15. Ang Yutang Saad

Sa kataposan miabot na gayod ang panahon nga mosulod na ang mga Israelita sa Canaan, ang Yutang Saad. Nagpadala si Josue ug duha ka espiya ngadto sa Canaan, didto sa siyudad sa Jerico nga napalibotan ug lig-on nga pader. Nianang siyudara adunay nagpuyo nga usa ka babaye nga namaligya sa iyang dungog nga ginganlan ug Rahab nga maoy nagtago sa espiya ug mitabang kanila nga makaikyas. Gihimo niya kini tungod kay mituo man siya sa Dios. Unya nagsaad sila nga panalipdan si Rahab ug ang iyang pamilya sa panahon nga gun-obon sa mga Israelita ang Jerico.

Ang mga Israelita mitabok sa Suba sa Jordan aron sa pagsulod sa Yutang Saad. Ang Dios nag-ingon kang Josue, “Ipauna kaninyo ang mga pari.” Sa dihang nag-una na ang mga pari sa pagtabok sa Suba sa Jordan, mihunong sa pagtubod ang tubig sa ibabaw, aron nga ang mga Israelita makatabok sa suba sa uga nga yuta.

Human makatabok ang katawhan sa Suba sa Jordan, giingnan sa Dios si Josue kung unsaon sa pagsulong ang gamhanan nga siyudad sa Jerico. Ug nagtuman sa Dios ang katawhan. Sumala sa giingon sa Dios kanila nga ilang buhaton, ang mga kasundalohan ug mga pari nagmartsa libot sa siyudad sa Jerico ka usa sa usa ka adlaw sulod sa unom ka adlaw.

Unya sa ikapito ka adlaw, ang mga Israelita nanglakaw palibot sa siyudad sa pito pa ka higayon. Samtang sila nanglakaw palibot sa siyudad sa kataposan nga higayon, ang kasundalohan naninggit samtang ang mga pari nagpatingog sa ilang mga trumpeta.

Unya ang mga pader sa Jerico nangahugno! Giguba sa mga Israelita ang tanan nga anaa sa siyudad kay mao man kini ang gisugo sa Dios kanila. Giluwas lamang nila si Rahab ug ang iyang pamilya nga nahimong kabahin sa mga Israelita. Sa dihang ang mga katawhan sa Canaan nakadungog nga gibuntog sa mga Israelita ang Jerico, nangahadlok sila basin sulongon usab sila sa mga Israelita.

Nagmando ang Dios sa mga Israelita nga dili maghimo ug kasabotan sa kalinaw ngadto sa katawhan sa Canaan. Apan usa sa Canaanhon nga mga pundok sa katawhan nga gitawag ug Gibeonhon, namakak kang Josue ug miingon nga gikan sila sa layong dapit sa Canaan. Naghangyo sila kang Josue nga maghimo ug kasabotan sa kalinaw uban kanila. Si Josue ug ang mga Israelita wala mangutana sa Dios kung asa gikan ang mga Gibeonhon. Busa naghimo si Josue ug kasabotan sa kalinaw ngadto kanila.

Ang mga Israelita nangasuko sa pagkabalo nila nga giilad sila sa mga Gibeonhon, apan gituman gihapon nila ang ilang kasabotan sa kalinaw tungod kay gihimo man nila kini nga saad atubangan sa Dios. Sa pipila ka adlaw, nadungog sa mga hari sa uban nga mga pundok sa katawhan sa Canaan nga gitawag ug mga Amorihanon, nga naghimo ug kasabotan ang mga Gibeonhon tali sa mga Israelita, busa gihiusa nila ang ilang mga kasundalohan ug misulong sa Gibeon. Ang mga Gibeonhon nagpadala ug mensahe kang Josue aron mangayo ug tabang.

Busa gitapok ni Josue ang kasundalohan sa Israel ug nanglakaw sila tibuok gabii aron adtoon ang mga Gibeonhon. Sayo sa kabuntagon, gipakuratan nila ug sulong ang mga Amorihanong kasundalohan.

Ang Dios nakig-away alang sa mga Israelita nianang adlawa. Gilibog niya ang mga Amorihanon ug gipaulanan niya sila ug dagko nga mga yelo, nga mipatay sa daghan nga mga Amorihanon.

Gipahunong usab sa Dios ang adlaw nianang adlawa aron adunay igong panahon ang mga Israelita sa pagpildi sa hingpit sa mga Amorihanon. Nianang adlawa, dako kaayo ang kadaogan nga gihatag sa Dios alang sa Israel.

Human gipildi sa Dios kadto nga kasundalohan, naghiusa ang daghang pundok sa katawhan nga Canaanhon aron sulongon ang Israel. Apan gisulong sila ni Josue ug sa mga Israelita ug gibuntog nila sila.

Human niini nga gubat, gihatagan sa Dios ang matag tribo sa Israel sa ilang kaugalingon nga luna sa Yutang Saad. Unya gihatagan usab sila sa Dios ug kalinaw sa ubang katawhan sa ilang palibot.

Sa dihang tigulang na si Josue, gitawag niya ang tanang katawhan sa Israel aron maghiusa. Unya gipasidan-an ni Josue ang katawhan sa ilang katungdanan nga motuman sa kasabotan nga gihimo sa Dios sa mga Israelita didto sa Sinai. Ang mga tawo nagsaad nga magpabilin nga magmatinud-anon sa Dios og magtuman sa iyang mga balaod.

Istorya gikan sa Biblia : Josue 1-24