38. Ang Pagluib kang Jesus

Kada tuig, magsaulog ang mga Judio ug Pista sa Paglabay sa Anghel. Mao kini ang pagsaulog sa pagluwas sa Dios sa ilang mga katigulangan sa pagkaulipon sa Ehipto sa milabay nga daghang katuigan. Sa tulo ka tuig human si Jesus nagsugod sa pagwali ug pagtudlo sa publiko, gisultihan ni Jesus ang iyang mga tinun-an nga gusto niya nga isaulog ang Pista sa Paglabay sa Anghel sa Jerusalem kauban nila. Giingnan pud niya sila nga didto siya patyon.

Anaay usa ka tinun-an si Jesus nga ang ngalan kay Judas. Siya ang tigdumala sa kuwarta sa mga apostoles. Mahigugmaon siya sa kuwarta ug kanunay nga nangawat sa kuwarta nga iyang gigunitan. Kadtong niabot na sila Jesus ug ang mga sumusunod sa Jerusalem, niadto si Judas sa mga pangulo sa mga Judio ug iyang giluiban si Jesus ug gibaylo sa kuwarta. Kabalo siya nga wala giila sa mga pangulo sa mga Judio si Jesus nga Mesiyas ug nagplano sila nga patyon siya.

Ang mga pangulo sa mga Judio, nga gipangulohan sa labaw’ng pari, gibayaran nila si Judas ug 30 ka mga salapi aron magluib kang Jesus. Ang propesiya sa mga propeta kaniadto nahitabo na. Nisugot si Judas, gidawat ang kwarta ug nilakaw. Naghunahuna na siya ug kahigayonan sa pagtabang kanila nga madakop si Jesus.

Gisaulog ni Jesus kauban sa iyang mga tinun-an ang Pista sa Paglabay sa Anghel didto sa Jerusalem. Kadtong nangaon na sila, mikuha si Jesus ug pan ug iya kining gipikas-pikas. Miingon siya, “Pagkuha kamo ug kan-a, mao kini ang akong lawas nga gihatag kaninyo. Buhata kini aron sa paghinumdom kanako.” Nagpasabot kini sa mga tinun-an nga ang lawas ni Jesus mao ang sakripisyo alang kanila.

Unya gikuha ni Jesus ang usa ka kupa ug miingon, “Inom kamo niini. Mao kini ang akong dugo sa Bag-ong Kasabotan nga giula alang sa kapasayloan sa mga sala. Buhata kini aron sa paghinumdom kanako kada inom ninyo niini.”

Unya miingon si Jesus sa iyang mga tinun-an, “Ang usa kaninyo ang magluib kanako.” Nakurat ang mga tinun-an ug nangutana kung kinsa man ang makabuhat niana! Miingon si Jesus, “Ang tawo nga akong tagaan niining pan mao ang magluluib.” Unya iyang gihatag ang pan kang Judas.

Human gidawat ni Judas ang pan, misulod si Satanas kaniya. Milakaw si Judas ug mitabang sa mga pangulo sa mga Judio sa pagdakop kang Jesus. Gabii kadto.

Human sa ilang pagpangaon, miadto si Jesus ug ang iyang mga tinun-an sa Bukid sa mga Olibo. Miingon si Jesus, “Karong gabii kamong tanan mobiya kanako. Kay nahisulat kini, “Patyon ko ang magbalantay ug magkatibulaag ang tanang mga karnero.”

Mitubag si Pedro,” Bisan pa kung silang tanan mobiya kanimo, dili gayod ako mobiya kanimo!” Unya mitubag si Jesus kang Pedro,” Gusto ni Satanas nga maangkon kamong tanan, apan nag-ampo ako kanimo Pedro nga dili mapakyas ang imong pagtuo. Ang tinuod, karong gabhiona, sa dili pa motuktugaok ang manok, ilimod mo na ako sa makatulo nga nakaila ka kanako.

Unya miingon si Pedro kang Jesus, “Bisag mamatay pa ako, dili ko gayod ikaw ilimod.” Mao usab kini ang gisulti sa tanan niya nga mga tinun-an.

Unya miadto si Jesus uban ang iyang mga tinun-an sa lugar nga gitawag ug Getsemane. Ug miingon siya sa iyang mga tinun-an nga mag-ampo aron dili sila dag-on sa pagsulay. Unya nag-ampo si Jesus nga nag-inusara lang.

Sa makatulo nga higayon nag-ampo si Jesus, “Amahan, kung mahimo ayaw lang ipadangat kining umaabot nako nga pag-antos. Apan kung wala nay lain nga paagi nga mapasaylo ang sala sa mga tawo, ang imong kabubut-on mao ang matuman.” Naguol kaayo si Jesus ug ang iyang singot sama sa tulo sa dugo. Nagpadala ang Dios ug anghel aron sa paglig-on kaniya.

Kada human niya sa pag-ampo, maabtan niya ang iyang mga tinun-an nga natulog. Sa ikatulo niyang pagbalik, miingon si Jesus, “Pagmata na! Ania na ang magluib kanako.”

Kuyog ni Judas ang mga pangulo sa mga Judio, mga sundalo ug daghan nga mga tawo. Nagdala sila ug mga espada ug mga bunal. Miduol si Judas kang Jesus ug miingon, “Kumusta ka, Magtutudlo?”ug iya kining gihag-kan. Mao kini ang timailhan alang sa mga pangulo sa mga Judio kung kinsa ang ilang dakpon. Unya miingon si Jesus,” Judas, luiban mo ba ako pinaagi sa usa ka halok?”

Sa dihang gidakop na si Jesus sa mga sundalo, gihulbot ni Pedro ang iyang espada ug gitigbas niya ang pikas nga dalunggan sa sulugoon sa pangulong pari. Miingon si Jesus, “Ibalik sa sakoban ang imong espada! Makapangayo ra ako sa akong Amahan ug kasundalohang mga anghel nga molaban kanako. Apan kinahanglan ako motuman sa akong Amahan.” Unya giayo ni Jesus ang naputol nga dalunggan sa tawo. Nanagan ang tanan niyang mga tinun-an sa pagkahuman ug dakop kang Jesus.

Ang istorya gikan sa Biblia: Mateo 26:14-56; Marcos 14:10-50; Lucas 22:1-53; Juan 12:6; 18:1-11