47. Si Pablo Ug Silas Sa Filipos

Gigamit ni Saulo ang iyang Romano nga ngalan nga “Pablo” samtang nagbiyahe siya sa tibuok nga Gingharian sa Roma. Usa ka adlaw niana, miadto si Pablo ug ang iyang higala nga si Silas sa lungsod sa Filipos aron magsangyaw sa maayong balita mahitungod kang Jesus. Miadto sila sa lugar nga daplin sa sapa gawas sa siyudad diin nagtapok ang mga tawo aron mag-ampo. Nakita nila didto ang usa ka babaye nga ang ngalan Lydia nga usa ka negosyante. Nahigugma siya ug nagsimba sa Dios.

Giablihan sa Dios ang kasingkasing ni Lydia aron magtuo mahitungod kang Jesus, unya siya ug ang iyang pamilya gibawtismohan. Iyang gidapit sila Pablo ug Silas nga mopuyo sa ilang balay, busa namuyo sila uban kaniya ug sa iyang pamilya.

Kanunay magkita sila Pablo ug Silas uban sa mga tawo sa lugar diin sila mag-ampo. Kada adlaw sa ilang paglakaw padulong didto, adunay babayeng ulipon nga nayawaan nga nagsunod-sunod kanila. Pinaagi niining demonyo makatagna siya sa kaugmaon sa katawhan. Busa nakakuwarta ang iyang mga agalon ingon nga usa ka mananagna.

Kada agi nila Pablo ug Silas, mosinggit ang babayeng ulipon, “Kining mga tawhana mao ang mga sulugoon sa Labing Halangdon nga Dios. Nagsulti sila sa paagi nga maluwas kamo!” Kanunay niya kining gibuhat mao nga naglagot na si Pablo.

Busa usa ka adlaw niana, samtang misugod na pud ug singgit ang babayeng ulipon, milingi si Pablo kaniya ug giingnan ang demonyo nga anaa kaniya, “Sa ngalan ni Jesus, gawas gikan kaniya!” Dihadiha dayon mibiya ang demonyo sa babayeng ulipon.

Nasuko pag-ayo ang mga agalon sa babayeng ulipon! Nakahunahuna sila nga kung wala na ang demonyo, dili na makatagna ang babayeng ulipon sa kaugmaon sa mga tawo. Nagpasabot kini nga dili na mohatag ang mga tawo ug kuwarta sa tag-iya sa babayeng ulipon nga iyang tagnaan kung unsa ang mahitabo sa umaabot.

Busa ang agalon sa babayeng ulipon nagdala kang Pablo ug Silas ngadto sa Romanong awtoridad, nga mao ang nagkulata ug nagbutang kanila sa prisohan.

Sila Pablo ug Silas gibutang sa pinakasuok nga bahin sa prisohan ug gikadenahan ang ilang mga tiil. Apan pagkatungang gabii, nagkanta sila ug mga awit alang sa pagdayeg sa Dios.

Sa kalit lang, adunay makusog nga linog! Ang tanan nga pultahan sa prisohan naabli, ug ang mga kadena sa mga piniriso nangatangtang.

Nakamata ang tigbantay sa prisohan, nahadlok siya kay nakita niya nga naabli ang mga pultahan! Nakahunahuna siya nga nakaikyas ang tanang piniriso, busa nagplano siya nga magpakamatay. (Nasayod siya nga patyon siya sa Romanong awtoridad kung makaikyas ang tanang piniriso.) Apan nakita siya ni Pablo ug misinggit, “Hunong! Ayaw pasakiti ang imong kaugalingon. Ania kaming tanan dinhi.”

Nangurog nga miduol ang tigbantay sa prisohan kang Pablo ug Silas ug nangutana, “Unsa ang angay nakong buhaton aron maluwas?” Mitubag si Pablo, “Tuo kang Jesus, ang Agalon, unya ikaw ug ang imong pamilya maluwas.” Gidala sa tigbantay sa prisohan sila Pablo ug Silas sa iyang balay ug gitambalan niya ang ilang mga samad. Nagsangyaw si Pablo sa maayong balita mahitungod kang Jesus sa tanang tawo didto sa iyang balay.

Ang tigbantay sa prisohan ug ang tibuok niyang pamilya mituo kang Jesus ug nagpabawtismo. Unya gipakaon niya sila Pablo ug Silas ug nagmalipayon silang tanan.

Sa pagkasunod adlaw, gibuhian na sa mga pangulo sa siyudad sila Pablo ug Silas gikan sa prisohan. Ug giingnan sila nga mobiya sa Filipos. Nibisita sila Pablo ug Silas kang Lydia ug sa uban nga mga higala, una sila nilakaw sa siyudad. Nikatag na ang maayong balita mahitungod kang Jesus ug nagkadaghan na ang Simbahan.

Miadto si Pablo ug ang uban nga mga pangulo sa mga Kristohanon sa nagkalain-lain nga mga siyudad. Nagsangyaw ug nagtudlo sila sa mga tawo sa maayong balita mahitungod kang Jesus. Nagsulat usab sila sa mga magtutuo sa mga kasimbahanan aron madasig ug matudloan sila. Ang pipila niining mga sulat nahimong mga libro sa Biblia.

Ang Istorya gikan sa Biblia: Buhat 16:11-40