46. Nahimong Magtutuo si Pablo

Si Saulo ang batan-on nga lalaki nga nagbantay sa mga kupo sa mga tawo nga nagpatay kang Esteban. Wala siya motuo kang Jesus busa iyang gipanglutos ang mga magtutuo. Giadto niya ang mga kabalayan sa Jerusalem ug iyang gidakop ang mga lalaki ug mga babaye ug gipriso sila. Gihatagan siya ug katungod sa pangulong pari nga moadto sa siyudad sa Damasco aron dakpon ang mga Kristohanon didto ug dad-on balik sa Jerusalem.

Samtang nagpadulong na si Saulo sa Damasco, ang usa ka sulaw nga kahayag nga gikan sa langit midan-ag sa iyang palibot, ug natumba siya sa yuta. Nadungog niya ang tingog sa tawo nga nag-ingon, “Saulo! Saulo! Nganong gilutos mo man ako?” Nangutana si Saulo, “Kinsa ka man, Agalon?” Mitubag si Jesus kaniya, “Ako si Jesus nga imong ginalutos!”

Sa pagtindog ni Saulo, dili na siya makakita. Gidala siya sa iyang mga higala didto sa Damasco. Wala mokaon ug moinom si Saulo sulod sa tulo ka adlaw.

Adunay usa ka tinun-an sa Damasco nga ginganlan ug Ananias. Miingon ang Dios kaniya, “Adto sa balay nga gipuy-an ni Saulo. Itapion ang imong mga kamot kaniya aron mobalik ang iyang panan-aw.” Apan miingon si Ananias, “Agalon nakadungog ako nga kining tawhana maoy naglutos sa mga magtutuo.” Mitubag ang Dios kaniya, “Lakaw! Gipili ko siya nga magpaila sa akong ngalan ngadto sa mga Judio ug sa tanan nga pundok sa katawhan. Daghan siya’g masinatian nga pag-antos alang sa akong ngalan.”

Busa miadto si Ananias kang Saulo, iyang gitapion ang iyang mga kamot ug miingon, “Si Jesus nga mipakita kanimo sa pagpadulong nimo dinhi, mao ang nagpadala kanako aron makakita ka pag-usab ug mapuno uban sa Balaang Espiritu.” Diha-diha dayon nakakita si Saulo pag-usab ug gibawtismohan siya ni Ananias. Unya mikaon si Saulo ug nabaskog pag-usab ang iyang lawas.

Nagsugod dayon sa pagsangyaw si Saulo sa mga Judio didto sa Damasco nga nag-ingon, “Si Jesus mao ang Anak sa Dios!” Natingala ang mga Judio kay mao man kining tawhana ang naglutos sa mga magtutuo ug karon mituo na usab kang Jesus! Nakiglalis siya sa mga Judio ug gipamatud-an ni Saulo kanila nga si Jesus mao ang Mesiyas.

Pagkahuman sa pipila ka adlaw, nagplano ang mga Judio nga patyon nila si Saulo. Nagpadala sila ug mga tawo aron bantayan si Saulo sa ganghaan sa siyudad aron patyon siya. Apan nahibal-an ni Saulo ang ilang plano, ug gitabangan siya sa iyang mga higala nga makaikyas. Usa ka gabii niana, gihinay-hinay nila siya sa pagpaubos sa pader sa siyudad pinaagi sa pagsulod kaniya sa usa ka bukag. Human makaikyas si Saulo sa Damasco, nagpadayon siya sa pagsangyaw mahitungod kang Jesus.

Miadto si Saulo sa Jerusalem aron makigkita sa mga tinun-an, apan nahadlok sila kang Saulo. Unya ang usa ka magtutuo nga ginganlan ug Barnabas nagdala kang Saulo didto sa mga apostoles ug gisultihan sila kung giunsa ni Saulo sa pagsangyaw nga maisogon didto sa Damasco. Sukad niadto, gidawat na si Saulo sa mga tinun-an.

Ang uban nga mga magtutuo nga mibiya sa Jerusalem tungod sa paglutos kanila, nangadto sa siyudad sa Antioquia. Ug didto nagsangyaw sila mahitungod kang Jesus. Kadaghanan sa mga tawo sa Antioquia dili mga Judio, apan sa unang higayon daghan usab kanila ang nahimong magtutuo. Miadto didto si Barnabas ug si Saulo aron magtudlo sa bag-ong mga magtutuo mahitungod kang Jesus ug aron mapalig-on ang kasimbahanan. Didto sa Antioquia, ang mga magtutuo ni Jesus maoy unang gitawag nga mga “Kristohanon.”

Usa ka adlaw niana, samtang nagpuasa ug nag-ampo ang mga Kristohanon sa Antioquia, miingon ang Balaang Espiritu kanila, “Igahin ninyo kanako si Barnabas ug si Saulo tungod kay aduna akoy ipabuhat kanila.” Busa ang simbahan sa Antioquia nag-ampo alang kang Barnabas ug Saulo ug gipandong ang ilang mga kamot kanila. Unya gipalakaw nila sila aron magsangyaw sa maayong balita mahitungod kang Jesus sa daghan pa nga mga lugar. Nagtudlo si Barnabas ug Saulo sa mga nagkalain-laing grupo sa mga tawo ug daghan ang mituo kang Jesus.

Ang Istorya gikan sa Biblia: Buhat 8:3; 9:1-31; 11:19-26; 13:1-3