16. Ang mga Manluluwas

Pagkamatay ni Josue, nagmasupilon na usab ang mga Israelita sa Dios ug wala nila aboga ang nahibilin nga mga Canaanhon o mituman sa mga balaod sa Dios. Ang mga Israelita nagsugod na sa pagsimba sa mga diosdios sa Canaanhon imbis kang Yahweh, nga mao ang tinuod nga Dios. Ang mga Israelita walay hari, busa ang tanan nagbuhat sa ilang gihunahuna nga maayo alang kanila.

Tungod kay ang mga Israelita nagpadayon sa pagsupak sa Dios, gisilotan niya sila pinaagi sa pagtugot nga mapildi sila sa ilang mga kaaway. Gipangawat niining mga kaaway ang mga butang gikan sa mga Israelita, giguba ang ilang mga kabtangan, ug gipamatay ang kadaghanan kanila. Human sa daghan nga katuigan sa pagsupak nila sa Dios ug sa pag-antos tungod sa ilang mga kaaway, naghinulsol ang mga Israelita ug nagpakitabang sa Dios nga luwason sila.

Unya nagtuboy ang Dios ug usa ka manluluwas nga moluwas kanila ug maghatag ug kalinaw sa ilang kayutaan. Apan nalimtan sa mga tawo ang Dios ug nagsugod na usab sa pagsimba sa mga diosdios. Busa gitugotan sa Dios ang mga Midianhon, ang kaaway nga duol kanila, aron buntogon sila.

Giilog sa mga Midianhon ang ilang mga abot sulod sa pito ka tuig. Nangahadlok pag-ayo ang mga Israelita; ug nagtago sila sa mga langob aron dili sila makit-an sa mga Midianhon. Sa kataposan, nagpakitabang ra gayod sila sa Dios nga luwason sila.

Usa ka adlaw niana, ang usa ka Israelinhon nga ginganlan ug Gideon naggiok ug lugas sa tago aron nga dili kini kawaton sa mga Midianhon. Giadtoan siya sa anghel ni Yahweh ug giingnan, “Ang Dios mag-uban kanimo, isog nga manggugubat. Lakaw ug luwasa ang mga Israelita gikan sa mga Midianhon.”

Ang amahan ni Gideon adunay usa ka altar nga gibuhat alang sa diosdios. Gisugo sa Dios si Gideon sa pagguba sa altar. Apan nahadlok si Gideon sa mga tawo, busa naghulat pa siya nga mogabii. Ug unya giguba niya ang altar ug gidugmok niya kini. Nagbuhat siya ug bag-o nga altar sa Dios diin duol lamang sa altar nga nahimutangan sa diosdios kaniadto ug naghalad siya sa Dios didto.

Pagkabuntag, nakita sa mga tawo nga adunay usa ka tawo nga nagtumpag ug nagguba sa altar, ug nangasuko sila pag-ayo. Miadto sila sa balay ni Gideon aron patyon siya, apan ang amahan ni Gideon miingon, “Nganong misulay man kamo pagtabang sa inyong diosdios. Kung dios pa siya, pasagdi siya nga magpanalipod sa iyang kaugalingon!” Ug tungod kay gisulti niya kini, wala na patya sa mga tawo si Gideon.

Unya mibalik na usab ang mga Midianhon aron sa pagkawat gikan sa mga Israelita. Daghan kaayo sila nga dili gani sila makaihap. Gitawag ni Gideon ang mga Israelita ug gitapok aron sa pagpakig-away kanila. Nangayo si Gideon sa Dios ug duha ka timailhan aron maklaro kung siya ba gayod ang gamiton sa Dios sa pagluwas sa Israel.

Alang sa unang timailhan, nagbutang si Gideon ug panit sa karnero didto sa yuta ug nagsulti sa Dios nga basaon sa yamog ang panit sa karnero ug dili ang yuta. Ug gibuhat kadto sa Dios. Sa pagkasunod gabii, nagsulti siya nga basaon ang yuta apan mauga ang panit sa karnero. Ug gibuhat gihapon kadto sa Dios. Ug kining duha ka timailhan maoy nag-aghat kang Gideon nga gamiton siya sa Dios aron sa pagluwas sa Israel gikan sa mga Midianhon.

