30. Gipakaon ni Jesus ang 5,000 ka mga Tawo
Gipadala ni Jesus ang iyang mga tinun-an aron sa pagsangyaw ug pagtudlo sa mga tawo sa nagkadaiyang mga banay. Pagbalik nila sa dapit kung asa si Jesus, giingon nila ang ilang nabuhat. Sunod giawhag sila ni Jesus nga muoban kaniya sa hilom nga dapit tabok sa linaw ug nagpahulay kadyot. Nisakay sila sa bangka ug niadto sa pikas bahin sa linaw.
Apan adunay daghang tawo nga nakakita kang Jesus ug sa mga tinun-an nga nihawa sakay sa bangka patabok sa linaw. Ang mga tawo midagan duol sa baybayon sa linaw aron makauna sila ug abot sa pikas bahin sa linaw. Mao nga pag-abot ni Jesus ug ang mga tinun-an, dakong grupo sa mga tawo na ang anaa sa lugar, ug nag hulat kanila.
Sa panon sa mga tawo adunay 5,000 ka lalaki, wala pay labot niini sa pag-ihap ang babae ug mga bata. Si Jesus gibati ug kaluoy sa mga tawo. Alang kang Jesus, ang mga tawo sama sa usa ka karnero nga walay magbalantay. Mao nga gitudloan niya sila ug gi-ayo ang adunay balatian.
Pagkahapon na, ang mga tinun-an miingon kang Jesus, "Lampas na sa adlaw ug wala pay lungsod nga duol diri. Palakwa nalang ang mga tawo aron makapangita silag pagkaon."
Apan nag-ingon si Jesus sa mga tinun-an, "Hatagi sila ug pagkaon!" Sila mitubag, "Unsaon man namo ni? Aduna lamang kami lima ka pan ug duha ka gagmay nga isda."
Unya giingnan ni Jesus ang iyang mga tinun-an nga sultihan ang mga tawo nga molingkod sa sagbot, sa grupo nga tag 50 ka tawo.
Unya gikuha ni Jesus ang lima ka pan ug ang duha ka isda, ug nihangad sa langit, ug nagpasalamat sa Dios sa pagkaon.
Ug gipikas-pikas ni Jesus ang pan ug ang isda. Gihatag niya kini sa mga tinun-an aron ihatag sa mga tawo. Giapod-apod sa mga tinun-an ang pagkaon ug wala gayod kini mahurot! Nagkaon ang tanang tawo ug nabusog kaayo.
Pagkahuman, gikolekta sa mga tinun-an ang mga pagkaon nga wala nakaon ug aduna pay dose ka basket ang nabilin. Ang tanan nga pagkaon gikan lamang sa lima ka pan ug duha ka isda.
Istorya gikan sa Biblia: Mateo 14:13-21; Marcos 6:31-44; Lucas 9:10-17; Juan 6:5-15