44. Giayo ni Pedro ug ni Juan ang Bakol
Usa ka adlaw niana, niadto si Pedro ug Juan sa Templo. Sa dihang duol na sila sa ganghaan sa Templo, nakita nila ang tawong bakol nga nagpakilimos.
Gitan-aw ni Pedro ang tawong bakol ug miingon, “Wala akoy kuwarta nga ikahatag kanimo. Apan ihatag ko kanimo kung unsa ang ania kanako. Sa ngalan ni Jesus, tindog ug lakaw!”
Dihadiha dayon, giayo sa Dios ang bakol ug nagsugod siya’g lakaw ug naglukso-lukso sa palibot tungod sa kalipay, ug gidayeg niya ang Dios. Natingala ang mga tawo didto sa hawanan sa templo.
Nagdali-dali ang katawhan nga motan-aw sa tawo nga naayo. Miingon si Pedro kanila, “Nganong natingala man kamo nga naayo kining tawhana? Wala namo siya giayo tungod sa among gahom o kamaayo, kondili pinaagi sa gahom ni Jesus ug sa pagtuo nga gihatag ni Jesus ang nakaayo niining tawhana.
“Kamo ang nag-ingon sa Romanong gobernador nga patyon si Jesus. Gipatay ninyo ang tawo nga tinubdan sa kinabuhi, apan gibanhaw siya sa Dios gikan sa mga patay. Bisan tuod wala kamo makasabot sa inyong gibuhat, apan gigamit kini sa Dios aron matuman ang gipanagna nga ang Mesiyas mag-antos ug mamatay. Busa karon, paghinulsol ug balik sa Dios aron mahinloan ang inyong mga sala.”
Nasuko ang mga pangulo sa Templo sa mensahe ni Pedro ug Juan. Busa gidakop nila sila ug gipriso. Apan daghan ang mituo sa mensahe ni Pedro ug miabot sa 5,000 ang gidaghanon sa mga lalaki nga mituo kang Jesus.
Sa pagkasunod nga adlaw, gidala si Pedro ug si Juan sa mga pangulo sa mga Judio sa labaw’ng pari ug sa uban pa nga relihiyosong pangulo. Nangutana sila kang Pedro ug Juan, “Pinaagi sa unsa nga gahom ninyo giayo kining tawong bakol?”
Mitubag si Pedro kanila, “Kining tawhana nga nagtindog sa inyong atubangan naayo pinaagi sa gahom ni Jesus, ang Mesiyas. Gilansang ninyo siya sa krus, apan gibanhaw siya sa Dios. Gisalikway ninyo siya apan walay lain nga paagi ang makaluwas kanato gawas lang sa gahom ni Jesus!”
Natingala ang mga pangulo kang Pedro ug Juan nga wala gayod silay kahadlok sa pagsulti tungod kay nasayod man sila nga kining duha yano lang nga mga tawo ug dili edukado. Apan ilang nahinumdoman nga kining mga tawhana kauban ni Jesus. Human nila gihulga si Pedro ug Juan, gipalakaw na nila sila.
Ang Istorya gikan sa Biblia: Buhat 3:1-4:22