45. Si Esteban ug si Felipe

Ang usa sa mga pangulo sa mga magtutuo sa unang Simbahan kaniadto mao si Esteban. Aduna siyay maayong dungog ug siya puno sa Balaang Espiritu ug kaalam. Nagbuhat siya ug daghan nga milagro ug iyang gipasabot ug maayo ang mga tawo nga kinahanglan motuo diha kang Jesus.

Usa ka adlaw niana, samtang nagtudlo si Esteban mahitungod kang Jesus, adunay pipila ka mga Judio nga nakiglalis kaniya. Kini nga mga Judio wala motuo kang Jesus. Nasuko kaayo sila kang Esteban ug namakak mahitungod kaniya ngadto sa mga pangulo sa mga Judio. Miingon sila, “Nadunggan namo si Esteban nga nagsulti ug daotan batok kang Moises ug sa Dios!” Busa gipadakop nila si Esteban ug gidala siya didto sa labaw’ng pari ug sa uban pa nga mga pangulo sa mga Judio, diin aduna pay daghang mga saksi nga nagsulti ug bakak batok kang Esteban.

Nangutana ang labaw’ng pari kang Esteban, “Tinuod ba kining mga butang nga gipanulti nila bahin kanimo?” Mitubag si Esteban pinaagi sa pagpahinumdom kanila sa mga daghang kahibulongang mga butang nga nabuhat sa Dios sukad pa sa panahon ni Abraham hangtod sa panahon ni Jesus, ug kung giunsa sa katawhan sa Dios sa pagpadayon sa pagsupak kaniya. Unya miingon siya, “Kamong mga gahi’g ulo ug masinupakon nga mga tawo kanunay nagsalikway sa Balaang Espiritu, sama sa inyong mga katigulangan nga kanunay nagsalikway sa Dios ug gipatay ang iyang mga propeta! Apan mas daotan ang gibuhat ninyo, kay inyong gipatay ang Mesiyas!”

Sa dihang ang mga relihiyosong pangulo nakadungog niini, nasuko sila pag-ayo nga gisampongan nila ang ilang mga dalunggan ug naninggit sa makusog. Unya ilang giguyod si Esteban paingon sa gawas sa siyudad ug gibato nila aron patyon siya.

Kadtong hapit na mamatay si Esteban, misinggit siya, “Jesus, dawata ang akong Espiritu.” Unya miluhod siya ug misinggit pag-usab, “Agalon, ayaw sila paningla niining sala nga ilang gihimo.” Ug unya namatay siya.

Adunay usa ka batan-ong lalaki nga gingalan ug Saulo nga miuyon sa mga tawo sa pagpatay kang Esteban ug nagbantay sa ilang mga kupo samtang ilang gibato si Esteban. Nianang adlawa, daghang mga tawo sa Jerusalem ang nagsugod na sa paglutos sa sumusunod ni Jesus, busa ang mga magtutuo namiya sa ubang mga dapit. Bisan pa man niini, nagsangyaw gihapon sila mahitungod kang Jesus bisan asa sila naabot.

Si Felipe ang usa sa mga sumusunod ni Jesus nga mibiya gikan sa Jerusalem sa panahon sa paglutos. Miadto siya sa Samaria diin nagsangyaw siya mahitungod kang Jesus ug daghan ang naluwas. Unya usa ka adlaw niana, adunay usa ka anghel nga gipadala ang Dios aron sultihan si Felipe nga moadto sa usa ka dalan padulong sa kamingawan. Samtang naglakaw siya sa dalan, nakita ni Felipe ang usa ka importanteng opisyal nga gikan sa Etiopia nga nagsakay sa iyang karwahe. Giingnan si Felipe sa Balaang Espiritu nga adtoon ang opisyal ug makigsulti niining tawhana.

Sa pagduol ni Felipe sa karwahe, nadunggan niya ang Etiopianhon nga nagbasa sa sinulat ni propeta Isaias. Mao kini ang gibasa nining tawhana, “Gipangulohan nila siya sama sa usa ka karnero nga gidala sa ihawanan aron patyon, ug sama sa usa ka karnero nga hilom, wala gayod siya motingog. Dili maayo ang ilang pagtagad kaniya ug wala sila magtahod kaniya. Ug gipatay nila siya.”

Gipangutana ni Felipe ang Etiopianhon, “Nakasabot ka ba sa imong gibasa?” Ang Etiopianhanon mitubag, “Wala. Dili ko kini masabtan gawas kung adunay mopasabot niini kanako. Palihog duol ug lingkod sa akong tapad. Ang sinulat ba ni Isaias mahitungod sa iyang kaugaligon o sa lain nga tawo?”

Giingnan ni Felipe ang Etiopianhon nga si Jesus ang gipasabot ni Isaias. Gigamit usab ni Felipe ang kasulatan aron sultihan siya sa maayong balita mahitungod kang Jesus.

Samtang nagpadayon sila sa ilang panaw miabot sila sa dapit nga adunay tubig. Miingon ang Etiopianhon kang Felipe, “Tan-awa, adunay tubig dinhi. Mahimo mo ba akong bawtismohan?” Ug gipahunong nila ang karwahe.

Miadto sila sa tubig ug gibawtismohan ni Felipe ang Etiopianhon. Human sa paghaw-as nila gikan sa tubig, sa kalit lang gikuha sa Balaang Espiritu si Felipe ug gidala sa laing dapit, diin nagpadayon siya sa pagsangyaw sa mga tawo mahitungod kang Jesus.

Nagpadayon ang Etiopianhon sa iyang panaw padulong sa iyang pinuy-anan nga nagmalipayon tungod kay nailhan na niya si Jesus.

Ang Istorya gikan sa Biblia: Buhat 6:8-8:5; 8:26-40