32. Giayo ni Jesus ang Giyawaan nga Lalaki ug ang Babaye nga Nagsakit

Usa ka adlaw, si Jesus ug ang iyang mga tinun-an niadto sa bangka patabok sa linaw padulong sa rehiyon diin nagpuyo ang katawhan sa Gerasa.

Sa dihang nakaabot na sila sa pikas nga bahin sa linaw, ang tawo nga giyawaan midagan padulong kang Jesus.

Kini nga tawo kusgan kaayo nga wala gayoy makapugong kaniya. Ang iyang bukton ug tiil gigapos ug kadena sa mga tawo, apan kanunay niya kining mabugto.

Ang tawo nagpuyo taliwala sa mga lubnganan sa mao nga dapit. Kini nga tawo gasinggit sa tibuok adlaw ug gabii. Wala siya gasuot ug sinina ug pirmi niya samad-samaran ang iyang kaugalingon gamit ang bato.

Sa dihang ang lalaki miduol kang Jesus, miluhod siya sa iyang atubangan. Miingon si Jesus sa demonyo, "Pahawa niining tawhana!"

Ang lalaki nga adunay demonyo misinggit, "Unsay tuyo nimo kanako, Jesus, Anak sa Dios nga Labing Halangdon? Palihog ayaw ako siloti!" Unya nangutana si Jesus sa demonyo, "Unsa imong pangalan?" Siya mitubag, "Lehiyon ang akong ngalan, tungod kay daghan kami."(Ang "lehiyon" grupo sa pipila ka libong sundalo sa Roman nga kasundalohan.)"

Ang demonyo naghangyo kang Jesus, "Palihog ayaw kami papahawaa ani nga rehiyon!" Unya adunay panon sa mga baboy nga nagakaon sa duol nga bungtod. Mao nga ang mga demonyo mihangyo kang Jesus, "Palihog pabalhina nalang kami padulong sa mga baboy!" miingon si Jesus, "Sige adto namo!"

Ang mga demonyo nihawa sa lalaki ug nisulod sa mga baboy. Ang mga baboy nidagan paubos sa titip nga pang-pang padulong sa linaw ug nangalumos. Adunay 2,000 ka baboy sa panon.

Sa dihang nakita sa mga tawo nga nag-alima sa mga baboy kung unsa ang panghitabo, nidagan sila ngadto sa lungsod ug giingnan ang tanan nga nakita nila unsa ang gibuhat ni Jesus. Ang mga tawo sa lungsod niabot ug nakit-an ang tawong giyawaan kaniadto. Naglingkod siya nga malinawon, nakasuot ug sinina, ug nagalihok sama sa normal nga tawo.

Nahadlok pag-ayo ang mga tawo ug nihangyo kang Jesus nga mopahawa. Mao nga nisakay si Jesus sa bangka ug nangandam na sa paghawa. Ang lalaki nga giyawaan kaniadto mihangyo nga mokuyog kang Jesus.

Apan miingon si Jesus kaniya, "Dili, gusto ko nga mouli ka sa imong balay ug sultihi imong mga higala ug pamilya sa tanan nga gibuhat sa Dios alang kanimo ug sa iyang gipakita nga kaluoy diha kanimo.

Mao nga milakaw ang tawo ug gisulti niya sa tanan ang gihimo ni Jesus kaniya. Ang tanan nga nakadungog sa iyang istorya nahibulong ug natingala pag-ayo.

Mibalik ug tabok si Jesus sa pikas sa lanaw. Pag-abot niya didto, nagtigom ang daghang katawhan ug nagdasok sa pag-alirong kaniya. Sa maong pundok anaay usa ka babaye nga nag-antos sa pagregla nga walay hunong sulod sa 12 ka tuig. Nabayad na niya ang tanan niyang kwarta sa mga doktor aron ayohon nila siya, apan nisamot hinoun kini.

Nakadungog siya nga si Jesus daghan ug giayo nga masakiton ug nakaisip nga, "Sigurado ko nga kung mahikapan ko lang ang bisti ni Jesus, maayo usab ako!" Mao nga miduol siya sa likod ni Jesus ug gihikap ang iyang biste. Diha-diha dayon niundang ang iyang regla paghuman niyag hikap kaniya.

Diha-diha dayon, nabantayan ni Jesus nga naay gahom nga migawas kaniya. Mao nga milingi siya ug nangutana, "kinsa ang naghikap kanako?" Nitubag ang mga tinun-an, "Nganong mangutana pa man ka kon kinsay mihikap kanimo?"

Miluhod ang babaye sa atubangan ni Jesus, nagkurog ug nahadlok pag-ayo. Unya giangkon niya ang iyang gibuhat, ug nga tungod ato siya naayo. Miingon si Jesus kaniya, "Ang imong pagtuo maoy nakaayo kanimo. Lakaw nga malinawon."

Istorya gikan sa Biblia: Mateo 8:28-34; 9:20-22; Marcos 5:1-20; 5:24b-34; Lucas 8:26-39; 8:42b-48