14. Ang Paglakaw nila sa Kamingawan

1Human giingon sa Dios ang mga balaod ngadto sa mga Israelita nga gusto niyang tumanon nila ingon nga kabahin sa iyang kasabotan ngadto kanila, mibiya sila sa Bukid sa Sinai. Nagsugod ang Dios sa paggiya kanila padulong sa Yutang Saad, nga ginatawag usab nga Canaan. Ang haligi nga panganod nag-una kanila ngadto sa Canaan ug nagsunod sila niini.

Nagsaad ang Dios kang Abraham, Isaac ug Jacob nga iyang ihatag ang Yutang Saad sa ilang mga kaliwatan, apan daghan na karon ang mga pundok sa katawhan nga nagpuyo didto. Sila gitawag nga mga Canaanhon. Ang mga Canaanhon wala magsimba o magtuman sa Dios. Nagsimba sila sa mga diosdios ug daotan ang ilang mga binuhatan.

Ang Dios nag-ingon sa mga Israelinhon, “Kinahanglan abogon ninyo ang tanang Canaanhon sa Yutang Saad. Ayaw kamo pagpakigsuod ug ayaw pagpakigminyo kanila. Ug gubaa gayod sa hingpit ang tanan nilang diosdios. Kung dili kamo motuman kanako, makasimba kamo sa ilang diosdios imbis kanako.’’

Sa pag-abot sa mga Israelinhon sa utlanan sa Canaan, nagpili si Moises ug dose (12) ka mga lalaki, usa gikan sa matag tribo sa Israel. Nagtugon siya sa mga lalaki nga moadto ug maniid sa yuta aron masusi nila kini. Panid-an usab nila ang mga Canaanhon aron makita kung kusgan ba sila o dili.

Migikan ang dose (12) ka lalaki ug nangadto sa Canaan sulod sa 40 ka adlaw ug unya namalik sila. Giingnan nila ang katawhan, “Tambok ang yuta didto ug maayo ang abot!” Apan ang napulo sa mga espiya miingon, “Lig-on kaayo ang mga siyudad ug higante ang mga tawo! Kung sulongon nato sila, pildihon gayod kita nila ug hutdon kita nila sa pagpatay!”

Dihadiha dayon si Caleb ug si Josue, ang laing duha ka espiya miingon, “Tinuod ang ilang giingon nga ang katawhan sa Canaan tag-as kaayo ug kusgan, apan mapildi gayod nato sila! Ang Dios maoy makig-away alang kanato!”

Apan ang katawhan wala naminaw kang Caleb ug kang Josue. Unya nangasuko sila kang Moises ug kang Aaron ug nag-ingon, “Nganong gidala mo man kami dinhi niining makuyaw nga lugar? Nagpabilin na lamang unta kami sa Ehipto kaysa mamatay kami dinhi sa gubat, ug mahimong mga ulipon ang among mga asawa ug mga anak.” Ang katawhan gusto magpili ug bag-ong pangulo nga maoy magdala kanila pagbalik sa Ehipto.

Nasuko pag-ayo ang Dios ug miabot sa Tolda sa Tagboanan. Ang Dios miingon, “Tungod kay misukol man kamo kanako, maglatagaw kamong tanan sa kamingawan. Si Josue ug si Caleb lamang ang makasulod sa Yutang Saad, ug ang tanan nga nagpanuigon ug 20 ka tuig o pataas mamatay gayod didto ug dili sila makasulod sa Yutang Saad.”

Sa dihang nadungog kini sa katawhan, nagbasol sila sa ilang pagpakasala. Unya gikuha nila ang ilang mga hinagiban ug milakaw aron sulungon ang katawhan sa Canaan. Gipahimangnoan sila ni Moises nga dili magpadayon tungod kay ang Dios dili magauban kanila, apan wala sila maminaw kaniya.

Wala mag-uban ang Dios kanila niini nga pagpakiggubat, busa nangapildi sila ug daghan kanila ang nangamatay. Unya ang mga Israelita mibalik gikan sa Canaan ug naglatagaw sa kamingawan sulod sa 40 ka katuigan.

Sulod sa 40 ka tuig nga ang katawhan sa Israel naglatagaw sa kamingawan, gipahinagbo sa Dios ang ilang panginahanglan. Gihatagan niya sila ug pan nga gikan sa langit, ug gitawag kini nga “mana”. Nagpadala usab siya ug buntog (tama-tama lamang ang gidak-on niini) didto sa ilang kampo aron nga makakaon sila ug karne. Sulod nianang panahona, giampingan sa Dios ang ilang mga sinina ug sandalyas aron dili kini mangadunot bisan asa sila moadto.

Ang Dios naghimo pa gani ug milagro alang kanila sa pagpagawas sa tubig gikan sa bato. Apan bisan pa niining tanan, ang katawhan sa Israel nagreklamo ug nagbagulbol batok sa Dios ug kang Moises. Bisan pa niana, nagpabilin nga nagmatinud-anon ang Dios sa iyang mga saad ngadto kang Abraham, Isaac, ug kang Jacob.

Sa lain na usab nga panahon sa dihang walay tubig ang katawhan, nag-ingon ang Dios kang Moises, “Sultihi ang bato, ug ang tubig nga mogawas niini.” Apan si Moises wala nagtahod sa Dios atubangan sa tanan nga katawhan ug gibunalan hinuon niya ug sungkod ang bato sa makaduha ug wala kini sultihi. Migawas ang tubig sa bato ug nakainom ang tanan, apan ang Dios nasuko ngadto kang Moises ug miingon, “Dili ka makasulod sa Yutang Saad.”

Human sa 40 ka tuig nga naglatagaw ang mga Israelinhon didto sa kamingawan, nangamatay na ang tanan nga nagsupak batok sa Dios. Unya gigiyahan pag-usab sa Dios ang katawhan ngadto sa Yutang Saad. Si Moises niining panahona tigulang na kaayo, busa gipili sa Dios si Josue aron sa pagtabang kaniya sa pagpangulo sa katawhan. Nagsaad usab ang Dios kang Moises nga moabot ang adlaw nga magpadala siya ug lain pang propeta sama kang Moises.

Unya ang Dios miingon kang Moises nga moadto sa tumoy sa bukid aron Makita niya ang tibuok Yutang Saad. Nakita ni Moises ang Yutang Saad apan wala mitugot ang Dios nga makasulod siya niini. Unya namatay si Moises, ug ang mga Israelita nagbangotan sulod sa 30 ka adlaw. Ug si Josue maoy nahimong bag-o nga pangulo. Si Josue usa ka maayong pangulo tungod kay siya nagsalig ug nagtuman sa Dios.

Istorya gikan sa Biblia: Exodus 16-17; Numbers 10-14;20;27 Deuteronomy 34