23. Ang Pagkatawo ni Jesus
Napamalay-an na si Maria sa usa ka tawo nga matarong nga si Jose. Sa pagkadungog niya nga mabdos si Maria, nakahibalo gayod siya nga dili niya anak ang maong bata. Apan dili niya gusto nga mapakaulawan si Maria, busa naghunahuna siya nga bulagan niya si Maria sa tago lamang. Apan sa wala pa niya kini mahimo, giadtoan siya sa anghel ug nakigsulti kaniya pinaagi sa usa ka damgo.
Sa iyang damgo, miingon ang anghel, “Jose, ayaw pagduha-duha sa pagpangasawa kang Maria. Gikan sa Balaang Espiritu ang iyang gisabak. Manganak siya ug lalaki. Nganli siya ug Jesus (nga nagpasabot, ‘Manluluwas si Yahweh’), tungod kay luwason niya ang mga tawo gikan sa ilang mga sala.”
Busa giminyoan ni Jose si Maria ug gidala sa iyang panimalay ingon nga iyang asawa, apan wala niya siya hilabti hangtod nga nanganak na siya.
Sa dihang hapit na manganak si Maria, miingon ang gobiyerno sa Roma nga kinahanglan nga magpalista ang tanan didto sa lungsod diin nagpuyo ang ilang katigulangan. Busa kinahanglan mobiyahe ug layo si Jose ug si Maria gikan sa ilang gipuy-an sa Nazaret ngadto sa Betlehem tungod kay didto man natawo ang ilang katigulangan nga si David.
Sa pag-abot nila sa Betlehem, wala na sila’y kadayonan nga balay. Ang dapit nalang nga ilang nakaplagan mao ang puy-anan sa mga mananap. Natawo ang bata didto ug gibutang siya sa iyang inahan didto sa pasungan, tungod kay wala na sila’y higdaanan alang kaniya. Ug ginganlan nila siya ug Jesus.
Nianang gabhiona, adunay mga magbalantay sa panon sa mga karnero nga nagbantay sa duol nga luna. Sa kalit lang, nagpakita kanila ang anghel nga sulaw kaayo tan-awon, ug nangahadlok sila. Miingon ang anghel, “Ayaw kamo kahadlok, tungod kay aduna akoy maayong balita alang kaninyo. Ang Mesiyas, nga mao ang Labaw sa Tanan, natawo na didto sa Betlehem!”
“Adtoa ninyo ug pangitaa ang bata, ug makita ninyo siya nga giputos sa panapton ug gipahigda sa pasungan.” Dihadiha dayon, napuno ang langit ug mga anghel nga nagdayeg sa Dios nga nag-ingon, “Himayaon ang Dios sa langit, ug kalinaw sa kalibotan ngadto sa mga tawo nga iyang gikaloy-an!”
Miabot ang mga magbalantay didto sa nahimutangan ni Jesus sa wala madugay ug nakita nila si Jesus nga naghigda sa pasungan, sumala sa giingon sa anghel kanila. Naghinamhinam kaayo sila. Unya namalik ang mga magbalantay sa kaumahan kung asa nahimutang ang ilang mga karnero, ug gidayeg nila ang Dios sa tanan nga ilang nadungog ug nakita.
Sa wala madugay, adunay maalamong mga tawo nga gikan sa mga nasod sa layong bahin sa sidlakan nga nakakita ug talagsaon nga bituon sa langit. Nasabtan nila nga nagpasabot kadto nga natawo ang bag-o nga hari sa mga Judio. Busa nanglakaw sila sa layong dapit aron sa pagpangita sa maong hari. Miadto sila sa Betlehem ug nakita nila ang balay nga nahimutangan ni Jesus ug sa iyang mga ginikanan.
Sa dihang nakita sa maalamong mga tawo si Jesus ug ang iyang inahan, nanghapa sila ug nagsimba kaniya. Gihatagan nila si Jesus ug mahalon nga mga gasa. Ug unya namauli na sila.
Istorya gikan sa Biblia: Mateo 1; Lucas 2