13. Ang Kasabotan sa Dios sa Israel

Human gitultolan sa Dios ang mga Israelita sa Pulang Dagat, gidala usab sila sa kamingawan ngadto sa bukid nga ginganlan ug Sinai. Kini mao ra nga bukid nga si Moises nakakita sa nagdilaab nga sampinit. Ang mga katawhan nagbutang sa ilang mga tolda sa tiilan sa bukid.

Ang Dios nag-ingon kang Moises ug sa katawhan sa Israel, “Kung kamo musunod kanako ug motuman sa akong kasabotan, mamahimo kamo nga akong bililhon nga katawhan, ug gingharian sa mga pari, ug balaan nga nasod.”

Human sa tulo ka adlaw, human nangandam ang katawhan sa ilang espirituhanong kaugalingon, nanaog ang Dios sa taas nga bahin sa bukid sa Sinai uban ang dalugdog, kilat, ug aso, ug sa kusog nga tingog sa trumpeta. Si Moises lang ang gitugotan nga mosaka sa bukid.

Unya ang Dios naghatag kanila ug kasabotan ug nag-ingon, “Ako si Yahweh, nga inyong Dios, kinsa nagluwas kaninyo gikan sa pagka-ulipon sa Ehipto. Ayaw pagsimba sa uban nga dios.”

“Ayaw kamo paghimo ug diosdios ug ayaw pagsimba kanila, tungod kay ako, si Yahweh, ako seloso nga Dios. Ayaw gamita ang akong ngalan sa dili matinahuron nga pamaagi. Siguroha nga motuman kamo sa adlaw nga Igpapahulay ug balaana kini. Sa ubang pagkasulti, buhata ang tanan ninyo nga buhaton sulod sa unom ka adlaw, kay sa ika-pito ka adlaw mao ang adlaw nga pagpahulay ug sa paghinumdom kanako.”

“Tahora ang inyong amahan ug inyong inahan. Ayaw pagpatay. Ayaw panapaw. Ayaw pangawat. Ayaw pamakak. Ayaw pagtinguha sa pag-angkon sa asawa sa imong silingan, ni sa iyang balay, ug sa tanan nga anaa kaniya.” Unya ang Dios nagsulat sa napulo ka mga sugo sa duha kalapad ug nipis nga bato ug gihatag kang Moises. Naghatag usab ang Dios ug daghan nga mga balaod ug mga tulomanon nga angay sundon. Kung ang katawhan magsunod sa mao nga mga balaod, nagsaad ang Dios nga panalanginan niya sila ug ampingan. Apan kung mosupak sila, silotan sila sa Dios.

Ang Dios naghatag sa mga Israelita ug detalye bahin sa porma sa tolda nga gusto niyang buhaton. Kini gitawag nga Tolda nga Tigomanan, ug anaay duha ka kuwarto, gitunga pinaagi sa dagko nga kurtina. Bugtong ang labaw nga pari lang ang gitugotan nga makasulod sa gilahi nga kuwarto nga anaay kurtina, tungod kay ang Dios nagpuyo man didto.

Bisan kinsa nga mosupak sa balaod sa Dios magadala ug mananap atubangan sa halaran nga Tolda nga Tigomanan ingon nga sakripisyo ngadto sa Dios. Ihawon sa pari ang mananap ug ibutang kini sa halaran. Ang dugo sa mananap maoy magtabon sa sala sa tawo, ug maghimo sa tawo nga limpyo sa panan-aw sa Dios. Gipili sa Dios ang igsoon ni Moises nga si Aaron ug ang iyang kaliwatan nga mamahimong pari. Ang tanan nga katawhan nagkauyon sa pagtuman sa gihatag sa Dios kanila, sa pagsimba sa usa lamang ka Dios, ug mahimong iyang pinasahi nga katawhan. Sa mubo nga panahon human nga sila misaad sa Dios sa pagsunod kaniya, nagpakasala sila pag-ayo.

Sa daghan nga mga adlaw, si Moises anaa sa taas sa bukid sa Sinai nga nakigsulti sa Dios. Ang katawhan gilaay sa paghulat sa iyang pagbalik. Busa nagdala sila ug bulawan kang Aaron ug naghangyo nga maghimo ug dios-dios alang kanila!

Naghimo si Aaron ug bulawan nga diosdios nga porma ug nating baka. Ang katawhan nagsugod ug grabeng pagsimba sa ilang diosdios ug naghalad sila niini! Ang Dios nasuko pag-ayo kanila tungod sa ilang sala ug nagplano nga gub-on sila. Apan si Moises nag-ampo alang kanila ug ang Dios namati sa iyang pag-ampo ug wala sila laglaga.

Unya nanaog si Moises gikan sa bukid ug nakita niya ang diosdios, nasuko siya pag-ayo hinungdan nga iyang gidugmok ang bato diin gisulat sa Dios ang napulo ka mga kasugoan.

Unya gidugmok ni Moises ang diosdios hangtod nga napulbos kini, gisabwag niya ang pulbos ngadto sa tubig ug gipainom ngadto sa katawhan ang tubig. Nagpadala ang Dios ug katalagman sa katawhan ug daghan kanila ang nangamatay.

Naghimo si Moises ug bag-o nga bato nga nipis alang sa napulo ka sugo aron ipuli sa iyang gibuak. Ug unya misaka siya sa bukid pag-usab ug nag-ampo sa Dios nga pasayloon ang katawhan. Namati ang Dios kang Moises ug gipasaylo niya sila. Unya mibalik pagkanaog si Moises gikan sa bukid uban ang Napulo ka mga Sugo sa bag-o nga bato. Ug unya gipanguluhan sa Dios ang mga Israelita palayo gikan sa Bukid sa Sinai ngadto sa Yutang Saad.

Istorya gikan sa Biblia: Exodus 19-34