43. Ang Pagsugod sa Simbahan

Pagkahuman sa pagbalik ni Jesus sa langit, nagpabilin lang ang mga tinun-an sa Jerusalem aron sa pagtuman sa sugo ni Jesus kanila. Ang mga magtutuo kanunay nagkatigom aron mag-ampo.

Kada tuig, 50 ka adlaw human sa Paglabay sa Anghel, ang mga Judio nagsaulog sa usa ka importante nga adlaw nga gitawag ug Pentecostes. Ang pentecostes mao ang panahon sa dihang isaulog sa mga Judio ang pag-ani sa trigo. Moabot ang mga Judio gikan sa tibuok kalibotan didto sa Jerusalem aron sa pagsaulog sa Pentecostes. Kining tuiga, ang panahon alang sa Pentecostes miabot nga hapit usa ka semana human sa pagbalik ni Jesus ngadto sa langit.

Samtang ang mga magtutuo nagtapok-tapok, sa kalit lang sa sulod sa balay nga ilang gisilongan napuno uban sa usa ka tingog nga sama sa naghaguros nga hangin. Ug unya sa ulo sa mga magtutuo adunay nakita nga sama sa siga sa kalayo ibabaw sa ilang ulo. Napuno sila sa Balaang Espiritu ug nagsugod silag sulti sa nagkalainlaing mga pinulongan.

Sa pagkadungog sa mga tawo sa Jerusalem sa kasaba, ang grupo sa mga tawo nagduol aron masusi kung unsa ang nagakahitabo. Sa pagkadungog sa mga tawo sa mga magtutuo nga nagmantala sa mga talagsaon nga mga buhat sa Dios, nahibulong sila nga nadungog nila ang ilang kaugalingong pinulongan.

Ang uban sa mga tawo nagpasangil sa mga tinun-an nga sila nahubog. Apan si Pedro mitindog ug miingon kanila, “Paminaw kamo kanako! Kining mga tawhana dili hubog! Nagtuman kini sa propesiya nga gibuhat sa propeta nga si Joel diin nag-ingon ang Dios nga, ‘Sa ulahing mga adlaw, akong ibubo ang akong Espiritu.’”

“Katawhan sa Israel, si Jesus usa ka tawo nga nagbuhat sa daghan nga gamhanang mga ilhanan ug kahibulongan nga mga buhat pinaagi sa gahom sa Dios, sama sa inyong nakita ug nadunggan. Apan gilansang ninyo siya!"

Bisan tuod ug namatay si Jesus, gibanhaw siya sa Dios. Ug matuman ang propesiya nga nag-ingon, ‘Dili nimo itugot nga madunot ang Balaan mong pinili didto sa lubnganan.’ Saksi kami sa kamatuoran nga gibanhaw pag-usab si Jesus sa Dios.”

Ug karon gibayaw na si Jesus sa tuong kamot sa Dios nga Amahan. Ug gipadala ni Jesus ang Balaang Espiritu sama sa iyang gisaad kanato nga iyang pagahimuon. Ang Balaang Espiritu mao ang hinungdan sa mga butang nga inyong nakit-an ug nadunggan karon.”

“Inyong gilansang sa krus si Jesus. Apan angay kamo nga masayod nga gihimo sa Dios si Jesus nga Ginoo ug Mesiyas!”

Natandog ang kasingkasing sa mga tawo nga naminaw kang Pedro. Gipangutana nila si Pedro ug ang mga tinun-an, “Mga igsoon, unsa man ang angay namo nga buhaton?”

Gitubag sila ni Pedro, “Kinahanglan nga maghinulsol kamong tanan ug magpabawtismo sa ngalan ni Jesu-Cristo aron ang Dios magpasaylo sa inyong mga sala. Ug unya ihatag usab niya kaninyo ang gasa sa Balaang Espiritu.”

Mga 3,000 ka mga tawo ang mituo sa giingon ni Pedro ug nahimo silang mga tinun-an ni Jesus. Gibawtismohan sila ug naapil na sila sa mga magtutuo sa Jerusalem.

Nagpadayon sa pagpaminaw ang mga tinun-an sa mga pagpanudlo sa mga apostoles, kanunay silang nagtigom, nangaon ug nag-ampo sa matag usa. Malipayon sila nga nagkauban sa pagdayeg sa Dios ug nag-ambit sila sa tanan nga anaa kanila. Nagkauyon silang tanan. Kada adlaw nadugangan ang mga magtutuo.

Ang Istorya gikan sa Biblia: Buhat 2