33. Đəmwëđinia đeđa igi gəlaɽa

Orn eloman lənəŋ,Yesu gafo gabarəŋacia leđa ŋen ildi lwaiña đəparnda nano.Leđa lwaiña leṯo Yesu nano ṯa aləne ŋen iŋi ganəŋu gonaṯa ṯa aŋəlɽwaɽiṯi orn ganəŋu naŋapoṯe iđəpundr iŋau ṯa aŋəfiđi alo yəbrano.Ganəŋu naŋəɽaŋe iđəpundr na naŋarəŋeici leđa ŋen.

Yesu naŋəlwaɽiṯi ŋenəŋa ŋəđəmwëđənia ṯa."Eđa gəlaɽa gabɽo i-gii ṯa aŋəuwađe ŋəola.Ndə guwasəđo ŋəolaŋa đəŋəđa đəlaɽiŋu alo,ŋəmaṯan naŋirtiṯi eđađ, naṯia ndifia naləse pređ."

"Na ŋəola ŋəmaṯan naŋirtəṯi alo yəɽo ŋuwandr,alo isi đuđa đafo đatafr.ŋəloa iŋi ŋəfo ekəl yəɽo ŋuwandr naŋopəđe taltal,orn urndia egen naŋerəṯe giruwëṯa egal yoleno iđuđa.Ndə ađëñina yuwɑđənu yibuwa,ŋaiña naŋəmiđiṯi aŋəno na naŋaiye."

"Na məldin ŋəola ŋəmaṯan naŋirtəṯi egal yəɽo rri.Orn ŋəola ŋakəl naŋətođe na rri narəlagantəđaiđi.Naṯia ŋaiña iŋi ŋobəđo ekəl yəɽo rri naŋerəṯe ŋələŋa ləđia kwai kwai."

"Orn ŋəloa ŋəmaṯan naŋiɽiṯi iđuđa đəŋəra.ŋəola iŋi naŋobəđe na naŋələŋe liđia luwaiña garno,30,60,an məldin 100 ŋəməñiaṯo ŋəola ŋananoŋ iŋi ŋəfo ŋuwađənu.Eđa igi gerəṯo nanəŋia ŋgiṯəmar aŋəne!"

Ɖumwëđinia iđi naŋəruđaiđi leđa nano ildi lətateṯa Yesu.Naṯia Yesu naŋələgirəṯi ŋen ano ṯa,"ŋəola ŋaɽo ole gə-Rəmwa.Ɖađ fəŋu eđa igi gəna ole gə-Rəmwa orn naŋerəṯe gələŋeṯa ŋen,or iɽildiya naldəmaṯe ole egen."

" Đuđa iđi đəɽo ŋwadra đarəno eđa igi gəno ole gə-Rəmwa na naŋaŋənṯi đəŋərađa nano.Orn ndə ŋen ŋaɽəŋacima elo ŋəbɽaŋəno walla ŋəbwa,ganəŋu naŋoɽəbəṯaṯe nṯurṯu."

" Alo isi yəɽo rri yarəno eđa igi gəna ole gə-Rəmwa,orn ndə liga ləbɽo,đame ,ŋələŋe,na đonaṯa đəđəməṯia đəlaɽiŋu naŋəmađərənađaeđe alo iđəbwa đə-Rəmwa.Naṯia,ndə gəno ŋen ŋəđarəŋainiya ganəŋu naŋerəṯe gənaeđia ŋen ŋəŋəra."

" Orn đuđa iđi đəŋra đaɽo eđa igi gəno ole gə-Rəmwa,ganəŋu naŋəndi ŋen,na naŋələŋe ləđia lwaiña."

Đəmwëđinia egađam:Gə-maṯṯa13:1-8,18-23;Markos 4:1-8;13-20;Luka 8:4-15