4. Ang Kasabotan sa Dios kang Abraham

Paglabay sa daghan nga mga katuigan human sa lunop, nidaghan na usab ang mga tawo sa kalibotan, ug nagsulti sila ug pareho lang nga pinulongan. Gimandoan sila sa Dios nga lukopon nila ang yuta, apan nagtapok hinuon sila ug nagbuhat ug usa ka siyudad.

Mga mapahitas-on kaayo sila, ug wala nila panumbalinga ang gisulti sa Dios. Nagsugod hinuon sila sa pagbuhat ug taas nga tore nga mosangko sa langit. Nakita sa Dios nga kung mopadayon silang tanan sa pagbuhat ug daotan, basin ug daghan pa ang sala nga ilang mabuhat.

Busa giilisan sa Dios ang ilang pinulongan ngadto sa daghan nga nagkalain-laing mga pinulongan ug gipatibulaag ang mga tawo sa tibouk kalibotan. Ang siyudad nga ilang gibuhat gitawag ug Babel, nga nagpasabot, “nalibog.”

Paglabay sa pipila ka gatos ka mga katuigan, nakigsulti ang Dios sa tawo nga ginganlan ug Abram. Giingnan siya sa Dios, “Biyai ang imong nasod ug pamilya, ug adto sa yuta nga ipakita ko kanimo. Panalanginan ko ikaw ug himuon ko ikaw nga dakong nasod. Himuon ko nga bantogan ang imong ngalan. Panalanginan ko kadtong mopanalangin kanimo ug tunglohon ko kadtong motunglo kanimo. Mapanalanginan ang tanang pamilya sa kalibotan pinaagi kanimo.

Busa mituman si Abram sa sugo sa Dios. Giuban niya ang iyang asawa nga si Sarai, ug ang tanan niyang mga sulugoon ug ang tanan niyang gipanag-iyahan ug miadto sila sa yuta nga gipakita sa Dios kaniya, ang yuta sa Canaan.

Sa pag-abot ni Abram sa Canaan, miingon ang Dios, “Tan-awa ang tanang nakapalibot kanimo. Ihatag ko kanimo ug sa imong mga kaliwat ingon nga panulundon ang tanang yuta nga maabtan sa imong panan-aw.” Ug unya mipuyo didto si Abram.

Usa ka adlaw niana, nagkita si Abram ug si Melkizedek nga pari sa Labing Halangdon nga Dios. Gipanalanginan ni Melkizedek si Abram ug miingon, “Panalanginan ka unta Abram sa Labing Halangdon nga Dios nga maoy tag-iya sa langit ug sa yuta.” Unya gihatagan ni Abram si Melkizedek sa ikanapulo sa tanan niyang katigayonan.

Sa paglabay sa daghang mga katuigan, wala pa gihapon makaanak ang magtiayon nga si Abram ug Sarai. Giingnan sa Dios si Abram ug gisaaran na usab nga makabaton ug anak nga lalaki ug mga kaliwat nga sama kadaghan sa mga bituon sa langit. Mituo si Abram sa saad sa Dios. Giisip sa Dios nga matarong si Abram tungod kay mituo siya sa iyang saad.

Ug unya naghimo ang Dios ug pakigsaad kang Abram. Ang pakigsaad mao ang kasabotan tali sa duha ka grupo. Miingon ang Dios, “Hatagan ko ikaw ug anak nga gikan mismo sa imong kaugalingong lawas. Akong ihatag kanimo ang yuta sa Canaan ngadto sa imong mga kaliwat.” Apan wala pa gihapo’y anak si Abram niadtong panahona.

Istorya gika sa Biblia: Genesis 11-15