7. Gipanalanginan sa Dios si Jacob

Sa dihang ulitawo na ang mga bata, gusto ni Jacob nga sa balay lang siya kanunay, apan gusto ni Esau ang pagpangayam. Gihigugma ni Rebeca si Jacob, Ug gihigugma usab ni Isaac si Esau.

Usa ka adlaw niana, miabot si Esau gikan sa pagpangayam ug gigutom siya pag-ayo. Unya miingon si Esau kang Jacob, “Hatagi ko nianang pagkaon nga imong giluto.” Ug mitubag si Jacob, “Ihatag sa una kanako ang imong katungod sa pagkamagulang.” Ug gihatag ni Esau kang Jacob ang iyang katungod sa pagkamagulang. Unya gihatagan usab siya ni Jacob ug pagkaon.

Unya gusto na ni Isaac nga ihatag ang iyang panalangin kang Esau. Apan sa wala pa kini mahitabo, giilad siya ni Rebeca ug ni Jacob. Nagpakaaron-ingnon si Jacob nga siya si Esau. Dili na kaayo makakita si Isaac niining panahona kay tigulang naman kaayo siya. Unya gisul-ob ni Jacob ang sinina ni Esau ug gibutangan niya ug panit sa kanding ang iyang liog ug mga bukton.

Miduol si Jacob kang Isaac ug miingon, “Ako si Esau ug miduol ako kanimo aron nga imo akong panalanginan.” Sa dihang nahikapan ni Isaac ang balahibo sa kanding ug nasimhutan niya ang sinina, sa iyang hunahuna si Esau kadto ug iya siyang gipanalanginan.

Gidumtan ni Esau si Jacob tungod kay giilog niya ang katungod sa pagkamagulang ug ang iyang panalangin. Busa nagplano si Esau nga patyon niya si Jacob kong mamatay na ang ilang amahan.

Apan nahibaloan ni Rebeca ang plano ni Esau, busa gipalakaw niya ug ni Isaac si Jacob ngadto sa layong dapit ug didto magpuyo sa iyang paryente.

Nagpuyo si Jacob sa daghang mga katuigan didto sa mga paryente ni Rebeca. Unya naminyo siya ug nakaanak ug dose ka lalaki ug usa ka babaye. Gipadato siya sa Dios ug maayo.

Human sa 20 ka tuig sukad sa pagbiya ni Jacob sa ilang panimalay sa Canaan, mibalik siya didto uban sa iyang pamilya, mga sulugoon, ug sa tanan nga mga mananap.

Nahadlok pag-ayo si Jacob kay naghunahuna siya nga nagpabilin si Esau sa pagtinguha sa pagpatay kaniya. Migahin siya ug mananap nga ihatag niya kang Esau, ug gipadala niya sa iyang mga sulugoon ngadto kang Esau uban sa iyang mensahe kaniya, “Ang imong sulugoon nga si Jacob nagpadala kanimo niining mga mananap, ug padulong na siya dinhi.”

Apan gipasaylo na diay ni Esau si Jacob, ug malipayon kaayo ang matag-usa kanila nga nagkita. Nagpuyo si Jacob nga malinawon didto sa Canaan. Unya namatay si Isaac ug gilubong siya ni Jacob ug ni Esau. Ang saad sa kasabotan sa Dios kang Abraham napasa ngadto kang Jacob gikan kang Isaac.

Istorya gikan sa Biblia: Genesis 25:27-33:20