3. Ang Lunop

Human sa taas nga panahon, midaghan ang mga tawo nga nagpuyo sa kalibotan. Nigrabe ang ilang pagkadaotan ug pagkabangis. Ug tungod niini nakahukom ang Dios nga gub-on ang tibuok kalibotan pinaagi sa dako nga lunop.

Apan nahimuot ang Dios kang Noe. Matarong siya nga tawo, nga nagpuyo tipon sa mga makasasala nga katawhan. Gisultihan sa Dios si Noe mahitungod sa lunop nga iyang ipadala. Ug giingnan niya si Noe nga maghimo ug dako nga arka.

Miingon ang Dios kang Noe nga magbuhat ug arka nga ang sukod niini 140 ka metros ang katas-on, 23 ka metros ang kalapdon, 13.5 ka metros ang kahabugon. Buhaton kini ni Noe nga tulo ka andana gamit ang kahoy nga mga materyales ug anaay daghang mga kuwarto, ug anaay atop ug bintana. Ang maong arka makaluwas kang Noe ug sa iyang pamilya ug sa tanang klasi nga mga mananap sa panahon sa lunop.

Gituman ni Noe ang Dios. Nagbuhat siya ug arka uban sa tulo niya ka mga anak sumala sa paagi nga giingon sa Dios kanila. Miabot ug daghan pa nga katuigan ang pagbuhat sa maong arka, tungod sa hilabihan nga kadako niini. Nagpasidaan si Noe ngadto sa mga katawhan mahitungod sa umaabot nga lunop ug nagsulti nga mobalik na sila sa Dios, apan wala sila mituo kaniya.

Gisugo usab sa Dios si Noe ug ang iyang pamilya sa pagtigom ug pagkaon nga sakto lamang kanila ug sa mga kahayopan. Ug sa dihang naandam na ang tanan, ang Dios nagsulti kang Noe nga panahon na nga ang iyang asawa, ang iyang tulo ka mga anak nga lalaki, uban sa ilang mga asawa nga mosulod na sa arka. Walo silang tanan nga misulod sa arka.

Nagpadala ang Dios kang Noe ug mga mananap ug langgam lalaki ug babaye aron mosulod sa arka aron maluwas sila panahon sa lunop. Ang Dios nagpadala ug pito ka lalaki ug pito ka babaye sa kada klase sa mga mananap nga maoy mamahimong gamiton sa paghalad. Sa dihang anaa na silang tanan sa sulod sa arka, Gisirad-an sa Dios ang pultahan niini.

Unya nagsugod na ang ulan, Wala kini niundang sulod sa (40) ka adlaw ug (40) ka gabii. Ug nibugwak usab ug tubig ang yuta. Natabunan ug tubig ang tanan nga anaa sa tibouk kalibotan, lakip na ang pinakataas nga mga bungtod.

Ang tanan nga nagpuyo sa uga nga yuta nangamatay, gawas lamang sa mga tawo ug mga kahayopan nga anaa sa sulod sa arka. Naglutaw-lutaw ang arka sa tubig ug ang tanan nga anaa sa sulod nangaluwas ug wala sila nangalumos.

Human niundang ang ulan, ang arka naglutaw-lutaw pa sa tubig sulod sa lima pa ka bulan, ug niining higayona nag–anam na ug kahubas ang tubig. Unya usa ka adlaw niana ang arka anaa na sa tumoy sa bungtod, apan natabunan pa gihapon ang kalibotan ug tubig. Human sa tulo pa ka bulan, makita na ang tumoy sa mga bungtod.

Human sa 40 ka adlaw, nagpadala si Noe ug langgam nga gitawag ug uwak aron sa pagtan-aw kong hubas na ba ang tubig. Ug milupad pahawa ug pabalik ang uwak apan wala kini makakita ug uga nga yuta.

Unya nagpadala si Noe ug langgam nga ginganlan ug salampati. Apan wala gihapon kini makakita sa uga nga yuta, busa nibalik kini ngadto kang Noe. Nilabay na usab ang usa ka semana, iya kining gipadala pag-usab, ug nibalik kini nga anaay dala nga sanga sa olibo! Nag-anam-anam na ug hubas ang tubig ug nitubo na usab ang mga tanom.

Sa ikatulo nga higayon, nagpaabot pa si Noe ug lain pa nga simana ug nagpadala na usab ug salampati. Niining higayona, wala na kini mibalik tungod kay nakakita na kini sa iyang katugpahan. Ug nihubas na ang tubig!

Human sa duha ka bulan, miingon ang Dios kang Noe, “Mahimong mogawas na kamo sa arka, ikaw ug ang imong pamilya ug ang tanan nga mga mananap. Panaghan kamo ug lukopa ninyo ang tibuok kalibotan.” Ug unya nigawas si Noe ug ang iyang pamilya sa arka.

Human makagawas si Noe sa arka, naghimo siya ug altar diin naghalad siya sa pipila ka mga mananap nga mahimong gamiton sa paghalad. Nalipay ang Dios sa iyang halad ug iyang gipanalanginan si Noe ug ang iyang pamilya.

Niingon ang Dios, “Nagsaad ako nga dili ko na tungluhon ang yuta tungod sa mga daotan nga binuhatan sa mga tawo. Dili na nako gub-on ang kalibotan pinaagi sa lunop bisan pa kung sad-an na sila sukad sa ilang pagkabata.”

Naghimo ang Dios sa kinaunahan nga bangaw ingon nga timaan sa iyang saad. Matagpanahon nga anaay bangaw sa langit, ang Dios ug ang iyang mga katawhan mahinumdom sa iyang saad.

Ang istorya gikan sa Biblia: Genesis 6-8