40. Gilansang sa Krus Si Jesus

Pagkahuman nila ug bugal-bugal kang Jesus, gihatod nila siya aron ilansang sa krus. Gipapas-an nila kaniya ang krus diin siya ilansang ug mamatay.

Gidala sa mga sundalo si Jesus didto sa lugar nga ginganlan ug "ang Bagolbagol" ug gilansang ang iyang mga kamot ug mga tiil sa krus. Apan si Jesus miingon, "Amahan, pasayloa sila, tungod kay wala sila makabalo sa ilang ginabuhat." Si Pilato nagsugo nga ilang isulat, "Hari sa mga Judio" sa karatola nga ibutang sa uluhan sa krus ni Jesus.

Ang mga sundalo nagripa alang sa sinina ni Jesus. Samtang ginabuhat nila kini, gituman nila ang propesiya nga nag-ingon, "Gibahinbahin nila ang akong mga sinina taliwala kanila, ug nagripa alang sa akong sinina."

Gilansang si Jesus taliwala sa duha ka tulisan. Ang usa kanila nagbugalbugal kang Jesus, apan ang usa miingon, "Wala ka bay kahadlok sa Dios? Sad-an kita, apan kining tawhana walay sala." Unya miingon siya kang Jesus, "Palihog hinumdomi ako sa imong gingharian." Mitubag si Jesus, "Karon makauban ka kanako sa Paraiso."

Ang mga pangulo sa Judio ug ang ubang tawo nagbugalbugal kang Jesus. Miingon sila kaniya, "Kung ikaw ang Anak sa Dios, kanaog diha sa krus ug luwasa ang imong kaugalingon! Unya ayha kami mutuo kanimo."

Unya ang langit sa tibuok rehiyon ningitngit gayod, bisan sa kaudtohon. Ningitngit ang kaudtohon ug nagpabilin ang kangitngit sulod sa tulo ka oras.

Unya misinggit si Jesus, "Natapos na! Amahan, itugyan ko na sa imong mga kamot ang akong espiritu." Unya miduko sa iyang ulo ug gitugyan ang iyang espiritu. Sa pagkamatay niya, adunay usa ka linog ug ang dakong kurtina nga nagbulag sa mga tawo gikan sa presensiya sa Dios diha sa Templo natunga sa makaduha, nga gikan sa taas hangtod sa ubos.

Pinaagi sa iyang kamatayon, si Jesus nag-abli sa usa ka dalan alang sa mga tawo aron makaduol sa Dios. Sa pagkakita sa sundalo nga nagbantay kang Jesus sa tanang nahitabo, miingon siya, "Sa pagkatinuod, kining tawhana walay sala. Siya gayod ang Anak sa Dios."

Unya si Jose ug Nicodemus, ang duha ka mga pangulo sa Judio nga nagtuo nga si Jesus mao ang Mesiyas, naghangyo kang Pilato alang sa lawas ni Jesus. Giputos nila ang lawas ni Jesus sa usa ka panapton ug gibutang kini sa usa ka lubnganan nga hinimo gikan sa bato. Unya giligid nila ang dakong bato aron motabon sa pultahan sa lubnganan.

Ang Istorya gikan sa Biblia: Mateo 27:27-61; Marcos 15:16-47; Lucas 23:26-56; Juan 19:17-42