24. Gibawtismohan ni Juan si Jesus
Midako na si Juan nga anak nila ni Zacarias ug Elizabet, ug nahimo nga usa ka propeta. Nagpuyo siya didto sa kamingawan, dugos ug dulon ang iyang kinaon, ug hinimo gikan sa buhok sa kamelyo ang iyang sinina.
Nangadto ang daghang mga tawo sa kamingawan aron sa pagpaminaw kang Juan. Unya giwalihan niya sila sa pag-ingon, “Paghinulsol kamo kay hapit na moabot ang gingharian sa Dios!”
Sa pagkadungog sa mga tawo sa iyang mensahe, daghan ang naghinulsol sa ilang mga sala, ug gibawtismohan sila ni Juan. Daghan usab ang mga pangulo sa relihiyon sa mga Judio nga miadto kang Juan aron magpabawtismo, apan wala sila maghinulsol o magsugid sa ilang mga sala.
Giingnan ni Juan ang mga pangulo sa relihiyon sa mga Judio, “Kamong mga malala nga mga bitin! Paghinulsol kamo ug pagbag-o na kamo. Kay ang tanang kahoy nga dili mamunga ug maayo, pagaputlon kini ug isugnod sa kalayo.” Natuman ni Juan ang gingon sa mga propeta, “Tan-awa ninyo, ipadala nako pag-una kaninyo ang akong mensahero, nga maoy moandam sa inyong dalan.”
Gipangutana si Juan sa uban nga mga Judio kung siya ba ang Mesiyas. Apan mitubag si Juan, “Dili ako ang Mesiyas. Apan adunay moabot sunod kanako, ug halangdon pa siya kanako tungod kay dili ako takos bisan nalang sa paghukas sa iyang sandalyas.”
Sunod adlaw, miabot si Jesus aron magpabawtismo kang Juan. Pagkakita ni Juan kaniya, miingon siya, “Tan-awa ninyo! Ania na ang Nating Karnero sa Dios nga maoy magkuha sa sala sa kalibotan.”
Miingon si Juan kang Jesus, “Dili ako takos sa pagbawtismo kanimo. Ikaw ang kinahanglan nga mobawtismo kanako.” Apan nag-ingon si Jesus, “Bawtismohi ako, tungod kay mao kana ang saktong buhaton.” Busa gibawtismohan siya ni Juan, bisan pa man ug walay sala si Jesus.
Paghaw-as ni Jesus sa tubig human siya nabawtismohi, nagpakita ang Espiritu sa Dios sa hulagway sa usa ka salampati ug mipaubos ug mitugdon kaniya. Unya sa susamang higayon, ang tingog sa Dios nga gikan sa langit nagsulti, nga nag-ingon, “Ikaw ang hinigugma kong Anak, gikahimut-an ko ikaw pag-ayo.”
Giingnan sa Dios si Juan, “Mokanaog ang Balaang Espiritu ug motugdon sa tawo nga imong bawtismohan. Ug kanang tawhana ang Anak sa Dios.” Wala nay lain nga Dios. Sa dihang gibawtismohan ni Juan si Jesus, nadunggan niya ang Dios nga Amahan nga nagsulti, nakita niya ang anak sa Dios nga mao si Jesus, ug nakita ang Balaang Espiritu.
Istorya gikan sa Biblia: Mateo 3; Marcos 1:9-11; Lucas 3:1-23