43. ŋen ŋəđətođa alo đəkənisa
ŋen Yesu goɽəbaṯu elo, ṯaləmais əllëɽəŋu ləɽëŋe ursalim ŋen ŋarno Yesu gəfo gëləɽəṯulo. Leđa ildi landu ŋena ldərariđe ldəɽo ṯa aləṯaṯurṯi Rəmwa.
Inṯəliaŋ pređ, ñoman ndređia đenəŋ iliga ləđabwarënia nano leđa lal yawuḏ liđeu đəŋəra nano đeŋəra eloman ləbarnia al kamsin. Al kamsin fəŋu loman ildi leđa ləkana larraiđo ṯa aliđi đəŋera đəđwanṯa ŋwana. Na leđa lal yawuḏ leṯo alo pređ ursalim ṯa aliđi đəŋera nano đəl-kamsin ldəɽo. Igəṯaliaŋ egia, iliga lal kamsin geṯo igosəbo ŋen Yesu goɽəbaṯo elo.
ŋen leđa ildi landu ŋen ldarraiđo ldəɽo alo yunto, na taltal ole nəŋirəwa elo garno đəbera đura na gwunḏəjeinu egeɽa igi loɽaŋa. Na raŋəla ramiñiṯəlo rarno isia ndrirəwəṯəlo nəŋəɽwa pređ ɽetəɽeteo. Na pređ ldunḏəjeinu usilaga gatəɽe na ṯalwaɽwato ole gəleđa ɽetəɽeteo.
ŋen leđa l-ursalim lano ole, leđa lwaiña leṯo ṯa aləŋaṯe ŋen iŋi ŋəfo. ŋen leđa landu ŋen ŋəŋəmaɽria ŋərəmwa iŋi ŋeŋəra, ŋen ŋaijəbinṯəlo nano ŋen ŋanṯa pređ lano ole egen ɽetəɽeteo.
Leđa ləmaṯan lađamicəlo ṯaləmis ŋen ldaṯa ṯa laraməɽu. Orn Buṯrus ŋətoṯe elo ŋaṯa," nəṯəñar! Leđa ildi lero laraməɽua! Orn fəŋen iŋi anabi Ywuil eŋen Rəmwa ralwaɽo,' igiđi erajaice usila gëləɽəñe alo pređ.'''
" Ya leđa lisrayil, Yesu maji igi Rəmwa riđəma gələŋinu eñaŋ ŋenŋa ŋoɽra ŋaŋəməla na aŋwaraiya yusila gərəmwa, garno ñagəsicəma na ñagəlëŋeṯəma. Orn nəñamëɽe iđuɽi!"
" Garno ṯia Yesu gaiyo, orn Rəmwa ratuđəma eŋəɽaiñ. Garno ŋen aŋəɽəñađini iŋi nabi yaṯa, 'agaber agiđi ŋaŋgiṯi eđa gəlaɽəŋa gatəɽe aŋaicəbəreṯe eđel. 'Fəŋu Yesu igi Rəmwa ratuđəma na eŋen iŋi ñagaɽo đaməđaṯa eŋen."
"Yesu gëɽo eđa igi gefo đaŋ đəŋaicəba đərəmwa fəŋu papa. Na Yesu gəđwaṯo usila gatəɽe garno gaɽo ŋen ṯa aŋəfeṯe. Orn usila gatəɽe garaicənde ŋen nano iŋi ñagaseicia na ñagənna."
"Ñaŋ ñagəɽo maji iđuɽi, Yesu. Orn ləŋetor ŋen ṯa Rəmwa riđəma aŋəɽeṯe eləŋ na al masiya."
Leđa ildi lano ŋen ŋəbuṯrus nəŋəlwađe enare. Lënəŋulu leɽëđe Buṯrus na leđa ləđweinu ṯa, "lorldaiña ñagëbəđia ṯau?"
Na Buṯrus nəŋəlwaɽəṯi ṯa, "ñəŋ pređ ṯađor ŋen ŋeicia na ñaneini mamuḏiya irəŋga gəyesu masiya ŋen ŋanṯa Rəmwa arəndəgađaice ŋen eŋalo ŋeicia. Na gënəŋu com giđi aŋəndənaice đəneica đusila gatəɽe."
Leđa laɽo ndređa naɽijin ildi laŋənṯu ŋen iŋi Buṯrus gəɽwaṯa na ləɽeṯe leđa ləđweinu l-yesu. Laneinu mamuḏiya na ləɽeṯe leđa ləkənisa alo Ursalim.
Leđa ləđweinu ṯaləməñađəṯu nəñwa ldënṯi eđërrəŋaiđia ŋen ŋəleđa lǝđweinu, eđəɽəbəđia eŋen na eđagera aicəba na eđaṯurṯia Rəmwa. Ldənanaice Rəmwa đame đaŋərađa nano na lakarnəđe laŋge ldəɽo garno lonaṯa. Na leđa pređ laŋërṯəlo nano. Ñoman pređ, leđa lwaiña ildi ləbandia ŋen.
Đumëđənia ig-ađam: Amal ar rasul 2