21. Ang Gisaad sa Dios nga Mesiyas

Gikan pa sa sinugdanan, giplano nang daan sa Dios ang pagpadala ug Mesiyas. Ang unang saad bahin sa Mesiyas nahitabo ngadto kang Adan ug Eva. Nagsaad ang Dios nga matawo ang kaliwat ni Eva nga maoy modugmok sa ulo sa bitin. Ang bitin mao si Satanas nga mao ang naglimbong kang Eva. Ang saad nagpasabot nga pildihon gayod sa Mesiyas si Satanas.

Nagsaad ang Dios kang Abraham nga panalanginan niya ang tanang pundok sa katawhan sa kalibotan pinaagi kaniya. Matuman kining panalangin kung mobalik na ang Mesiyas sa dili madugay. Himuon niya nga posible alang sa mga tawo gikan sa matag pundok sa katawhan sa kalibotan aron nga maluwas.

Nagsaad usab ang Dios kang Moises nga moabot ang panahon nga magtuboy siya ug lahi nga propeta sama kang Moises. Mao na kini ang laing saad bahin sa Mesiyas nga moabot sa ulahing panahon.

Nagsaad usab ang Dios kang Haring David nga ang usa sa iyang mga kaliwat ang maghari sa katawhan sa Dios sa walay kataposan. Nagpasabot kini nga ang Mesiyas kaugalingon nga kaliwat ni David.

Nagsaad ang Dios nga pinaagi kang propeta Jeremias nga maghimo siya ug Bag-ong Kasabotan, apan lahi na kini nga kasabotan sa Dios sa Israel nga gihatag niya didto sa Bukid sa Sinai. Diha sa Bag-ong Kasabotan, isulat sa Dios ang iyang balaod diha sa kasingkasing sa mga tawo, ug mailhan mismo sa katawhan ang Dios, mahimo sila nga iyang katawhan, ug pasayluon sa Dios ang ilang mga sala. Ang Mesiyas mao ang magsugod sa Bag-ong Kasabotan.

Nag-ingon usab ang mga propeta sa Dios nga ang Mesiyas usa ka propeta, pari, ug hari. Ang propeta usa ka tawo nga makadungog sa pulong sa Dios ug unya imantala niya ang pulong sa Dios ngadto sa mga tawo. Ang Mesiyas nga gisaad sa Dios nga ipadala mao ang mahimong hingpit nga propeta.

Maghalad ang mga Israelinhong pari ngadto sa Dios alang sa mga tawo ingon nga puli sa silot sa ilang mga sala. Nag-ampo usab ang mga pari ngadto sa Dios alang sa mga tawo. Ang Mesiyas mao gayod ang mahimong hingpit nga labaw’ng pari ug siya ang mohalad sa iyang kaugalingon ingon nga hingpit nga halad ngadto sa Dios.

Ang hari usa ka tawo nga magmando ibabaw sa usa ka gingharian ug mohukom sa mga tawo. Ang Mesiyas mao gayod ang mahimong hingpit nga hari nga maglingkod sa trono sa iyang katigulangan nga si David. Maghari siya sa tibuok kalibotan sa walay kataposan, ug kanunay nga matinud-anon sa iyang paghukom ug maayo ang iyang pagabuhaton.

Gitagna na sa mga propeta sa Dios ang daghang mga butang mahitungod sa Mesiyas. Gisulti na daan ni propeta Malaquias nga ang bantogang propeta mouna pag-abot sa Mesiyas. Gipanagna ni propeta Isaias nga matawo ang Mesiyas sa babayeng ulay. Si propeta Miqueas usab miingon nga didto siya matawo sa lungsod sa Betlehem.

Miingon si Propeta Isaias nga ang Mesiyas mopuyo sa Galilea, mohupay sa nasakitan nga mga tawo, ug momantala sa kagawasan ngadto sa mga dinakpan ug mopagawas sa mga piniriso. Gitagna usab niya nga ang Mesiyas mag-ayo sa mga tawong masakiton ug niadtong mga bungol, buta, amang, ug mga bakol.

Gitagna usab ni propeta Isaias nga ang Mesiyas dumtan ug isalikway bisan walay igong rason. Gitagna na daan sa uban nga mga propeta nga kadtong mopatay sa Mesiyas magripa aron nga bahinon ang iyang sanina ug budhian sa iyang higala. Gitagna usab ni propeta Zacarias nga bayaran ang iyang higala ug 30 ka salapi ingon nga bayad sa pagluib sa Mesiyas.

Ang mga propeta misulti usab kung sa unsang paagi mamatay ang Mesiyas. Gitagna ni Isaias nga luwaan siya sa mga tawo, biay-biayon ug bun-ogon ang Mesiyas. Dunggabon nila siya ug mamatay siya sa grabe nga pag-antos, bisan paman ug wala siya’y nabuhat nga sala.

Nag-ingon usab ang mga propeta nga putli ang Mesiyas, ug walay sala. Mamatay siya aron magdawat sa silot sa sala sa uban nga mga tawo. Ang iyang silot maoy maghatag ug kalinaw tali sa Dios ug sa tawo. Kay tungod niini, kabubut-on sa Dios nga mamatay ang Mesiyas.

Gitagna na sa mga propeta nga mamatay ang Mesiyas ug banhawon siya gikan sa mga patay. Pinaagi sa kamatayon sa Mesiyas ug sa pagkabanhaw, matuman sa Dios ang iyang plano nga luwason ang mga makasasala ug magsugod ang bag-ong kasabotan.

Gipadayag sa Dios sa mga Propeta ang daghan nga mga butang mahitungod sa Mesiyas, apan wala moabot ang Mesiyas sa panahon nga buhi pa ang mga propeta. Pagkahuman sa 400 ka tuig human gipadayag ang kataposan nga pagpanagna, gipadala sa Dios ang Mesiyas sa kalibotan sa sakto gayod nga panahon.

Istorya gikan sa Biblia: Genesis 3:15; 12:1-3; Deuteronomio 18:15; 2 Samuel 7; Jeremias 31; Isaias 59:16; Daniel 7; Malaquias 4:5; Isaias 7:14; Miqueas 5:2; Isaias 9:1-7; 35:3-5; 61; 53; Mga Salmo 22:18; 35:19; 69:4; 41:9; Zacarias 11:12-13; Isaias 50:6; Mga Salmo 16:10-11