32,000 ka Isrealitang mga sundalo ang miadto kang Gideon, apan nag-ingon ang Dios nga daghan ra kayo sila. Busa gipapauli ni Gideon ang 22,000 nga mga talawan apan daghan pa gihapon sila matod sa Dios. Busa gipapauli ni Gideon silang tanan gawas sa 300 ka mga sundalo.

Nianang gabhiona, ang Dios nag-ingon kang Gideon, “Lugsong ngadto sa kampo sa mga Midianhon ug kung imong madunggan ang ilang isulti, dili ka na mahadlok.” Busa nianang gabhiona, milugsong si Gideon didto sa kampo ug nadungog niya ang Midianhon nga sundalo nga nagsulti sa iyang higala mahitungod sa iyang damgo. Ang higala sa maong tawo nag-ingon, “Kining damgoha nagpasabot nga pildihon sa mga sundalo ni Gideon ang kasundalohan sa Midianhon.” Sa pagkadungog ni Gideon niini, gisimba niya ang Dios.

Unya mibalik si Gideon ngadto sa iyang mga sundalo ug gihatagan niya ang matag-usa kanila ug budyong, banga, ug sulo. Gipalibotan nila ang kampo kung asa nangatulog ang mga Midianhon nga kasundalohan. Gibutang sa 300 ka mga sundalo ni Gideon ang ilang mga sulo sa banga aron dili makit-an sa mga Midianhon ang siga sa ilang mga sulo.

Unya, gibuak sa tanan nga mga sundalo ni Gideon ang ilang banga sa mao ra gihapon nga higayon, sa kalit lang nakit-an na ang siga sa mga sulo. Ug gipatingog nila ang ilang mga budyong ug naninggit, “Espada alang kang Yahweh ug alang kang Gideon!”

Gipalibog sa Dios ang mga Midianhon, ug nagsugod sila pag-unay sa pagpinatyanay. Dihadiha dayon, ang nahibilin nga mga Israelita gipatawag gikan sa ilang mga panimalay aron moadto sa pagtabang sa paggukod sa mga Midianhon. Napatay nila ang daghan kanila ug gigukod nila ang nahibilin kanila pagawas sa yuta sa mga Israelita. 120,000 ka mga Midianhon ang namatay niadtong adlawa. Ug giluwas sa Dios ang Israel.

Gusto sa mga tawo nga himoong hari si Gideon. Wala sila tugoti ni Gideon sa paghimo niini, apan nangayo siya kanila ug pipila ka mga singsing nga bulawan nga ilang nailog gikan sa mga Midianhon. Ug gihatag sa katawhan kang Gideon ang dakong kantidad sa bulawan.

Unya gigamit ni Gideon ang bulawan aron sa paghimo usa usa ka pinasahi nga sinina sama sa gisul-ob sa labaw’ng pari. Apan nagsugod ang mga tawo sa pagsimba niini nga daw sama kini sa usa ka diosdios. Busa gisilotan na usab sa Dios ang Israel tungod kay nagsimba sila sa mga diosdios. Gitugotan sa Dios nga mapildi sila sa ilang mga kaaway. Sa kataposan nagpakitabang na usab sila sa Dios, ug gipadal-an sila sa Dios ug lain na usab nga manluluwas.

Nagbalik-balik sa makadaghan kini nga panghitabo: magpakasala ang mga Israelita, silotan sila sa Dios, maghinulsol sila, ug magpadala ang Dios ug manluluwas sa pagluwas kanila. Sulod sa daghan nga katuigan, nagpadala ang Dios ug daghan nga manluluwas nga moluwas sa mga Israelita gikan sa ilang mga kaaway.

Sa kataposan, nangayo ang katawhan sa Dios ug hari sama sa uban nga kanasoran. Gusto nila ug hari nga taas ug barog, kusgan ug maoy manguna kanila sa pagpakiggubat. Wala mahimuot ang Dios niini nga hangyo, apan gihatagan gihapon niya sila ug hari ingon sa ilang gipangayo.

Istorya gikan sa Biblia: Maghuhukom 1-3; 6-8