42. Ang Pagbalik ni Jesus sa Langit

Sa adlaw nga si Jesus nabanhaw gikan sa mga patay, ang duha sa iyang mga tinun-an miadto sa duol nga lungsod. Samtang naglakaw sila, naghisgotanay sila bahin sa nahitabo kang Jesus. Naglaom gayod sila nga siya mao ang Mesiyas, apan siya gipatay. Unya karon ang mga kababayenhan miingon nga nabuhi siya pag-usab. Wala sila makabalo kung unsa ang angay tuohan.

Miduol si Jesus kanila ug nagsugod sa paglakaw kauban nila, apan wala sila makaila kaniya. Nangutana siya kung unsa ang ilang gihisgotan, ug gisultihan nila siya bahin sa tanang talagsaon nga mga butang nga nahitabo mahitungod kang Jesus sa niagi nga mga adlaw. Nagtuo sila nga nakigsulti sila sa usa ka sa bisita nga wala makabalo sa mga panghitabo sa Jerusalem.

Unya gipasabot ni Jesus kanila ang giingon sa pulong sa Dios mahitungod sa Mesiyas. Gipahinumdoman niya sila nga ang mga propeta miingon nga ang Mesiyas mag-antos ug pagapatyon, apan mabanhaw pag-usab sa ikatulo nga adlaw. Sa pag-abot nila sa lungsod diin ang duha ka lalaki nagplano nga magpahulay, hapit na mogabii.

Ang duha ka lalaki nag-agda kang Jesus nga mopahulay uban kanila, unya misugot siya. Sa dihang andam na sila nga mokaon sa panihapon, gikuha ni Jesus ang usa ka pan, nagpasalamat sa Dios niini, ug unya gipikas kini. Sa kalit lang, nailhan nila nga siya mao si Jesus. Apan diha dayon nawala siya sa ilang panan-aw.

Ang duha ka lalaki miingon sa usag usa, "Mao kadto si Jesus! Mao nga nagbaga ang atong mga kasingkasing sa dihang gipasabot niya ang pulong sa Dios kanato! Dihadiha dayon, nibalik sila sa Jerusalem. Sa pag-abot nila, giingnan nila ang mga tinun-an, "Buhi si Jesus! Nakita namo siya!"

Samtang ang mga tinun-an naghisgotanay, sa kalit lang nagpakita si Jesus sa kwarto nila ug miingon, "Ang kalinaw maanaa kaninyo!" Ang mga tinun-an nagtuo nga siya usa ka kalag, apan si Jesus miingon, "Nganong nangahadlok man kamo ug nagduhaduha? Tan-awa ang akong mga kamot ug mga tiil. Ang mga kalag walay lawas nga sama kanako." Aron mapamatud-an nga dili siya kalag, nangayo siya’g pagkaon. Gihatagan nila siya ug naluto nga isda, ug gikaon niya kini.

Miingon si Jesus, "Gisultihan ko na kamo nga ang tanan nga nahisulat bahin kanako sa pulong sa Dios kinahanglan matuman." Unya giablihan niya ang ilang hunahuna aron masabtan nila ang pulong sa Dios. Miingon siya, "Nahisulat kini kaniadto nga ang Mesiyas mag-antos, mamatay, ug mabanhaw gikan sa mga patay sa ikatulo nga adlaw."

"Nahisulat usab kini sa kasulatan nga ang akong mga tinun-an mao ang magmantala nga kinahanglan ang tanan maghinulsol aron makadawat sa kapasayloan sa ilang mga sala. Buhaton nila kini sugod sa Jerusalem, ug moadto sa tanang grupo sa mga tawo bisan asa. Kamo magasaksi niining mga butanga."

Sa sulod sa 40 ka adlaw, nagpakita si Jesus sa iyang mga tinun-an sa daghang mga higayon. Sa makausa, nagpakita siya sa 500 ka tawo sa samang oras! Gipamatud-an niya sa iyang mga tinun-an sa daghang paagi nga siya buhi, ug gitudloan niya sila bahin sa gingharian sa Dios.

Si Jesus miingon sa iyang mga tinun-an, “Ang tanan nga katungod diha sa langit ug sa yuta gihatag kanako. Busa panlakaw kamo, ug buhata nga mga tinun-an ang tanang grupo sa mga tawo pinaagi sa pagbawtismo kanila sa ngalan sa Amahan, sa Anak, ug sa Balaang Espiritu, ug pinaagi sa pagtudlo kanila sa pagtuman sa tanan nga akong gisugo kaninyo. Hinumdumi, magauban ako kanunay kaninyo.”

Sa 40 ka adlaw human sa pagkabanhaw ni Jesus gikan sa mga patay, miingon siya sa iyang mga tinun-an, “Pagpabilin kamo sa Jerusalem hangtod nga ang akong Amahan maghatag kaninyo sa gahom sa dihang mokunsad kaninyo ang Balaang Espiritu.” Unya si Jesus mikayab na padulong sa langit, ug ang panganod nagsalipod kaniya sa ilang panan-aw. Milingkod si Jesus sa tuo nga kamot sa Dios aron magdumala sa tanang butang.

Ang Istorya gikan sa Biblia: Mateo 28:16-20; Marcos 16:12-20; Lucas 24:13-53; Juan 20:19-23; Buhat 1:1-11