40. ŋen Yesu gëɽənu iđuɽi

ŋen ṯurrwa điđu Yesu ŋađəna đəge, ldəmame ṯa aɽe aləmaɽəñe iđuɽi. Lđəmiđi ṯa aŋërəbe salibi isi gebəla aŋəɽəñinu.

Na ṯurrwa nəđəmamaṯe Yesu alo yəbarnia "bambiña gənda" ləmađəwaṯe raŋ na rəmanəŋa đuɽi nano. Orn Yesu naŋaṯa,"Papa, ŋgeicu ŋen, ŋen ŋanṯa lënəŋulu laijəba ŋen iŋi lëbəđia." Orn pilaṯus ŋəlwaɽe ṯa aləwëriđe, "eləŋ gal yawuḏ" ŋeɽo ŋaməla na ləɽi Yesu nḏuɽi nenda.

Nṯia niyəkarnəđe ndrena nəlëɽəŋu. ŋen liđu ṯia, ŋen ŋəɽəñađini iŋi ŋefo ŋəɽwatənu, "lënəŋulu liyəkarnəđo ndrena nəlëɽəñi iŋulu pəɽan, na lađəməce ŋen eŋen ŋəndrena."

Yesu gaɽəno iđuɽi iligano leđa liɽijan ildi laɽəndom. Iŋulu gənəŋ niŋəđaməci Yesu eŋen, orn igi gomən naŋaṯa, "agero agiđəña Rəmwa? Lëləŋ ləgakəmənu, orn maji igi gero gëbəđia mənna kwai kwai." Gënəŋu naŋaṯi Yesu ṯa, "ləŋəđeiniñau eŋələŋe ŋəlaɽəŋa." Yesu nəŋəmeiṯi ṯa, "điñəđi ləgiđi alfəṯe alo Yaləfarṯus."

Nələŋ noɽra nal yawuḏ na leđa ildi lwaiña ləđaməci Yesu eŋen. Ldəmaṯi ṯa, "ndə agəɽo iđia gərəmwa, orəwaŋ iđuɽi na ŋabəri etam gəlaɽəŋa! Orn ñëndi ŋen ŋëləɽəŋa."

Orn alo pređ nayəɽeṯe ŋəram đurri, garno ađəñinano gefo geɽo. Nayəɽeṯe ŋəram ađəñinano na nëyəɽaŋe yaɽo ŋəram sa iɽijin.

Orn Yesu nəŋwađe eŋol pəlelo, "ŋen ŋaɽəñađinu! Papa, iganiđia usila gëləɽəñi eraŋ rëləɽəŋa." na nəŋoləŋađəci nda alo na ŋəniđe usila. Orn ŋen gaiyo, ləbate lafo lətəsënu na erena igi getəfëđu leđa alo egal isi yərəmwa ekaləyakal nəŋəṯəbəđe alo yəɽijan, pəlelo na alo.

eŋəɽañ iŋi ŋëləɽəŋu, Yesu gagiđu đađ eleđa ildi labəṯa Rəmwa nano. ŋen ṯurrwa iđi đarəmoṯwa Yesu đəseicu ŋen iŋi pređ ŋafo ŋiđənu, ldaṯa,"đeṯam, maji igi gafo gađərwaṯu eŋen. Gënəŋu gaɽo iđia gərəmwa."

Nṯia Yusəf na nicoṯimus, leđa ildi laɽo ndijan lal yawuḏ ildi lëndu ŋen ŋəyesu masiya, leɽəđe Bilaṯus aŋəno iyesu. Yusəf nəŋəme aŋəno nəŋəmandeici erenga na nəŋëɽi nḏel đobwa. Na lënəŋu ləṯwađe lwandra ləɽëi đen nëiñua egal isi yefo aməɽəṯënia.

Đumëđənia iđigiđia ađam- Maṯṯa 27:27-61; Margus 15:16-47; Luka 23:26-56; Yuanna 19:17-43