12. Ang Pagbiya

Malipayon kaayo nga mibiya ang mga Israelita sa Ehipto. Gawasnon na sila gikan sa ilang pagkaulipon ug nagpadulong sila sa Yutang Saad! Ang mga Ehiptohanon naghatag ug bisan unsa nga ilang gipangayo, bisan ug bulawan, plata ug uban nga mga mahalong butang. Anaay mga katawhan nga gikan sa uban nga mga nasod nga mituo sa Dios ug mikuyog sa mga Israelita sa dihang mibiya sila sa Ehipto.

Ang Dios naggiya kanila pinaagi sa taas nga haligi nga panganod nga nag-una kanila panahon sa adlaw, ug mahimong taas nga haliging kalayo nga mohatag kanila ug kahayag panahon sa kagabhion. Ang Dios naggiya ug nag-uban kanila sa ilang paglakaw. Ang buhaton lang nila mao ang pagsunod kaniya.

Wala madugay, nausab ang hunahuna ni Paraon ug sa iyang mga katawhan, ug gusto nilang maulipon pag-usab ang mga Israelita. Gipagahi sa Dios si Paraon aron makita sa katawhan nga siya lamang ang tinuod nga Dios, ug aron ilang masabtan nga siya, si Yahweh, gamhanan pa kay kang Paraon ug sa iyang mga dios-dios.

Mao nga gigukod ni Paraon uban sa iyang mga kasundalohan ang mga Israelita aron himuon nila nga ulipon pag-usab. Sa pagkakita sa mga Israelita nga nagpadulong na kanila ang mga kasundalohan sa Ehipto, naamgohan nila nga napataliwad-an na sila sa mga kasundalohan ni Paraon ug sa Pulang Dagat. Silang tanan nangahadlok kaayo ug nanghilak, ug miingon, “Nganong mibiya pa man kita sa Ehipto? Mangamatay na kita!”

Giingnan ni Moises ang mga Israelita, “Ayaw kamog kahadlok! Ang Dios makig-away ug magluwas kaninyo karong adlawa.” Unya ang Dios nag-ingon kang Moises, “Ingna ang katawhan nga mopadayon sa paglakaw ngadto sa Pula nga Dagat.”

Unya gibutang sa Dios ang haliging panganod taliwala sa mga Israelita ug mga Ehiptohanon aron dili makita sa mga Ehiptohanon ang mga Israelita.

Giingnan si Moises sa Dios nga ipataas ang iyang kamot ibabaw sa dagat, ug mabahin ang tubig. Unya gipahangin sa Dios aron matulak ang tubig sa dagat ngadto sa tuo ug ngadto sa wala, hinungdan nga nahimo ang dalan taliwala sa dagat.

Ang mga Israelita naglakaw sa tunga sa dagat nga uga ang agianan ug dihay pader nga tubig sa ilang isigkakilid.

Unya gikuha sa Dios ang panganod pataas aron makita sa mga Ehiptohanon ang mga Israelita nga nagpalayo. Ang mga Ehiptohanon nakahukom nga gukdon nila sila.

Busa gisundan nila ang mga Israelita ngadto sa dalan agi sa dagat, apan gibuhat sa Dios nga matarantar ang mga Ehiptohanon ug wala niya gipatuyok ang ligid sa ilang mga karwahe. Naninggit sila, “Managan ta! Ang Dios nakig-away kanato alang sa mga Israelita!”

Sa dihang nakatabok na ang tanan nga mga Israelita nga luwas ngadto sa pikas nga bahin sa dagat, nag-ingon ang Dios kang Moises nga ituy-od niya ang iyang kamot pag-usab. Sa dihang mituman siya, ang tubig mihampak ngadto sa mga sundalong Ehiptohanon ug mibalik kini sa naandan nga porma. Nangalumos ang tanang sundalo sa Ehipto.

Sa dihang nakita sa mga Israelita nga nangamatay ang mga Ehiptohanon, silang tanan nagsalig sa Dios ug nagtuo nga si Moises usa ka propeta sa Dios.

Ang mga Israelita nagmaya sa tumang kalipay, tungod sa pagluwas sa Dios kanila gikan sa kamatayon ug pagkaulipon. Karon gawasnon na sila nga moalagad sa Dios. Ang mga Israelita nanag-awit ug daghan nga mga awit aron sa pagsaulog sa bag-ong kagawasan ug aron magdayeg sa Dios tungod kay giluwas sila gikan sa mga sundalo nga mga Ehiptohanon.

Ang Dios nagmando sa mga Israelita sa pagsaulog sa pagsaylo sa matag tuig aron sa paghinumdom sa kadaogan nga gihatag sa Dios kanila gikan sa mga Ehiptohanon ug pagluwas kanila gikan sa pagkaulipon. Nagsaulog sila pinaagi sa pag-ihaw ug hingpit nga nating karnero, ug kaonon nila kini uban sa pan nga walay patubo, ug magsulti kung giunsa sila pagluwas sa Dios.

Istorya gikan sa Biblia : Exodus 12:33-15:21