33. Ang Istorya Mahitungod sa Mag-uuma

Usa ka adlaw, gitudloan ni Jesus ang dakong pundok sa mga tawo duol sa baybayon sa linaw. Daghan kaayo ug tawo nga miadto aron maminaw kaniya nga kinahanglan pa niya mosakay sa daplin sa bangka nga anaa sa tubig aron aduna siyay dako nga lugar sa pag-istorya kanila. Milingkod siya sa bangka ug gitudloan ang mga tawo.

Giingon kini ni Jesus nga istorya. "Ang mag-uuma nagtanom ug binhi. Samtang gisabwag niya ang mga binhi, ang ubang binhi nahulog sa dalan, unya niabot ang mga langgam ug gikaon kadto nga mga binhi."

"Ang ubang binhi nahulog sa kabatohan, diin gamay lamang ang yuta. Ang mga binhi nga anaa sa kabatohan niturok ug dali, apan ang ilang gamot wala naayo pagtanom sa yuta. Nigawas ang adlaw ug niinit, ang tanang tanom nalaya ug namatay.

"Ang ubang binhi nahulog usab sa kasampinitan. Niturok kadto nga mga binhi, apan gitabunan ug gituok kini sa mga sagbot. Mao nga ang tanom nga nitubo sa binhi sa kasampinitan nga yuta wala namunga."

"Ang ubang binhi nahulog sa maayong yuta. Kini nga binhi mitubo ug nag-ani ug 30, 60, o bisag 100 ka daghan nga trigo. Kinsa kaninyo ang naay dalunggan, pamati! "

Kini nga istorya nagpalibog sa mga tinun-an. Mao nga gipasabot sila ni Jesus, "Ang binhi mao ang pulong sa Dios. Ang dalan mao ang tawo nga nakadungog sa pulong, apan wala makasabot niini, ug ang pulong gikuha sa demonyo kaniya."

"Ang kabatohan mao ang tawo nga nakadungog sa pulong sa Dios ug gidawat niya kini nga malipayon. Apan sa dihang nakabaton siya ug kalisdanan ug paglutos, siya niundang."

"Ang yutang tunokon mao ang tawo nga nakadungog sa pulong sa Dios, apan sa paglabay sa panahon, mga suliran, mga bahandi, ug kailibgon sa kinabuhi maoy mipahilayo kaniya sa iyang gugma sa Dios. Tungod niini, ang pulong nga iyang nadunggan wala makapamunga.

"Apan ang maayong yuta mao ang tawo nga nakadungog sa pulong sa Dios, nituo niini, ug nakapamunga."

Istorya gikan sa Biblia: Mateo 13:1-8, 18-23; Marcos 4:1-8, 13-20; Lucas 8:4-15