu elɽto alo isi Ṯruwa đəleđa lalo mitiya ləfo luwəndra.Ṯruwa đə-Gabinit đafo đaɽo ndređia eređia gəɽijin larəpo arrerre eñaŋgara iŋəɽi ŋen ŋanṯa ṯa leđa ləmigiya alerəṯe alerəṯe ləsëcia arrerre gələmaŋgara.
Orn naṯia, Ṯruwa đə-Giḏaon nađəgereiyəđe ŋəɽi nano,nataltal sia nayaŋəni eñəmaŋgara.Lanəŋulu ldəri rəl na lɽərëjiace ole,"đoperre đə-Yauwe na đə-Giḏaon!"
Rəmwa ndriđi leđa nano lə-Metiya,ŋen ŋanṯa aləpđi bɽan na aləɽəñəđe,naṯia taltal,leđa l-Israyil luntëđini neɽa ṯa aləpɽe alamaṯaiyəđe eŋen taa alaldəñi leđa lə-Metiya.Lanəŋulu naldəpwi na naləlaldiñi eləpate ndëur Israyil.Leđa ləmetiya ldaiye eloman lakəl garno 120,000.Naṯia Rəmwa ndrəbri Israyil.
Orn leđa lonaṯe ŋen ṯa labəđia Giḏaon gəɽo eləŋ egen.Orn Giḏaon naŋerəṯe gələŋgiṯia ṯa labəđia ṯia,ganəŋu naŋeɽəđe leđa ṯa aləmananaje ŋəbɽe ŋənəñoman iŋi ŋiđənu ŋəceiliya isi yəleđa ləmitiya.Lanəŋulu nalnanaje Giḏaon ŋwandra ŋwaiña iŋi ŋəceiliya.
Orn Giḏaon naŋəṯoɽaṯe alo yarəno erenia yeđa gəɽo kanna gəbarəñjina ŋwandərəŋa iŋi ganəŋu gəmamaṯəlo leđa.Orn naṯia leđa Lisrayil ṯalukuwđəñiṯu alo waŋge alo gakəl garəno rəmwa eren rəŋəɽəuwen.Naṯia Rəmwa narənaje leđa lisrayil ŋen ŋubwa təŋ ŋen ŋanṯa lanəŋulu lafo lukwuđəñiṯia rəmwa alo irri rəbiyano. Orn Rəmwa ndrəŋgiṯi amëcu egen ṯa aŋəlđame.Lanəŋulu leɽəđe Rəmwa ṯa aŋəlɽrəmoṯe təŋ,na Rəmwa naŋəlṯwađiṯi eđa gənəŋ igi gəɽo đabriya eđen.
ŋen iŋi ŋafo ŋukuɽəbajinəu iŋiga ŋwaiñiya:Ndə leđa l-Israyil liđu ŋen ŋeica,Rəmwa riđi narələnace ŋen ŋubwa,na lanəŋulu naloɽəbaje eŋen,na Rəmwa naŋəlṯwađiṯi eđa egen gəɽo đəbriya.Ndə nṯəliaŋ nəbɽo nwaiña,Rəmwa narəđwaṯe leđa lwaiña ildi ləɽo đəbriya đəleđa l-Israyil eleđa ləɽo amëcu.
Nəṯia đəge,leđa leɽəđe Rəmwa lonaṯa eləŋ garəno irənuŋ gəmaṯan.Lanəŋulu lafo lonaṯa ṯa eləŋ gwala na gonṯoṯo,na ganəŋu igi giđi aləbwaiñəđe leđala.Rəmwa raber ronaṯa ŋen iŋi lanəŋulu leɽəđo,orn naṯia ranəŋu ndrəlnace eləŋ ŋen ŋarəno lanəŋulu leɽəđo.
Đumëđinia egađam:Gə-đagəmiye1-3;6-8