17. Ang Kasabotan sa Dios kang David

Si Saul mao ang unang hari sa Israel. Taas siya ug guwapo, sama gayod sa gusto sa mga tawo. Maayong hari si Saul sulod sa unang pipila ka mga katuigan sa iyang pagmando sa Israel. Apan nahimo siya nga daotanng tawo nga wala na magtuman sa Dios, busa nagpili ang Dios ug lahi nga tawo nga mamahimong hari sa umaabot ang adlaw puli sa iyang dapit.

Nagpili ang Dios ug usa ka batan-ong Israelita nga ginganlan ug David nga mamahimong hari puli kang Saul. Magbalantay si David sa karnero gikan sa lungsod sa Betlehem. Sa lainlain nga panahon samtang gibantayan niya ang karnero sa iyang amahan, gipangpatay ni David ang mga lion ug uso nga magtukob sa mga karnero. Mapaubsanon ug matarong nga tawo si David nga nagsalig ug nagtuman sa Dios.

Nahimong bantogan nga sundalo ug pangulo si David. Sa batan-on pa si David, nakig-away siya sa usa ka higante nga ginganlan ug Goliat. Gibansay nga sundalo si Goliat ug kusgan kaayo ug hapit tulo ka metros ang iyang gitas-on. Apan gitabangan sa Dios si David nga mapatay si Goliat ug naluwas ang Israel. Human niana, daghan pa nga kadaogan nga naangkon ni David sa mga kaaway sa Israel, ug tungod niini gidayeg siya sa mga tawo.

Nasina si Saul kay gihigugma sa mga tawo si David. Daghang mga higayon nga nagsulay si Saul sa pagpatay kaniya, busa nagtago-tago si David gikan kang Saul. Usa ka adlaw, gipangita ni Saul si David aron patyon siya. Misulod si Saul sa mao ra nga langob kung asa nagtago si David gikan kang Saul, apan wala siya makita ni Saul. Duol na kaayo si David kang Saul ug mahimo na niya siyang patyon, apan wala niya buhata. Hinuon, gigisian lamang ni David ang sinina ni Saul aron pamatud-an kang Saul nga wala siya’y tinguha nga patyon siya aron mahimong hari.

Sa wala madugay, namatay si Saul sa gubat ug nahimong hari si David sa Israel. Maayo siya nga hari ug gihigugma siya sa mga tawo. Gipanalanginan sa Dios si David ug gihimo siya nga malampuson. Nakig-away siya sa daghan nga mga gubat ug gitabangan siya sa Dios sa pagbuntog sa mga kaaway sa Israel. Nabuntog ni David ang Jerusalem ug gihimo niya kini nga sentro nga siyudad. Sa panahon sa paghari ni David, nahimong gamhanan ug dato ang Israel.

Gusto ni David nga magtukod ug templo aron ang tanang mga Israelita makasimba sa Dios ug makahalad kaniya. Kay sa mga 400 ka katuigan, nagasimba sa Dios ang mga tawo ug nagahatag sa halad ngadto kaniya sa Tolda sa Tagboanan nga gibuhat ni Moises.

Apan gipadala sa Dios ang propeta nga si Natan ngadto kang David uban niini nga mensahe, “Tungod kay usa ka man ka manggugubat, dili ikaw ang magtukod niini nga templo alang kanako. Ang imong anak nga lalaki maoy magtukod niini. Apan, panalanginan ko ikaw ug maayo. Ug ang usa sa imong mga kaliwat ang magmando ingon nga hari sa akong katawhan sa walay kataposan!” Ang bugtong kaliwat ni David nga magmando sa walay kataposan mao ang Mesiyas. Kay pinili sa Dios ang maong Mesiyas ug maoy usa nga moluwas sa mga tawo gikan sa ilang mga sala.

Sa pagkadungog ni David niini nga mga pulong, nagpasalamat dayon siya ug nagdayeg sa Dios tungod kay nagsaad siya kang David niining dakong kadungganan, ug daghan nga mga panalangin. Wala masayod si David kung kanus-a kini tumanon sa Dios. Apan sa nahitabo na kini, ang mga Israelita kinahanglan nga magpaabot ug taas nga panahon una pa moabot ang Mesiyas, hapit 1,000 ka tuig.

Naghari si David nga makataronganon ug matinud-anon sa daghang katuigan, ug gipanalanginan siya sa Dios. Apan, sa kataposan nga bahin sa iyang kinabuhi nakasala siya sa hilabihan batok sa Dios.

Usa ka adlaw niana, sa dihang nakiggubat ang tanan nga mga sundalo ni David, milantaw siya sa gawas sa iyang palasyo ug nakita niya ang maanyag nga babaye nga naligo. Batseba ang iyang ngalan.

Imbis nga likayan kini, nagpadala hinuon si David ug usa ka tawo aron ipakuha siya ug dad-on ngadto kaniya. Nakigdulog siya kaniya ug gipapauli balik sa ilang pinuy-anan. Wala madugay nagpadala si Batseba ug mensahe kang David nga nag-ingon nga nagmabdos siya.

Unya si Uria nga bana ni Batseba, usa sa mga pinakamaayo nga sundalo ni David. Gipapauli siya ni David ug gisultihan siya nga moadto ug ubanan ang iyang asawa. Apan wala mosugot si Uria nga mouli sa balay samtang ang uban nga mga sundalo anaa pa sa gubat. Busa gipabalik ni David si Uria sa gubat ug giingnan ang pangulo sa iyang mga sundalo nga ipaatubang si Uria kung asa ang pinakakusgan nga mga kaaway aron mapatay siya.

Human mamatay si Uria, giminyoan ni David si Batseba. Unya, nanganak siya sa anak ni David nga lalaki. Nasuko ug maayo ang Dios sa gibuhat ni David, busa gipadala niya ang propeta nga si Natan aron sa pagsulti kang David kung unsa kadaotan sa iyang sala. Naghinulsol si David sa iyang sala ug gipasaylo siya sa Dios. Sa tibuok niyang kinabuhi, nagsunod ug nagtuman siya sa Dios, bisan sa lisod nga mga panahon.

Apan ingon nga silot alang sa sala ni David, namatay ang iyang anak nga lalaki. Ug nag-unay sa pag-away ang pamilya ni David sa tibuok niyang kinabuhi, ug ang gahom ni David nahuyang na. Bisan paman nga wala nagmatinud-anon si David sa Dios, gituman gihapon sa Dios ang iyang saad kaniya. Unya, nakaanak si David ug si Batseba ug lalaki ug ginganlan nila siya ug Solomon.

Istorya gikan sa Biblia: 1 Samuel 10; 15-19; 24; 31; 2 Samuel 5; 7; 11-12