31. Nilakaw si Jesus sa Tubig

Apan gisultihan ni Jesus ang mga Tinun-an nga mosakay na sa bangka ug maglayag sa pikas nga baybayon sa linaw samtang gipapauli na niya ang mga tawo. Pagkahuman nga nanguli na ang mga tawo, nitungas si Jesus sa bungtod aron moampo. Siya nag-inusara, ug nag-ampo hangtod lampas na sa gabii.

Niadtong tungora ang mga tinun-an kamulo sa pagsagwan sa ilang bangka, naabtan sila ug lampas na sa gabii apan naa ra gihapon sila sa tunga sa linaw. Naglisod sila pag-ayo ug sagwan tungod kay ang hangin naghuyop padulong kanila.

Pagkahuman ni Jesus ug ampo miadto siya sa mga tinun-an. Naglakaw siya sa tubig patabok sa linaw ngadto sa ilang bangka!

Nahadlok ang mga tinun-an pagkakita nila kang Jesus, tungod kay nagtuo sila nga nakakita silag multo. Nakahibalo si Jesus nga sila nahadlok, mao nga gitawag niya sila ug miingon, "Ayaw kamo ug kahadlok. Ako kini!"

Unya miingon si Pedro kang Jesus, "Ginoo, kung ikaw kana, ingna ko nga moadto kanimo diha sa tubig." Miingon si Jesus kang Pedro, "Ali diri!"

Mao nga si Pedro naghawa sa bangka ug nagsulay ug lakaw padulong kang Jesus sa tubig. Apan paghuman niya ug lakaw sa mubo lamang nga distansya, gibalhin niya ang iyang panan-aw sa mga balod ug kusog nga hangin imbis nga kang Jesus.

Unya si Pedro nakabati ug kahadlok mao nga naunlod siya sa tubig. Nisyagit siya, "Ginoo, luwasa ako! Diha-diha dayon gibira siya ni Jesus. Unya miingon siya kang Pedro, "Kagamay ba sa imong pagtuo, nganong nagduha-duha man ka?”

Pagsakay ni Pedro ug ni Jesus sa bangka, ang hangin nikalit lang ug undang ug ang tubig nahimong kalmado. Ang mga tinun-an nahibulong. Ilang gisimba si Jesus, ug miingon, "Tinuod gayod nga ikaw ang anak sa Dios.”

Istorya gikan sa Biblia: Mateo 14:22-33; Marcos 6:45-52; Juan 6:16-21