18. Ang Nabahin nga Gingharian

Human sa daghan nga mga katuigan, namatay si David, ug ang iyang anak nga lalaki nga si Solomom nagsugod na paghari sa Israel. Nakigsulti ang Dios kang Solomon ug gipangutana siya kung unsay pinakagusto niya. Sa dihang nangayo si Solomon ug kaalam, nalipay kaayo ang Dios ug gihimo siya nga pinakamaalamon sa tibuok kalibotan. Daghan ug nakat-onan nga mga butang si Solomon ug maalamon siya nga maghuhukom. Ug gihimo usab siya sa Dios nga dato kaayo.

Sa Jerusalem, gitukod ni Solomon ang templo nga giplano ug gipangandaman sa iyang amahan nga si David. Ug karon ang mga tawo nagsimba na sa Dios ug naghatag na sa ilang mga halad ngadto kaniya didto sa Templo, imbis nga sa Tolda sa Tagboanan. Ang Dios miadto ug anaa diha sa Templo, ug nagpuyo siya didto uban ang iyang katawhan.

Apan nahigugma si Solomon sa mga babaye sa ubang kanasoran. Gisupak niya ang Dios pinaagi sa pagminyo sa daghan nga mga babaye, halos 1,000 kanila! Daghan niining mga bayhana naggikan sa langyaw nga mga nasod ug nagdala sila sa ilang mga diosdios uban kanila ug nagpadayon sa pagsimba kanila. Sa dihang natigulang na si Solomon, nagsimba na usab siya sa ilang mga dios-dios.

Ang Dios nasuko kang Solomon ug, ingon nga silot sa dili pagkamatinud-anon ni Solomon, nagsaad siya nga bahinon ang nasod sa Israel ngadto sa duha ka mga gingharian human sa kamatayon ni Solomon.

Human mamatay si Solomon, ang iyang anak, nga si Rehoboam, nahimong hari. Buang-buang nga tawo si Rehoboam. Ang tanang katawhan sa nasod sa Israel, nagtigom aron ituboy nila siya ingon nga hari. Nagreklamo sila kang Rehoboam nga gipatraho sila ni Solomon ug bug-at kaayo ug gipabayad sa dagko nga mga buwis.

Unya mitubag si Rehoboam nga wala maghunahuna, “Abi ninyo nga gipatrabaho na kamo ug bug-at sa akong amahan nga si Solomon, apan dugangan ko pa ang inyong trabaho labaw sa iyang gibuhat, ug mas grabe pa ang akong isilot kaninyo kaysa iyang gibuhat.”

Ang napulo ka mga tribo sa nasod sa Israel ang nagsupak batok kang Rehoboam. Duha lamang ka tribo ang nagpabilin nga matinud-anon kaniya. Ug kining duha ka mga tribo nahimo nga gingharian sa Juda.

Ang laing napulo ka mga tribo sa nasod sa Israel nga nakigbatok kang Rehoboam nagpili ug usa ka tawo nga ginganlan ug Jeroboam nga mahimo nilang hari. Didto sila sa amihanang dapit nagtukod sa ilang gingharian ug gitawag kini nga gingharian sa Israel.

Nagsupak si Jeroboam sa Dios ug mao nay hinungdan nga nakasala ang mga tawo. Nagbuhat siya ug duha ka diosdios aron simbahon sa iyang katawhan imbis nga magsimba sa Dios didto sa Templo sa gingharian sa Juda.

Ang gingharian sa Juda ug sa Israel nahimo nga magkaaway ug kanunay silang mag-away batok sa matag-usa.

Diha sa bag-ong gingharian sa Israel, daotan ang tanang mga hari. Daghan niining mga haria ang napatay sa uban nga mga Israelita nga gustong mopuli nga mahimong hari.

Misimba sa mga dios-dios ang tanan nga mga hari ug ang kadaghanan sa mga tawo sa gingharian sa Israel. Ang paagi sa pagsimba sa ilang mga diosdios naglakip sa pagpakighilawas ug usahay maghalad sila ug usa ka bata.

Ang mga hari sa Juda mga kaliwat ni David. Mga maayong tawo ang uban kanila ug naghari nga makataronganon ug misimba sa Dios. Apan daotan ang kadaghanan sa mga hari sa Juda ug dili matarong, ug nagasimba sila sa mga diosdios. Gihalad sa ubang hari ang ilang mga anak ngadto sa mga mini nga mga dios. Daghan sa mga taga-Juda ang misupak sa Dios ug misimba sa ubang mga diosdios.

Istorya gikan sa Biblia: 1 Hari 1-6; 11-12