41. Ang Pagkabanhaw ni Jesus

Human sa paglansang sa krus sa mga sundalo kang Jesus, ang dili matinuohon nga mga pangulo sa Judio miingon kang Pilato, "Kanang bakakon nga si Jesus miingon nga siya mabuhi gikan sa mga patay human sa tulo ka adlaw. Kinahanglan nga adunay tigbantay sa lubnganan aron masigurado nga dili kawaton sa mga tinun-an ang patay nga lawas ug moingon nga siya nabanhaw gikan sa mga patay.”

Miingon si Pilato, "Pagdala ug mga sundalo ug bantayi pag-ayo ang lubnganan." Busa gibutangan nila ug usa ka silyo ang bato nga agianan sa lubnganan unya nagbutang ug mga sundalo aron wala gayoy makakawat sa patay nga lawas.

Ang adlaw human sa paglubong kang Jesus mao ang Adlaw nga Igpapahulay, ug ang mga Judio wala gitugotan nga moduaw sa lubnganan niadtong adlawa. Busa sayo pa sa kabuntagon pagkahuman sa Adlaw nga Igpapahulay, daghang kababayenhan ang nag-andam sa pagduaw sa lubnganan ni Jesus aron magbutang ug mga pahumot sa lawas ni Jesus.

Sa kalit lang, adunay usa ka kusog nga linog. Ang usa ka anghel nga midan-ag sama sa kahayag sa kidlat nagpakita gikan sa langit. Giligid niya ang bato nga nagtabon sa agianan sa lubnganan ug milingkod niini. Ang mga sundalo nga nagbantay sa lubnganan nangahadlok ug natumba sa yuta sama sa usa ka patay nga tawo.

Sa pag-abot sa kababayenhan sa lubnganan, miingon ang anghel kanila, "Ayaw kamo kahadlok. Si Jesus wala na dinhi. Kay nabanhaw siya gikan sa mga patay, sama sa giingon niya! Tan-awa sa sulod sa lubnganan.” Ang mga kababayenhan misulod sa lubnganan ug nakita nga wala na didto ang lawas ni Jesus sa iyang gihigdaan. Wala na ang iyang lawas!

Unya ang anghel miingon sa mga babaye, "Lakaw ug sultihi ang mga tinun-an, ‘nga si Jesus nabanhaw na ug mouna na kaninyo didto sa Galilea.’"

Ang mga kababayenhan napuno sa kahadlok ug dakong kalipay. Nidagan sila aron masultihan ang mga tinun-an sa maayong balita.

Samtang ang mga kababayenhan padulong pa aron sultihan ang mga tinun-an sa maayong balita, nagpakita si Jesus kanila, ug gisimba nila siya. Miingon si Jesus, "Ayaw kamo kahadlok. Lakaw ug sultihi ang akong mga tinun-an nga moadto sa Galilea. Makakita sila kanako didto."

Ang Istorya gikan sa Biblia: Mateo 27:62-28:15; Marcos 16:1-11; Lucas 24:1-12; Juan 20:1-18