9.Gitawag sa Dios si Moises

Human sa kamatayon ni Jose, ang tanan niyang paryente nagpabilin sa Ehipto. Sila ug ang ilang mga kaliwat nagpadayon pagpuyo didto sa daghan nga mga katuigan ug nakabaton sila ug daghan nga mga anak. Gitawag sila nga mga Israelita.

Human sa gatosan ka katuigan, midaghan pa gayod ang mga Israelita. Ang mga Ehiptohanon wala na mahinumdom kang Jose, ug sa tanan niya nga gihimo sa pagtabang kanila. Nahadlok sila sa mga Israelita kay daghan paman sila kay kanila, mao nga ang Paraon nga nagdumala sa Ehipto niadtong panahona naghimo sa mga Israelita nga ulipon sa mga Ehiptohanon.

Gipugos sa mga Ehiptohanon ang mga Israelita sa pagtukod ug daghan nga mga dagkong mga binalay ug bisan pa tibuok nga mga siyudad. Ang kahago nila sa pagtrabaho maoy nakalisod kaayo sa ilang pagpuyo. Apan ang Dios nagpanalangin kanila, ug nidaghan pa gayod ang ilang mga anak.

Nakita ni Paraon nga nakabaton pa ug daghan nga mga anak ang mga Israelita. Busa nagsugo siya nga ipapatay ang tanan nga mga batang lalaki nga mga Israelita ug ipanglabay sa Suba sa Nilo.

Anaay babaye nga Israelinhon nga nanganak ug batang lalaki. Gitago niya ug sa iyang bana ang bata kutob sa ilang mahimo.

Sa dihang dili na makaantigo sa pagtago ang mga ginikanan sa bata, ila nalang kini nga gihimoan ug basket nga molutaw ug gibutang nila kini sa kasagbotan daplin sa Suba sa Nilo, aron maluwas siya sa kamatayon. Ang iyang magulang nga babaye nagbantay kaniya aron tan-awon kung unsay mahitabo kaniya.

Nakita sa anak sa Paraon nga babaye ang basket ug gitan-aw niya ang sulod niini. Sa dihang nakita niya ang bata iya kining gikuha ingon nga iyang kaugalingong anak nga lalaki. Nagsuhol siya ug Israelinhon nga babaye aron moatiman kaniya apan wala siya makahibalo nga siya diay maoy inahan sa bata. Sa dihang dako na ang bata ug dili na kinahanglan ug gatas sa iyang inahan, gibalik niya kini sa anak sa Paraon nga babaye nga maoy naghatag ug ngalan kaniya nga Moises.

Usa ka adlaw sa dihang ulitawo na si Moises, nakita niya ang Ehiptohanon nga nangulata sa usa ka Israelinhon nga ulipon. Gisulayan ni Moises pagluwas ang iyang isig ka Israelinhon.

Sa dihang nakita ni Moises nga walay makakita, gipatay niya ang Ehiptohanon, ug gilubong ang iyang lawas. Apan anaay usa nga nakakita sa gihimo ni Moises.

Sa dihang nadunggan ni Paraon ang gibuhat ni Moises, iya kining gipapatay. Apan milayas si Moises sa Ehipto ug miadto siya sa kamingawan diin siya luwas gikan sa mga sundalo ni Paraon.

Nahimong magbalantay si Moises sa mga karnero didto sa kamingawan nga layo sa Ehipto. Naminyo siya didto ug nakabaton sila ug duha ka anak nga lalaki.

Usa ka adlaw niana samtang si Moises nag-atiman sa iyang mga karnero, iyang nakita ang usa ka sampinit nga nagdilaab sa kalayo, apan wala kini naugdaw. Giduol ug gitan-aw ni Moises ang sampinit aron sa pagsusi niini. Samtang nagpaduol na siya sa nagdilaab nga sampinit, anaay tingog sa Dios nga miingon, “Moises, huboa ang imong sandalyas, kay nagtindog ka sa balaan nga dapit.”

Miingon ang Dios, “Akong nakita ang pag-antos sa akong katawhan. Busa ipadala ko ikaw ngadto kang Paraon aron maluwas ang mga Israelita sa ilang pagkaulipon sa Ehipto. Ihatag ko kanila ang yuta sa Canaan, ang yuta nga gisaad ko kang Abraham, Isaac, ug ni Jacob.”

Unya nangutana si Moises, “Unsaon man kung ang mga katawhan buot makabalo kung kinsay nagpadala kanako, unsay angay nakong isulti?” Miingon ang Dios, “AKO MAO AKO. Ingna sila, ‘Si ako ang nagpadala kanako ngadto kaninyo.’ Unya ingna usab sila, ‘Nga Ako si Yahweh, ang Dios sa inyong mga katigulangan nga si Abraham, Isaac ug Jacob.’ Mao kini ang akong ngalan sa kahangtoran.”

Nahadlok si Moises ug dili siya gusto nga moadto kang Paraon tungod kay naghunahuna siya nga dili siya maayo manulti, busa gipaubanan sa Dios si Moises kang Aaron nga iyang igsoon, aron nga makatabang kaniya. Gipasidan-an sa Dios si Moises ug si Aaron nga magmagahi gayod ang Paraon.

Istorya gikan sa Biblia :Exodus 1-4