6. Maayo ang Dios kang Isaac

Sa dihang tigulang na kaayo si Abraham, ang iyang anak nga lalaki nga si Isaac ulitawo na. Gipaadto ni Abraham ang usa sa iyang mga sulugoon ngadto sa yuta nga gipuy-an sa iyang mga paryente, aron sa pagpangita ug babaye nga ipaasawa sa iyang anak nga si Isaac.

Human sa taas nga panaw didto sa yuta kung asa nagpuyo ang mga paryente ni Abraham, gitultolan sa Dios ang sulugoon ngadto kang Rebeca. Apo nga babaye siya sa igsoong lalaki ni Abraham.

Miuyon si Rebeca nga mobiya sa iyang pamilya, ug miuban sa sulugoon balik ngadto sa panimalay ni Isaac. Pag-abot niya, gipangasawa dayon siya ni Isaac.

Human sa taas nga panahon, namatay si Abraham ug ang tanang saad sa Dios nga gihimo kaniya diha sa kasabotan napasa ngadto kang Isaac. Gisaaran sa Dios si Abraham nga makaangkon siya ug dili maihap nga mga kaliwatan, apan ang asawa ni Isaac nga si Rebeca wala pa makabaton ug anak.

Nag-ampo si Isaac alang kang Rebeca, ug ang Dios nagtugot kaniya nga magsabak ug kaluha. Nag-away ang duha ka bata samtang anaa pa sila sa sabakan ni Rebeca, busa nangutana si Rebeca sa Dios kung unsa ang nahitabo.

Giingnan sa Dios si Rebeca, “Duha ka nasod ang moabot gikan sa duha nimo ka mga anak nga lalaki nga anaa sa imong sabakan. Mag-away silang duha, ug ang magulang nga lalaki maoy mag-alagad sa iyang manghod.”

Unya natawo ang kaluha nga bata ni Rebeca. Ang magulang nga batang lalaki nga una migawas, pulahon ug balahiboon, ug ginganlan siya ug Esau. Unya migawas usab ang manghod nga lalaki nga migunit sa tikod ni Esau, ug ginganlan siya ug Jacob.

Istorya gikan sa Biblia : Genesis 24:1-25:26