Cebuano: OPEN BIBLE STORIES

Updated ? hours ago # views See on DCS

5. Ang Gisaad nga Anak kang Abram

OBS Image

Napulo ka tuig human miabot si Abram ug Sarai sa yuta sa Canaan, wala gihapon sila makabaton ug anak, busa miingon si Sarai, “Tungod kay ang Dios wala maghatag kanako ug anak, ug tigulang na ako karon ug dili na makabaton ug anak, ania ang akong sulugoon nga si Hagar. Pangasaw-a siya, aron siya ang maghatag ug anak alang kanako.”

OBS Image

Busa gipangasawa ni Abram si hagar, ug nakabaton siya ug anak nga lalaki, ug ginganlan siya ni Abram ug Ismael. Apan nasina si Sarai kang Hagar. Sa dihang trise na ka tuig ang idad ni Ismael, nakigsulti pag-usab ang Dios kang Abram.

OBS Image

Ug miingon ang Dios, “Ako ang Dios nga labaw sa tanan. Maghimo ako ug pakigsaad diha kanimo,” Ug unya si Abram mihapa sa yuta. Ang Dios mismo nag-ingon kang Abram, “Mahimo ikaw nga amahan sa daghang kanasoran. Akong ihatag sa imong mga kaliwatan ang yuta sa Canaan, ug magpuyo sila didto ug mahimo nila ako nga Dios sa walay kataposan. Kinahanglan nga imong tulion ang matag lalaki sa imong panimalay.”

OBS Image

“Ang imong asawa nga si Sarai, makabaton ug anak, ug siya mao ang anak nga gisaad. Nganli siya ug Isaac. Maghimo ako ug saad kaniya, ug mahimo siya nga bantugan nga nasod. Himoun ko usab si Ismael nga bantugan nga nasod, apan ang akong saad magpabilin uban kang Isaac.” Unya giilisan sa Dios ang ngalan ni Abram ug gihimo na nga Abraham, buot ipasabot, “amahan sa kadaghanan.” Giilisan usab sa Dios ang ngalan ni Sarai ug gihimo na nga Sara, buot ipasabot “prinsesa.” OBS Image Nianang adlawa, gituli ni Abraham ang tanan nga mga lalaki sa iyang panimalay. Paglabay sa pipila ka mga katuigan, sa nag-edad na si Abraham ug 100 ug nag-edad na usab si Sara ug 90, nanganak siya sa anak nga lalaki ni Abraham. Ginganlan nila kini ug Isaac tungod kay sugo kini sa Dios.

OBS Image

Sa dihang dako na si Isaac, gisulayan sa Dios ang pagtuo ni Abraham sa pag-ingon, “Dad-a ang imong bugtong anak, patya siya ug ihalad kanako.” Ug gituman kini ni Abraham ug nangandam na siya aron ihalad si Isaac sa Dios.

OBS Image

Milakaw si Abraham ug Isaac padulong sa lugar nga halaranan. Unya nangutana si Isaac, “Amahan anaa naman kitay kahoy nga pangsugnod sa halad, apan asa man ang nating karnero?” Mitubag si Abraham, “Anak, ang Dios maghatag sa nating karnero.”

OBS Image

Sa dihang didto na sila sa dapit nga halaranan, gigapos ni Abraham ang iyang anak nga si Isaac, ug gipahigda niya sa altar. Iya na untang patyon ang iyang anak, apan miingon ang Dios, “Hunong! Ayaw pasakiti ang bata! Ako na nga nasayran karon nga anaa kay kahadlok kanako tungod kay wala mo gidalo ang imong bugtong nga anak nga lalaki.”

OBS Image

Sa dapit nga gikahimutangan ni Abraham, anaay usa ka lalaking karnero nga nasabod sa usa ka gamay nga kahoy. Gihatag sa Dios ang karnero aron iyang ihalad puli kang Isaac. Nalipay pag-ayo si Abraham sa dihang naghalad siya sa maong karnero.

OBS Image

Ang Dios miingon kang Abraham, “Tungod kay andam ka nga mohatag sa bisan unsa nga butang nga anaa kanimo, bisan pa ang imong bugtong nga anak nga lalaki, mosaad ako nga panalanginan ko ikaw. Modaghan ang imong mga kaliwat sama sa mga bituon sa kalangitan. Tungod kay nagmatinumanon ka kanako, ang tanang pamilya sa tibuok kalibotan mapanalanginan pinaagi sa imong mga pamilya.”

Istorya gikan sa Biblia: Genesis 16-22